កីឡា

អតីតយុវជន Man United កីឡាករ Charlie Scott កំពុងរីករាយនៅបឹងកេត

បានផុស

២ ខែ មុន

នៅ

ថ្ងៃអង្គារ ៣ មិថុនា ២០២៥

ដោយ

កីឡាករ Charlie Scott ទើបតែបានចូលរួមជាមួយ បឹងកេត បានកន្លះរដូវកាលប៉ុណ្ណោះ ប៉ុន្តែរូបគេបានចាត់ទុកជាក្លិបមួយដែលរូបគេសប្បាយចិត្ត និងកំពុងរីករាយសម្រាប់ការស្នាក់នៅប្រទេសកម្ពុជា។

កីឡាករ Charlie Scott បង្ហាញរបៀបអបអរគ្រាប់បាល់

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងបទសម្ភាសជាមួយសារព័ត៌មាន«កម្ពុជាថ្មី» Charlie Scott បានប្រាប់ថា ៖«ខ្ញុំសប្បាយរីករាយជាមួយបឹងកេត។ ក្នុងវិស័យបាល់ទាត់ មានឱកាសច្រើនណាស់នៅក្នុងពិភពលោកនេះ ប៉ុន្តែការស្វែងរកក្លិបមួយដែលផ្តល់ឲ្យយើង និងក្រុមគ្រួសារសប្បាយរីករាយពិតជារឿងកម្រ។ នៅទីនេះ ខ្ញុំ និងគ្រួសាររីករាយ។ ការរីករាយនេះបានជួយដល់ការលេងនៅលើទីលាន»។

កីឡាករបានបន្តថា ៖«បុគ្គលិករួសរាយរាក់ទាក់ ចិត្តល្អ ស្វាគមន៍។ ខ្ញុំក្រោកពីដេកពេលព្រឹក និងមានអារម្មណ៍ល្អឆ្ពោះទៅកាន់កន្លែងហ្វឹកហាត់ និងបានជួបអ្នកគ្រប់គ្នា។ ខ្ញុំមិនដឹងថា នៅពេលខាងមុខមានអ្វីកើតឡើងទេ ប៉ុន្តែខ្ញុំកំពុងរីករាយជាមួយក្លិបបឹងកេត»។

«ដូចខ្ញុំនិយាយអីចឹង ខ្ញុំគិតថា នេះជាក្រុមសំបូរកីឡាករក្មេង និងអ្វីដែលមានការសន្យានឹងមកដល់។ ខ្ញុំមានទំនាក់ទំនងល្អជាមួយមិត្តរួមក្រុម ទាំងជាមួយកីឡាករកម្ពុជា និងកីឡាករបរទេស។ យើងរួមដៃគ្នាបានល្អ»។

កីឡាករ Charlie Scott អបអរ ក្រោយរកបានគ្រាប់

អតីតយុវជនក្លិបបិសាចក្រងម Manchester United រូបនេះ បានបង្ហាញសមត្ថភាពគួរឱ្យចាប់អារម្មណ៍មែនទែន ជាមួយ បឹងកេត ក្នុងរយៈពេលកន្លះរដូវកាលមកនេះ ខណៈការមកដល់របស់គេ គឺបានរួមចំណែកយ៉ាងធំ ក្នុងការជួយឱ្យក្លិបម្ចាស់ជើងឯកលីគកំពូលកម្ពុជា ៤ សម័យ បញ្ចប់រដូវកាល ២០២៤-២០២៥ ដោយឈរនៅចំណាត់ថ្នាក់ក្រុមកំពូលទាំង ៤ ប្រចាំលីគ និងដណ្តើមបានចំណាត់ថ្នាក់លេខ ៣ ក្នុងពានសម្តេចតេជោ ហ៊ុន សែន៕