លោក ខូវ ឆាយ បញ្ជាក់​ពី​ការ​បំពេញ​ការងារ​តាម​ច្បាប់ មិន​មែន​តាម​អារម្មណ៍

លោក ខូវ ឆាយ ប្រធាន​សហព័ន្ធ​កីឡា​ប្រដាល់​គុន​ខ្មែរ និង​ទើប​តែ​ទទួល​បាន​តួនាទី​ជា​ អគ្គលេខាធិការ​ស្តីទី​នៃ​សហព័ន្ធ​គុន​ខ្មែរ​អន្តរជាតិ បាន​លើក​ឡើង​ពី​របៀប​ធ្វើ​ការ​​គឺ​ស្របទៅ​តាម​ច្បាប់ទម្លាប់ និង​គោល​ការណ៍ ប៉ុន្តែ​មិន​មែន​​ធ្វើ​ទៅ​តាម​អារម្មណ៍នោះ​ទេ។

លោក​បាន​សរសេរ​រៀប​រាប់​យ៉ាងដូច្នេះ​ថា ៖«​ការងារដឹកនាំការអនុវត្តកិច្ចការអ្វីក៏ដោយ គេត្រូវបង្កើតច្បាប់ លក្ខន្តិកៈ បទបញ្ជា ដើម្បីជាគោលក្នុងការអនុវត្ត។ បើមិនអញ្ចឹងទេអ្នកអនុវត្តនឹងធ្វើតាមអារម្មណ៍ តាមការយល់ឃើញរៀងៗខ្លួន។

ការទាមទារ ការតវ៉ា តស៊ូមតិណាមួយ ត្រូវមានអំណះអំណាង មានមួលដ្ឋានច្បាប់ (យកពីប្រទេសដទៃក៏បានអោយតែក្នុងវិស័យដូចគ្នា) ជាយោងដើម្បីលើកមកបកស្រាយ។ មិនអាចយកតែបទពិសោធផ្ទាល់ខ្លួន ទស្សនៈផ្ទាល់ខ្លួន មកប្រកែកយកឈ្នះដោយងងឹតងងុលបានឡើយ។

ម្យ៉ាងវិញទៀតបើយើងស្ថិតនៅក្រោមដំបូលនៃអង្គភាពមួយ ហើយយើងមិនស្តាប់ការនែនាំរបស់អង្គភាព មិនអនុវត្តតាមគោលការណ៍ លក្ខន្តិកៈ បទបញ្ជាផ្ទៃក្នុងរបស់អង្គភាព បង្ហោះព័ត៍មានមិនពិត គ្មានមូលដ្ឋាន ផ្សព្វផ្សាយអោយមានការយល់ច្រលំ ច្បាស់ណាស់ត្រូវតែទទួលពិន័យរបស់អង្គភាពក្រោមវិសាលភាពនៃដែនគ្រប់គ្រងរបស់សាមីអង្គភាព។

ដូចប្រសាសន៍សម្តេចតេជោលោកថ្លៃងថា “ចោររមែងស្អប់តុលាការណាស់” ករណីដូចគ្នានេះ មនុស្សខូច មិនយល់ពីច្បាប់ មិនគោរពច្បាប់ រមែងស្អប់អ្នកអនុវត្តច្បាប់ណាស់។ ហើយមនុស្សខូច តែងតែគាំទ្រមនុស្សខូចដូចគ្នា និងមិនដែលសាទរនឹងអំពើល្អឡើយ។

ជាថ្នាក់ដឹកនាំ បើមិនមានគោលជំហរច្បាស់លាស់ទេ អង្គភាពនឹងមិនរឹងមាំឡើយ។ តួនាទីរបស់ខ្ញុំក្នុងនាមជាប្រធានអង្គភាពគឺដឹកនាំការអនុវត្តច្បាប់ អនុវត្តបទបញ្ជា ការពារភាពត្រឹមត្រូវ ការពារមន្ត្រីល្អ ប្រឆាំងនឹងមន្ត្រីខិលខូច ប្រឆាំងនឹងអំពើអាក្រក់ដែលជាមេរោគបង្អាក់នូវការអភិវឌ្ឍរបស់ស្ថាប័នទាំងមូល។ បើមិនអាចអនុវត្តតួនាទីនេះបាន ក៏ពុំគួរទទួលមុខដំណែងនេះដែរ។

ខ្ញុំធ្វើការគ្មានវប្បធម៌សម្ងំ​សុខឡើយ មានបញ្ហាកើតឡើង ខ្ញុំត្រូវដឹកមុខក្នុងការប្រឈម និងដោះស្រាយ។  ខ្ញុំមានសុខភាពផ្លូវកាយ និងផ្លូវចិត្តរឹងមាំណាស់ មិនដែលខ្លាចនឹងការប្រឈមមុខ ការតតាំង និងការវាយប្រហារណាមួយពីបច្ចាមិត្តឡើយ សូមស្វាគមន៍ ព្រមទាំងរីករាយនឹងកំដរ។ អ្នកអាចស៊ើបពីប្រវត្តិខ្ញុំបាន ខ្ញុំគ្មានខ្នងបង្អែក ខ្សែបណ្តាញបក្សពួកនឹងគេទេ សមិទ្ធផលរបស់ខ្ញុំគឺកើតចេញពីភាពស្មោះត្រង់ និងសមត្ថភាពពិតៗ ព្រមទាំងក្តីស្រឡាញ់គាំទ្រពីថ្នាក់ដឹកនាំ និងសហការីរបស់ខ្ញុំ»៕

អត្ថបទ៖ វីរបុត្រ