កីឡា

គ្រូជំនាញបាល់ទះអន្តរជាតិ លោក Dusan ផ្តាំសិក្ខាកាមកម្ពុជា ត្រូវមានបេសកកម្មក្នុងជីវិត

បានផុស

១ year មុន

នៅ

ថ្ងៃចន្ទ ៧ កក្កដា ២០២៥

ដោយ

ក្រោយបញ្ចប់វគ្គបណ្តុះបណ្តាលជំនាញគ្រូបង្វឹកបាល់ទះអន្តរជាតិ កម្រិត C រយៈពេល ៥ ថ្ងៃលោក Dusan Jarotta គ្រូឧទ្ទេសមកពីសហព័ន្ធកីឡាបាល់ទះអន្តរជាតិបានផ្តាំឲ្យសិក្ខាកាមទាំងអស់ត្រូវយកចំណេះជំនាញទៅប្រើឲ្យចំគោលដៅ និងធ្វើជាគំរូល្អដល់ក្មេងៗជំនាន់ក្រោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងចំពោះមុខសិក្ខាមកម្ពុជា ចំនួន ៤២ កាលពីរសៀល ថ្ងៃទី៥ ខែកក្កដា លោក Dusan Jarotta ដែលជាគ្រូឧទ្ទេសរបស់សហព័ន្ធកីឡាបាល់ទះអន្តរជាតិ និងបង្រៀនដល់បណ្តាប្រទេសផ្សេងៗជាច្រើនបានលើកឡើងថា វគ្គបណ្តុះបណ្តាលនេះពិតជាសំណាស់ បន្ទាប់ពីចំណាយពេលរៀនចំនួន ៥ ថ្ងៃ។ អ្នកទាំងអស់គ្នាបានខិតខំប្រឹងប្រែង និងរួបរួមគ្នាបានល្អក្នុងការសិក្សា។ អ្នកទាំងអស់គ្នាបានអភិវឌ្ឍខ្លួនរហូតដល់ទទួលបានលិខិតបញ្ជាក់ការសិក្សាកម្រិតអន្តរជាតិ។

លោកបានសង្កត់ធ្ងន់ថា ៖«អ្នកទាំងអស់គ្នាមានបេសកកម្មក្នុងជីវិត។ នៅពេលអ្នកទាំងអស់គ្នាមានជីវិត គឺអ្វីៗមានទាំងអស់។ បេសកម្មរបស់អ្នកទាំងអស់គ្នាគឺជាគំរូដល់ក្មេងជំនាន់ក្រោយ ក្នុងនាមគ្រូបង្ហាត់ ជាឪពុកម្តាយ និងជារាមច្បងនាំផ្លូវគេ»។

«យើងធ្វើការជាមួយមនុស្សផ្សេងៗគ្នា ជាពិសេសជាមួយកូនក្មេង យុវជន និងជាមួយមនុស្សធំ។ អ្នកទាំងអស់គ្នាមានទំនួលខុសត្រូវខ្ពស់ណាស់ក្នុងនាមជាអ្នកបង្ហាត់បង្រៀនគេ ដូច្នេះត្រូវធ្វើអ្វីជាគំរូគេ»។

លោកបានបន្ថែមថា លោករីករាយដែលបានមកបណ្តុះបណ្តាលដែលរៀបចំនៅរាជធានីភ្នំពេញ នៃប្រទេសកម្ពុជា។ សូមអរគុណដល់គណៈកម្មាធិការជាតិអូឡាំពិកកម្ពុជា និងសហព័ន្ធកីឡាបាល់ទះកម្ពុជាដែលរៀបចំឲ្យមានកម្មវិធីបាល់ទះនេះឡើង។

វគ្គបណ្តុះបណ្តាលសាមគ្គីអូឡាំពិក ជំនាញគ្រូបង្វឹកបាល់ទះអន្តរជាតិអន្តរជាតិ កម្រិត C រៀបចំលើកដំបូងនៅក្នងប្រទេសកម្ពុជា ចាប់ពីថ្ងៃទី ១ ដល់ ទី ៥ ខែកក្កដា ឆ្នាំ ២០២៥ ដែលមានសិក្ខាកាមជាង ៤០២ នាក់។

វគ្គសិក្សានេះតឹងតែងខ្លាំងដែលធ្វើឲ្យសិក្ខាកាមខ្លះទទួលបានជោគជ័យ និងសិក្ខាកាមខ្លះមិនជោគជ័យ ដូច្នេះអ្នករៀបចំបានផ្តល់លិខិត ២ ផ្សេងគ្នាគឺ លិខិតបញ្ជាក់ការសិក្សាដែលបានចូលរួម និងលិខិតបញ្ជាក់ការសិក្សាដែលប្រឡងជាប់ដោយជោគជ័យ។

លោក អាំង សិរីពិសិដ្ឋ អនុប្រធាន និងជាអគ្គលេខាធិការសហព័ន្ធកីឡាបាល់ទះកម្ពុជា បានលើកឡើងថា តាមរយៈសិក្ខាកាមដែលទទួលបានជោគជ័យក្នុងវគ្គបណ្តុះបណ្តាលនេះ សង្ឃឹមថា គណៈកម្មាធិការជាតិអូឡាំពិកកម្ពុជា និងសហព័ន្ធកីឡាបាល់ទះអន្តរជាតិ តាមរយៈគម្រោងសាមគ្គីអូឡាំពិក អាចពិចារណារៀបចំវគ្គបណ្តុះបណ្តាលគ្រូជំនាញកម្រិត B នៅឆ្នាំក្រោយៗទៀត ពីព្រោះវគ្គសិក្សានេះពិតជាសំខាន់ណាស់សម្រាប់ធនធានគ្រូបង្វឹកបាល់ទះនៅកម្ពុជា៕