កីឡា

យ៉ុន ខេមរៈ លាមាត់លាកដោយកោសក់ក្រោយបន់ឲ្យឈប់បាញ់គ្នារវាងខ្មែរ-សៀម

បានផុស

៣ ខែ មុន

នៅ

ថ្ងៃចន្ទ ១៩ មករា ២០២៦

ដោយ

ដៃប៉ះសេរបស់ក្លឹបបាល់ទះស្នងការរាជធានីភ្នំពេញ កីឡាករ យ៉ុន ខេមរៈ ប្រាប់ថាជាការលាមាត់ក្រោយបន់ស្រន់ឲ្យឈប់មានការបាញ់គ្នារវងាកម្ពុជា និងសៀម អំឡុងការឈ្លានពាននេះរូបគេបានកោសក់បន្ទាប់ពីប្រទេសទាំងពីរចាប់ផ្ដើមមានសន្តិភាពឡើងវិញមែន។

កីឡាករ យ៉ុន ខេមរៈ

កីឡាករ យ៉ុន ខេមរៈ បានឲ្យដឹងថា សក់របស់ខ្លួនដែលទើបដុះបានបន្តិចៗនេះគឺបន្ទាប់ពីរូបគេបានលាមាត់វិញចំពោះការដែលបានបន់ស្រន់ឲ្យប្រទេសកម្ពុជាមានសន្តិភាពឡើងវិញ ឬឈប់បាញ់គ្នារវាងខ្មែ-សៀម ឡើងវិញដូចមុន។

អ្នកប៉ះសេដែលជួយឲ្យក្លឹបស្នងការរាជធានីភ្នំពេញឈ្នះការប្រកួតសប្បុរសធម៌រូបនេះបន្តទៀតថា ដោយឃើញពីរូបភាពលំបាកវេទនា ការខូចខាត និងការពលីយ៉ាងធ្ងន់ធ្ងរកន្លងទៅចំពោះការឈ្លានពានរយៈពេលខ្ទង់ ២០ថ្ងៃកន្លងទៅនេះ ខ្លួនបានបន់ស្រន់ឲ្យប្រទេសជាតិមានសុខសុវត្ថិភាព មានសន្តិភាពឡើងវិញ។ ជាមួយគ្នានោះដែរឪពុករបស់ខ្លួនក៏កំពុងនៅឈរតតាំងជួរមុខជាមួយសៀមផងដែរអំឡុងពេលនេះសង្គ្រាមនេះ ដូច្នេះអ្វីដែលខ្លួនបានបន់ស្រន់ក៏មានជាបទឈប់បាញ់ និងចាប់ផ្ដើមមានសភាពធូរស្រាលឡើងវិញនេះទើបរូបគេបានកោសក់ជាការលាមាត់តែម្ដង។

បញ្ជាក់ដែរថា យ៉ុន ខេមរៈ ជាកីឡាករនៃក្លឹបបាល់ទះស្នងការរាជធានីភ្នំពេញ និងបានជួយឲ្យក្រុមឈ្នះការប្រកួតសប្បុរសធម៌ក្នុងការរៃអង្គាសថវិកាជួយដល់វីរកងទ័ព វីរកងកម្លាំងនគរបាលជាតិ រួមទាំងជនភៀសសឹកដែលកំពុងជួបការលំបាកអំឡុងការឈ្លានពានពីសំណាក់ប្រទេសសៀម។ ការប្រកួតសប្បុរសធម៌នេះដែលរៀបចំឡើងដោយសហព័ន្ធបាល់ទះកម្ពុជាជាមួយក្រុមហ៊ុន WURKZ បានប្រមូលថវិកាសរុប ១២៧,៨៧៥,០០០ រៀល កាលពីថ្ងៃទី១៧ ខែមករា ឆ្នាំ២០២៦ នៅវិមានពហុកីឡដ្ឋានជាតិ។ ក្រុមបាល់ទះស្នងការរាជធានីភ្នំពេញបានយកឈ្នះលើក្រសួងមហាផ្ទៃ ដោយលទ្ធផល ៣-២ សិតនៅវគ្គផ្ដាច់ព្រ័ត្រនោះ៕

អត្ថបទដោយ៖ នួន ស៊ីណា

Related Topics:សហព័ន្ធកីឡាបាល់ទះកម្ពុជា យ៉ុន ខេមរៈ