ព័ត៌មានអន្ដរជាតិ

ពាណិជ្ជកម្មវៀតណាម រំពឹងកើនដល់ ៩២០ ប៊ីលានដុល្លារ ឆ្នាំនេះ

បានផុស

៧ ខែ មុន

នៅ

ថ្ងៃចន្ទ ២២ ធ្នូ ២០២៥

ដោយ

វៀតណាមរំំពឹងថា ទំហំពាណិជ្ជកម្មសរុប ដែលរួមបញ្ជូលទាំងការនាំចេញ និងនាំចូលរបស់ខ្លួន នឹងកើនឡើងដល់ ៩២០ ប៊ីលានដុល្លារ នៅឆ្នាំនេះ ដែលធ្វើឱ្យវៀតណាមជាប់ចំណាត់ថ្នាក់ក្នុងចំណោមប្រទេសមានទំហំពាណិជ្ជកម្មធំបំផុតទាំង១៥លើពិភពលោក។ នេះបើតាមការចុះផ្សាយរបស់កាសែត VnExpress។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អនុរដ្ឋមន្ត្រីក្រសួងឧស្សាហកម្ម និងពាណិជ្ជកម្ម លោកស្រី Phan Thi Thang បានប្រកាសពីការព្យាករនេះ ក្នុងសន្និសីទមួយកាលពីថ្ងៃសុក្រ ដោយបន្ថែមថា ទំហំំនៃការនាំចេញ-នាំចូលសរុបរបស់វៀតណាមបានកើនឡើងដល់ ៨៨៣,៧ ប៊ីលានដុល្លារ គិតត្រឹមថ្ងៃទី ១៥ ខែធ្នូ។

ការនាំចេញរំពឹងថានឹងកើនឡើង ១៦% បើប្រៀបធៀបទៅនឹងឆ្នាំ ២០២៤ ដែលឈានដល់ប្រហែល ៤៧០ ប៊ីលានដុល្លារអាមេរិក។ វៀតណាមបានកត់ត្រាអតិរេកពាណិជ្ជកម្មរយៈពេល ១០ ឆ្នាំជាប់ៗគ្នាមកហើយ ចាប់តាំងពីឆ្នាំ ២០១៦ មក ដែលនេះជួយផ្តល់នូវលំហូរចូលរូបិយប័ណ្ណបរទេសជាប្រចាំ បន្ធូរបន្ថយសម្ពាធអត្រាប្តូរប្រាក់ និងជំរុញទុនបម្រុងប្តូរប្រាក់បរទេសជាតិ។

ទំហំំពាណិជ្ជកម្មរបស់វៀតណាម បានបង្ហាញពីកំណើនជាបន្តបន្ទាប់ក្នុងរយៈពេលប៉ុន្មានឆ្នាំចុងក្រោយនេះ ដោយគិតត្រឹមឆ្នាំ ២០០៩ វាមានត្រឹមតែ ១០០ ប៊ីលានដុល្លារ ប៉ុណ្ណេះ។ ចំនួនមុខទំនិញ ដែលតម្លៃនៃការនាំចេញលើស ១ ប៊ីលានដុល្លារ បានកើនឡើងពីត្រឹម ១០ មុខនៅឆ្នាំ ២០០៧ ដល់ ៣៦ មុខ នាពេលបច្ចុប្បន្ន។

ទោះជាយ៉ាងណាក៏ដោយ លោកស្រី Thang បានកត់សម្គាល់ថា ខណៈការនាំចេញកំពុងកើនឡើង វានៅតែមិនសូវមាននិរន្តរភាព ដោយការវិនិយោគផ្ទាល់ពីបរទេសនៅតែរួមចំណែកច្រើន។

លើសពីនេះ វៀតណាមនៅតែពឹងផ្អែកយ៉ាងខ្លាំងទៅលើទីផ្សារសំខាន់ៗមួយចំនួន ហើយប្រឈមមុខនឹងសម្ពាធពីការស៊ើបអង្កេតពាក់ព័ន្ធនឹងវិធានការការពារពាណិជ្ជកម្ម និងការក្លែងបន្លំប្រភពដើម។ ទន្ទឹមនឹងនេះ ការអភិវឌ្ឍទីផ្សារក្នុងស្រុក និងសកម្មភាពពាណិជ្ជកម្មអេឡិចត្រូនិកនៅតែមានកម្រិត៕