តម្លៃមាសអន្តរជាតិហក់ឡើងលើស ៤ ០០០ ដុល្លារ/អោន លើកដំបូងក្នុងប្រវត្តិសាស្រ្ត

តម្លៃមាសអន្តរជាតិ​បាន​បន្តហក់ឡើងខ្ពស់បំផុតក្នុងប្រវត្តិសាស្រ្ត ដោយ​កើនលើស ៤ ០០០ ដុល្លារ/អោន ជាលើកដំបូង ដោយសារតែកង្វល់ពាក់ព័ន្ធនឹង​ភាពស្រពិចស្រពិលនៃនយោបាយអាមេរិក សេដ្ឋកិច្ចសកល​ និងភូមិសាស្រ្តនយោបាយ និងការរំពឹងកាត់អត្រាការប្រាក់របស់ធនាគារកណ្ដាលសហព័ន្ធអាមេរិក (Fed)។ នេះបើតាមការចុះផ្សាយរបស់ទីភ្នាក់ងារសារព័ត៌មាន​រ៉យទ័រ។

តម្លៃមាសជួញដូរដោយ​ផ្ទាល់ បាន​កើនឡើង ០,៥ ភាគរយ ដល់ ៤ ០០២,៥៣ ដុល្លារ/អោន គិតត្រឹមម៉ោង ១០ ព្រឹក ថ្ងៃពុធ នៅទីក្រុងហុងកុង។ ចំំណែកឯមាសនាពេលអនាគតរបស់អាមេរិកវិញ បាន​កើនឡើង ០,៥ ភាគរយ ដល់ ៤ ០២៥ ដុល្លារ/អោន។

ជាធម្មតា តម្លៃមាសកើនឡើងនៅពេលមាន​ភាព​មិនប្រាកដប្រជាផ្នែកនយោបាយ និងសេដ្ឋកិច្ចជាដើម​។ រាប់តាំងពីដើមឆ្នាំមក តម្លៃមាសអន្តរជាតិ​បាន​កើនឡើងប្រមាណ ៥២ ភាគរយ រួចហើយ ខណៈបាន​កើនឡើង ២៧ ភាគរយ កាលពីឆ្នាំមុន។

អ្នកវិភាគទីផ្សារបាន​លើកឡើងថា តម្លៃមាសកើនឡើងដោយសារតែការបន្តនៃភាពតានតឹងភូមិសាស្រ្តនយោបាយទាំងនៅអឺរ៉ុប និងមជ្ឈិមបូព៌ា ភាពស្រពិលនៃសេដ្ឋកិច្ចសកល ការរំពឹងទុកពីការកាត់អត្រាការប្រាក់របស់ Fed តម្រូវការមាសពីបណ្ដាធនាគារកណ្ដាល និងកម្សោយនៃប្រាក់ដុល្លារជាដើម។

ការបិទដំណើរការរដ្ឋាភិបាល​អាមេរិក ដែលឈានដល់រយៈពេល ៧ ថ្ងៃកាលពីថ្ងៃអង្គារ ក៏ជួយជំរុញតម្លៃមាសផងដែរ ចំពេលដែលអស្ថិរភាព​នយោបាយ​នៅបារាំង និងជប៉ុន ជួយជំរុញតម្រូវការមាស ដែលគេរាប់ចាត់ទុកថាជាទ្រព្យសម្បត្តិសុវត្ថិភាព​កាន់តែខ្លាំង៕

​