Facebook បាត់អ្នកប្រើប្រាស់ប្រចាំថ្ងៃច្រើនបំផុត មិនធ្លាប់មានក្នុងប្រវត្តិសាស្ត្រ

Facebook បានបាត់បង់អ្នកប្រើប្រាស់ប្រចាំថ្ងៃច្រើនបំផុតជាលើកដំបូងក្នុងប្រវត្តិសាស្ត្រ ១៨ឆ្នាំរបស់ខ្លួន តាំងពីចាប់ដំណើរការកាលពីឆ្នាំ២០០៤ ខណៈនាយកប្រតិបត្តិ Mark Zuckerberg ជឿថា វាបណ្តាលមកពីសន្ទុះគាំទ្រលើ TikTok ។

មេធំ ​ Facebook និយាយថា ប្រមាណ ២ឆ្នាំមកនេះ មនុស្សបានងាកទៅប្រើកម្មវិធី TikTok  ដែលនេះបណ្ដាលឱ្យបណ្ដាញរបស់លោកធ្លាក់ចុះអ្នកប្រើប្រាស់ជិត ៥០ម៉ឺននាក់ក្នុងមួយថ្ងៃ។ Zuckerberg បានរំលឹកឡើងវិញដែរថា Meta ដែលជាម្ចាស់ Facebook, Instagram និង WhatsApp កំពុងខិតខំជំរុញការអភិវឌ្ឍន៍វីដេអូខ្លីៗរបស់ខ្លួនឱ្យកាន់តែខ្លាំងឡើង ដើម្បីប្រកួតប្រជែងជាមួយ TikTok។ ​ប៉ុន្តែគម្រោងថ្មី កំពុងស្ថិតក្នុងដំណាក់កាលតេស្តនៅឡើយ ដូច្នេះបានជា Tiktok អាចដណ្ដើមបានអ្នកគាំទ្រពីហ្វេសប៊ុកបានយ៉ាងងាយ។

បច្ចុប្បន្ន Facebook មានអ្នកប្រើប្រាស់ត្រឹមតែ ១.៩៣ ពាន់លាននាក់ប៉ុណ្ណោះ ដែលចំនួននេះបានធ្វើឱ្យភាគហ៊ុនធ្លាក់ចុះជាង ២០% ឬគិតជាប្រាក់ ក្រុមហ៊ុនខាតបង់ប្រមាណចំណូល ៥០០ ពាន់ប៊ីលានដុល្លារ ក្នុងរយៈមួយត្រីមាសចុងក្រោយនេះ។

ទោះយ៉ាងណាក្រុមហ៊ុននៅតែជឿជាក់ ក្រោយពីសម្ពោធកម្មវិធី Reality Labs ដែលរួមមាន កាសស្តាប់និម្មិត វ៉ែនតានិម្មិត បច្ចេកវិទ្យាជួបគ្នាពិតតាមពិភពនិម្មិត និងកម្មវិធីស្មាតហ្វូនផ្សេងទៀត ហ្វេសប៊ុកអាចទាញអ្នកគាំទ្រឱ្យត្រឡប់មកវិញមិនខាន។

ដោយឡែក ចំពោះមូលហេតុដែលអ្នកនិយមលេងអ៊ីនធឺរណិត បែកចិត្តទៅប្រើ TikTok ព្រោះបណ្ដាញនេះជាទីផ្សារវីដេអូដែលអាចទាក់ទាញទស្សនិកបានច្រើន រហ័ស និងចំណាយតិច​ជាងហ្វេសប៊ុក។ ​

ទោះជាយ៉ាងណា ក្រុមហ៊ុន Meta មានចក្ខុវិស័យវែងឆ្ងាយជាមួយនឹង Metaverse ដែលពេលនេះ Meta កំពុងប្រជែងផលិតទម្រង់វីដេអូថ្មីៗ ដើម្បីតម្រូវការទស្សនិកជន ខណៈនាយកប្រតិបត្តិជឿមុតមាំថា វានឹងជោគជ័យក្នុងរយៈពេលវែង៕

ប្រែសម្រួល៖ សន្យា

ចុចអាន៖ ដឹងអត់ ក្រុមហ៊ុន ​Meta កាន់កាប់បណ្ដាញណាខ្លះនៅក្នុងដៃ?