លោក ត្រាំ អះអាងថា អ៊ីរ៉ង់ «ចង់ចរចា»

ប្រធានាធិបតីអាមេរិក ដូណាល់ ត្រាំ កាលពីថ្ងៃទី១១ ខែមករា បានអះអាងថា មេដឹកនាំកំពូលអ៊ីរ៉ង់លោក Ayatollah Ali Khamenei បានស្នើសុំចរចា បន្ទាប់ពីការគំរាមកំហែងសកម្មភាពយោធារបស់លោកនៅក្នុងការតវ៉ាប្រឆាំងរដ្ឋាភិបាលទ្រង់ទ្រាយធំនៅក្នុងសាធារណរដ្ឋអ៊ីស្លាម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាម ndtv លោកត្រាំបានប្រាប់អ្នកយកព័ត៌មាននៅលើយន្តហោះ Air Force One កាលពីថ្ងៃអាទិត្យថា «ថ្នាក់ដឹកនាំអ៊ីរ៉ង់បានទូរស័ព្ទមកកាលពីម្សិលមិញ ដោយអំពាវនាវឲ្យមានការចរចា។ មេដឹកនាំរបស់ពួកគេប្រហែលជាចង់ចរចាមែនទែនហើយ! ខ្ញុំគិតថាពួកគេធុញទ្រាន់នឹងការដាក់សម្ពាធពីសហរដ្ឋអាមេរិកផងដែរ»។

ទោះជាយ៉ាងនេះក៏ដោយ ប្រធានាធិបតីត្រាំបានគូសបញ្ចាក់បន្ថែមថា សហរដ្ឋអាមេរិកទំនងជាត្រូវធ្វើសកម្មភាពមុនពេលកិច្ចប្រជុំកើតឡើង។

លោកត្រាំបានមានប្រសាសន៍ថា រដ្ឋបាលអាមេរិកកំពុងតាមដានការតវ៉ានៅក្នុងប្រទេសអ៊ីរ៉ង់ ហើយបន្តពិចារណាជម្រើសយោធាប្រឆាំងនឹងប្រទេសមួយនេះ ខណៈដែលចំនួនអ្នកតវ៉ាដែលបានសម្លាប់កំពុងកើនឡើងកាន់តែខ្លាំង។ ប្រធានាធិបតីថា យោធាកំពុងពិនិត្យមើលបញ្ហានេះនិងព័ត៌មានថ្មីៗជារៀងរាល់ម៉ោង ហើយឥឡូវ យើងកំពុងពិចារណាជម្រើសដ៏ខ្លាំងក្លាមួយចំនួនដើម្បីធ្វើការសម្រេចចិត្ត។

ឆ្លើយតបទៅនឹងសំណួរពីអ្នកកាសែតអំពីការសងសឹកទីលើមូលដ្ឋានយោធាអាមេរិក ដែលអាចកើតមានដោយអ៊ីរ៉ង់ ឬសម្ព័ន្ធមិត្តរបស់ខ្លួន លោកត្រាំបានចេញការព្រមានដោយត្រង់ៗ «ប្រសិនបើពួកគេធ្វើបែបនោះ យើងនឹងវាយប្រហារក្នុងកម្រិតដែលពួកគេមិនធ្លាប់ត្រូវបានវាយប្រហារពីមុនមក»។

គួររម្លឹកឡើងវិញថា ការតវ៉ាបានចាប់ផ្តើមកាលពីថ្ងៃទី ២៨ ខែធ្នូ ឆ្នាំ ២០២៥ ដោយសារតែអាជីវកម្មខ្នាតតូចមិនពេញចិត្តនឹងស្ថានភាពសេដ្ឋកិច្ច និងការធ្លាក់ចុះនៃប្រាក់រៀល (rial) បានរីករាលដាលនៅក្នុងរដ្ឋធានីតេហេរ៉ង់ និងទីក្រុងជាច្រើនទៀតរបស់អ៊ីរ៉ង់ក្នុងរយៈពេលប៉ុន្មានថ្ងៃថ្មីៗនេះ។

ប្រព័ន្ធផ្សព្វផ្សាយរដ្ឋអ៊ីរ៉ង់បាននិយាយថា ការតវ៉ាបានកើនឡើងដល់អំពើហិង្សា ដោយបណ្តាលឲ្យសមាជិកកងកម្លាំងសន្តិសុខយ៉ាងហោចណាស់ ១០៩ នាក់បានស្លាប់។ ចលនាសិទ្ធិមនុស្សអ៊ីរ៉ង់ (HRANA) ដែលជាក្រុមត្រួតពិនិត្យដែលមានមូលដ្ឋាននៅសហរដ្ឋអាមេរិក ប៉ាន់ប្រមាណថា មនុស្ស ៥៣៨ នាក់បានស្លាប់ នៅក្នុងរលកនៃការតវ៉ាបច្ចុប្បន្ន៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

អ្នកស្លាប់នៅ អ៊ីរ៉ង់ កើនជាង ៥០០ នាក់ ខណៈតេហេរ៉ង់ គំរាមវាយមូលដ្ឋានយោធា អាមេរិក