CPL: ម្ចាស់​ស្បែកជើងមាស ស្រោមដៃមាស និងពានឯកត្តជន ១០ ទៀត នឹងប្រកាសសប្តាហ៍ក្រោយ

លីគកំពូលកម្ពុជា Cambodian Premier League បានកំណត់យកថ្ងៃ ចន្ទ ទី ២៦ ខែ ឧសភា ឆ្នាំ ២០២៥ ដើម្បីប្រគល់មេដាយជូនក្រុមចំណាត់ថ្នាក់លេខ ២ និងលេខ ៣ ព្រម​ទាំង​​ពានរង្វាន់ឯកត្តជនតាមប្រភេទនីមួយៗសម្រាប់រដូវកាល ២០២៤-២០២៥។

ការប្រកួតលីគកំពូលកម្ពុជារដូវកាល ២០២៤-២០២៥ បានបញ្ចប់ជាផ្លូវការហើយ ត្រឹមល្ងាចថ្ងៃ អាទិត្យ ទី ១៨ ខែ ឧសភា ខណៈក្រុមជើងឯកបានទៅលើក្រុមព្រះខ័នរាជស្វាយរៀង ក្រុមលេខ ២ បានទៅលើក្រុមភ្នំពេញក្រោន និងក្រុមលេខ ៣ បានទៅលើក្រុម វិសាខា។

ក្រុមម្ចាស់ឯកព្រះខ័នរាជស្វាយរៀង គឺត្រូវបាន CPL ប្រគល់ជូនពាន និងមេដាយមាសរួចរាល់ហើយកាលពីថ្ងៃទី ១៨ ខែ ឧសភា។ ចំណែកមេដាយ​ប្រាក់​សម្រាប់ក្រុមចំណាត់ថ្នាក់លេខ ២ និងមេដាយ​សំរិទ្ធ​សម្រាប់​ក្រុម​លេខ ៣ នឹងត្រូវប្រគល់ជូននៅថ្ងៃទី ២៦ ខែ ឧសភា ជា​មួយ​ពាន​រង្វាន់ឯកត្តជន​ផ្សេង​ៗ។

ពានឯកត្តជន​មាន​ចំនួន​១៣ ប្រភេទ​ផ្សេង​គ្នា​គឺ៖

• ពាន គ្រូបង្វឹកល្អ
• ពាន​ កីឡាករល្អ
• ពាន​ កីឡាករ ១១ នាក់ដំបូងល្អជាងគេ
• ពាន​ កីឡាករទាត់បញ្ចូលទីច្រើនជាងគេ
• ពាន ​អ្នកចាំទីល្អ
• ពាន​ ក្រុមគោរពវិន័យបានល្អ
• ពាន​ កីឡាករវ័យក្មេងល្អជាងគេ
• ពាន​ ទីលានប្រកួតល្អជាងគេ
• ពាន​ កីឡដ្ឋានដែលមានអ្នកចូលទស្សនាច្រើនជាងគេ
• ពាន​ កីឡដ្ឋានដែលទស្សនិកជនពេញចិត្តជាងគេ
• ​ពាន​ គ្រាប់បាល់ស៊ុតបញ្ចូលទីល្អជាងគេ ​
• ពាន​ កីឡាករសង្គ្រោះបាល់បានល្អជាងគេ និង​
• ពាន ក្រុមអាជ្ញាកណ្តាលល្អ

សូមបញ្ជាក់ថា អ្នកឈ្នះពានស្បែកជើងមាសរដូវកាលនេះបានរកឃើញហើយ គឺខ្សែបម្រើប្រយុទ្ធភ្នំពេញក្រោន Andres Nieto បន្ទាប់ពីរកបាន ២១ គ្រាប់។ ចំណែកអ្នកឈ្នះពានឯកត្តជនផ្សេងៗទៀត គឺរង់ចាំការប្រកួតនៅថ្ងៃទី ២១ ខែ ឧសភា នៅសណ្ឋាគារ សាន់ & មូន រីវើសាយ៕

អត្ថបទ៖ សេម កុសល