Tesla នឹងបើករោងចក្រផលិត និងស្តុកអគ្គិសនីថ្មីនៅក្នុងទីក្រុងមួយរបស់ ចិន

ក្រុមហ៊ុន Tesla បានសរសេរសារបង្ហោះនៅលើបណ្ដាញ Twitter កាលពីថ្ងៃអាទិត្យថា ក្រុមហ៊ុនផលិតរថយន្តអគ្គិសនីមួយនេះនឹងបើករោងចក្រផលិត និងស្តុកអគ្គិសនីថ្មីមួយទៀតឈ្មោះ Megafactory នៅទីក្រុងសៀងហៃ ប្រទេសចិន ជាមួយនឹងសមត្ថភាពផលិតបាន ១០,០០០ Megapacks ក្នុងមួយឆ្នាំ ។

បើយោងតាមគេហទំព័ររបស់ក្រុមហ៊ុនបានឲ្យដឹងថា បច្ចុប្បន្ន Tesla ក៏មានរោងចក្រផលិត និងស្តុកអគ្គិសនី Megafactory នៅទីក្រុង Lathrop រដ្ឋកាលីហ្វ័រញ៉ា ដែលមានសមត្ថភាពផលិតបាន ១០,០០០ Megapacks ជារៀងរាល់ឆ្នាំ ។

នៅក្នុងសារលើ Twitter នោះដែរ នាយកប្រតិបត្តិក្រុមហ៊ុន Tesla លោក Elon Musk បាននិយាយកាលពីថ្ងៃអាទិត្យថា រោងចក្រនៅក្នុងប្រទេសចិន នឹងបន្ថែមទិន្នផលកាន់តែច្រើនពីរោងចក្រនៅក្នុងរដ្ឋកាលីហ្វ័រញ៉ា ។

ចំពោះរោងចក្រ​ផលិតថ្មថាមពលនេះ ក្រុមហ៊ុនគ្រោងនឹងចាប់ផ្តើមសាងសង់រោងចក្រក្នុងអំឡុងឆមាសទី២ នៃឆ្នាំនេះ ហើយចាប់ផ្តើមផលិតកម្មនៅពាក់កណ្តាលឆ្នាំ ២០២៤ ៕

ប្រែសម្រួលដោយ ៖ នាង​ រតនៈ

ប្រភព ៖ CNBC