ខែ​ក្រោយ ក្រុម​ភ្នំពេញ​ក្រោន​ទាំង ២ ចាប់ផ្តើម​​ប្រកួត​​ក្នុង​ពាន​អាស៊ី

ក្លិប​បាល់ទាត់ ភ្នំពេញ​ក្រោន ទាំង​​​បុរស និង​នារី នឹង​ចាប់ផ្តើម​ការ​ប្រកួត​ក្នុង​ពាន​រង្វាន់​​កម្រិត​អាស៊ី​ ​នៅ​ខែ​សីហា ឆ្នាំ ២០២៥ ដែល​បាន​ក្លាយ​ជា​ក្លិប​កម្ពុជា​ដំបូង​​​មាន​ភារកិច្ច​ប្រកួត​ពាន​អាស៊ី​ទាំង​បុរស និង​នារី។

ក្រុម​បុរស ភ្នំពេញ​ក្រោន ក្នុង​នាម​ជា​ក្រុម​ជើង​ឯក​ពាន​រង្វាន់​សម្តេច​តេជោ ហ៊ុន សែន នឹង​ធ្វើ​ដំណើរ​ទៅ​​ប្រទេស ព្រុយណេ ដើម្បី​ប្រកួត​ជា​មួយក្រុម Kasua FC នៅកីឡដ្ឋានជាតិ Hassanal Bolkiah នៅ​ថ្ងៃ​អង្គារ ទី​១៩ ខែ​សីហា ឆ្នាំ ២០២៥ សម្រាប់​វគ្គ​ជម្រុះ​ពាន​រង្វាន់​ក្លិប​អាស៊ី​លំដាប់​ទី​៣ AFC Challenge League 2025/26។ ការ​ប្រកួត​នេះ​មាន​តែ​មួយ​ជើង​ប៉ុណ្ណោះ ដូច្នេះ ក្រុម​ណា​ឈ្នះ នឹង​ទទួល​បាន​កៅអី ឡើង​ទៅ​វគ្គ​សន្សំពិន្ទុ​ក្នុង​ពូល។

ជា​មួយ​គ្នា​នេះ ក្រុម​នារី ភ្នំពេញ​ក្រោន ត្រូវ​ធ្វើ​ម្ចាស់​ផ្ទះ​ការ​ប្រកួត​ជម្រុះ​ក្នុង​ពូល​ លីគ​​បាល់ទាត់​ក្លិប​នារី​អាស៊ី​លំដាប់​ទី​១ AFC Women’s Champions League ពី​ថ្ងៃ​ទី​២៥ ដល់ ទី៣១ ខែ​សីហា ឆ្នាំ ២០២៥ នៅ​​រាជ​ធានី​ភ្នំពេញ។ ក្រុម​នារី​ ភ្នំពេញ​ក្រោន ស្ថិត​នៅ​ពូល E ដែល​មាន​ក្រុមជើង​ឯក​លីគ​នារី​ឥណ្ឌា East Bengal និង​ក្រុម​ជើង​ឯកលីគ​នារីហុងកុង Kitchee។

បើក​ឆាក ក្រុម​នារី​ភ្នំពេញ​ក្រោន ត្រូវ​ប្រកួត​ជា​មួយ​ក្រុម East Bengal នៅ​ថ្ងៃ​ទី​២៥ ខែ​សីហា និង​ចុង​ក្រោយ​ជា​មួយ​ ក្រុម​នារី​ហុងកុង Kitchee នៅ​ថ្ងៃ​ទី ២៨ ខែ​សីហា។

ការ​ប្រកួត​វគ្គជម្រុះ​ក្នុង​ពូល​នេះ មាន​ក្រុម​ចំនួន ២០ ត្រូវ​បាន​បែង​ជា ៥ ពូល ហើយ​ក្រុម​លេខ​១​​ក្នុង​ពូល ចំនួន ៥ ក្រុម នឹង​ត្រូវ​ឡើង​ជុំ​ចុង​ក្រោយ ដែល​មាន​ ក្រុម​ខ្លាំង​ចំនួន ៧ កំពុង​រង់ចាំ​គឺ Melbourne City (អូស្ត្រាលី) Suwon FC Women (កូរ៉េ​ខាង​ត្បូង) Tokyo Verdy Beleza (ជប៉ុន) Wuhan Jiangda (ចិន) Ho Chi Minh City (វៀតណាម) Abu Dhabi Country Club (អារ៉ាប់រួម) និង Bam Khatoon (អ៉ីរ៉ង់)។

សូម​បញ្ជាក់​ថា ក្រុម​នារី​ភ្នំពេញ​ក្រោម ជា​ក្រុម​បាល់ទាត់​រី​កម្ពុជា​ដំបូង​ដែល​​ទទួល​បាន​ឱកាស​ប្រកួត​ក្នុង​ពាន​រង្វាន់​ក្លិប​នារី​អាស៊ី​លំដាប់​ទី១ ហើយ​បាន​ទទួល​ធ្វើ​ម្ចាស់​ផ្ទះ​ថែម​ទៀត៕

អត្ថបទ៖ វីរបុត្រ