ព័ត៌មានអន្ដរជាតិ

អានុទីន ទទួលស្គាល់កំហុសក្នុងការដោះស្រាយបញ្ហាទឹកជំនន់មិនបានល្អ

បានផុស

៥ ខែ មុន

នៅ

ថ្ងៃសុក្រ ២៨ វិច្ឆិកា ២០២៥

ដោយ

Chheang

នាយករដ្ឋមន្ត្រី លោក អានុទីន ឆានវីរៈគុល នៅថ្ងៃសុក្រទី២៨ខែវិច្ឆិកាឆ្នាំ២០២៥នេះ បានប្រកាសទទួលស្គាល់កំហុសសម្រាប់ការដោះស្រាយរបស់រដ្ឋាភិបាលចំពោះទឹកជំនន់នៅភាគខាងត្បូងមិនបានល្អ ហើយបានសុំទោសដល់សហគមន៍ដែលរងផលប៉ះពាល់ ដោយនិយាយថា អាជ្ញាធរត្រូវតែ«ស្តាប់ រៀន និងកែតម្រូវនូវអ្វីដែលបានខុស» ខណៈដែលចំនួនអ្នកស្លាប់នៅតែបន្តកើនឡើង។ នេះបើយោងតាមការចុះផ្សាយរបស់ Khaosod។

ថ្លែងនៅក្នុងទីជម្រកបណ្តោះអាសន្នមួយនៅសាកលវិទ្យាល័យ Prince of Songkla ក្នុងក្រុងហាដយ៉ៃ លោកអានុទីន បានលើកឡើងថា រដ្ឋាភិបាលកំពុងពន្លឿនការកំណត់អត្តសញ្ញាណសាកសពជនរងគ្រោះជាជនជាតិម៉ូស្លីម និងបញ្ជូនពួកគេទៅកាន់ក្រុមគ្រួសារវិញ។ លោកបានបន្ថែមថា លោកត្រូវបានគេប្រាប់ថា ចំនួនសាកសពគឺ«មានជាង១០០នាក់» ហើយក្រុមជំនាញកោសល្យវិច្ច័យបន្ថែមទៀតកំពុងត្រូវបានដាក់ពង្រាយ។

នៅពេលត្រូវបានសួរអំពីការត្អូញត្អែរដោយកំហឹងពីអ្នករស់នៅអំឡុងពេលដំណើរទស្សនកិច្ចរបស់លោក លោកអានុទីន បានប្រាប់ថា អារម្មណ៍ខកចិត្តនេះអាចយល់បាន។ លោករៀបរាប់ថា «អ្នកណាក៏ខឹងដែរ។ នេះគឺជាភាពតានតឹង។ ខ្ញុំបានសុំទោសរួចហើយ។ ការនាំពលរដ្ឋចូលក្នុងទីជម្រកនេះគឺជាកំហុសមួយដែលបានកើតឡើងទៅហើយ។ យើងត្រូវតែធានាថាមិនមានអ្វីអាក្រក់ជាងនេះកើតឡើងនោះឡើយ»។

លោកអានុទីន បានបញ្ជាក់ទៀតថា លោកក៏មានការសោកសៅចំពោះអ្នកដែលបានបាត់បង់ផ្ទះសម្បែង និងសាច់ញាតិផងដែរ ដោយនិយាយថា «ខ្ញុំមានអារម្មណ៍តានតឹងនៅពេលឃើញប្រជាជនរងទុក្ខបែបនេះ។ ខ្ញុំរងទុក្ខមិនតិចជាងពួកគេទេ»។ លោកបន្តថា មូលនិធិសំណងសម្រាប់ជនរងគ្រោះដោយទឹកជំនន់ត្រូវតែចែកចាយនៅសប្តាហ៍ក្រោយ។

សូមជម្រាបថា ក្រសួងសុខាភិបាលសាធារណៈរបស់ប្រទេសថៃ បានបញ្ជូនថង់រុំសាកសពរាប់ពាន់ថង់ និងទូសម្រាប់ដាក់សពបន្ថែមទៀតទៅកាន់ក្រុងហាដយ៉ៃ ខណៈដែលចំនួនអ្នកស្លាប់ដោយសារទឹកជំនន់ធ្ងន់ធ្ងរនៅភាគខាងត្បូងបានកើនឡើងដល់១៤៥នាក់ គិតត្រឹមល្ងាចថ្ងៃសុក្រនេះ។ ក្រុមសង្គ្រោះបន្តប្រតិបត្តិការនៅទូទាំងតំបន់ ដោយសារតែកម្រិតទឹកជំនន់នៅតែខ្ពស់ បន្ទាប់ពីភ្លៀងធ្លាក់ខ្លាំងជាច្រើនថ្ងៃ។ អាជ្ញាធរបានព្រមានថា ចំនួនជនរងគ្រោះអាចកើនឡើងបន្ថែមទៀត នៅពេលដែលការស្វែងរកត្រូវបានពង្រីកចូលទៅក្នុងតំបន់ដាច់ស្រយាល៕