ដាណឺម៉ាក ផ្ដាំអាមេរិកកុំឆ្លងដល់ «បន្ទាត់ក្រហម» Greenland ទោះមានសិទ្ធិក៏ដោយ

នាយករដ្ឋមន្ត្រីដាណឺម៉ាក Mette Frederiksen បានប្រកាសកាលពីថ្ងៃទី២២ ខែមករាថា លោកស្រីត្រៀមខ្លួនរួចជាស្រេចដើម្បីពិភាក្សាអំពីសន្តិសុខនៅក្នុងតំបន់អាកទិកជាមួយអាមេរិក និងសម្ព័ន្ធមិត្តណាតូ ប៉ុន្តែមាន «ខ្សែបន្ទាត់ក្រហម» ដែលមិនអនុញ្ញាតឲ្យភាគីណាមួយឆ្លងកាត់ដាច់ខាត បន្ទាប់ពីលោកត្រាំអះអាងមានសិទ្ធិចូលប្រើប្រាស់ទាំងស្រុងទៅកាន់ទឹកដីនេះក្រោមក្របខ័ណ្ឌដែលបានព្រមព្រៀងជាមួយណាតូ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងនៅក្នុងកិច្ចប្រជុំកំពូលបន្ទាន់របស់សហភាពអឺរ៉ុប (EU) លោកស្រី Frederiksen បាននិយាយថា សមាជិកណាតូស្ទើរតែទាំងអស់បានយល់ព្រមដាក់ពង្រាយកងទ័ព ដើម្បីធានាសន្តិសុខនៅក្នុងតំបន់អាកទិក រួមទាំង Greenland ផងដែរ។ ជាការពិតណាស់ យើងអាចពិភាក្សាជាមួយអាមេរិកអំពីរបៀបពង្រឹងកិច្ចសហប្រតិបត្តិការសន្តិសុខនៅក្នុងតំបន់នេះ ដោយសង្កត់ធ្ងន់ថា កិច្ចព្រមព្រៀងការពារជាតិរវាងទីក្រុង Copenhagen និងទីក្រុងវ៉ាស៊ីនតោនបានចូលជាធរមានតាំងពីឆ្នាំ ១៩៥១។

ពីទស្សនៈផ្លូវច្បាប់អន្តរជាតិ Greenland បច្ចុប្បន្នគឺជាទឹកដីស្វយ័តដែលជាកម្មសិទ្ធិរបស់ព្រះរាជាណាចក្រដាណឺម៉ាក។ ដូច្នេះ លោកស្រី Frederiksen ចាត់ទុកការការពារកោះថា ជាការការពារអធិបតេយ្យភាពជាតិ និងជាខ្សែបន្ទាត់ក្រហម ដែលមិនអាចចរចាបានក្នុងក្របខ័ណ្ឌសហប្រតិបត្តិការណាមួយឡើយ។

លោកស្រីក៏បានអំពាវនាវដល់សម្ព័ន្ធមិត្តសហភាពអឺរ៉ុបឲ្យរួបរួមគ្នា ដោយលើកឡើង «នៅពេលដែលអឺរ៉ុបមិនត្រូវបានបែងចែក នៅពេលដែលយើងឈរជាមួយគ្នា និងបង្ហាញពីភាពច្បាស់លាស់ និងភាពរឹងមាំក្នុងការប្តេជ្ញាចិត្តរបស់យើងក្នុងការការពារខ្លួនយើង លទ្ធផលនឹងបង្ហាញឲ្យឃើញដោយខ្លួនឯង»។

ដោយឡែក នាយករដ្ឋមន្ត្រី Greenland លោក Jens-Frederik Nielsen បានថ្លែងទៅកាន់អ្នកយកព័ត៌មាននៅរដ្ឋធានី Nuuk ថា ខ្លួននៅតែមិនទាន់ដឹងច្បាស់អំពីទិដ្ឋភាពជាច្រើននៃកិច្ចព្រមព្រៀង ដែលសម្រេចបានមួយថ្ងៃមុននេះ ក្នុងអំឡុងពេលចរចារវាងលោកត្រាំ និងលោក Mark Rutte ឡើយ។ ដូច្នេះ លោកគ្រាន់តែត្រៀមខ្លួនរួចជាស្រេចដើម្បីចរចាភាពជាដៃគូកាន់តែប្រសើរឡើងជាដើម។ ប៉ុន្តែក៏មិនភ្លេចអះអាងថា «អធិបតេយ្យភាពគឺជាខ្សែបន្ទាត់ក្រហម» ។

កាលពីថ្ងៃព្រហស្បតិ៍ លោកត្រាំបាននិយាយនៅក្នុងបទសម្ភាសន៍ជាមួយ Fox Business Network នៅខាងក្រៅវេទិកាសេដ្ឋកិច្ចពិភពលោក (WEF) ក្នុងទីក្រុង Davos ប្រទេសស្វីសថា ក្របខ័ណ្ឌសម្រាប់កិច្ចព្រមព្រៀងនាពេលអនាគតដែលពាក់ព័ន្ធនឹង Greenland និងតំបន់អាកទិកដ៏ធំទូលាយនឹងផ្តល់ឲ្យសហរដ្ឋអាមេរិកនូវ «សិទ្ធិចូលប្រើប្រាស់ទាំងស្រុង គ្មានទីបញ្ចប់ គ្មានដែនកំណត់ពេលវេលាឡើយ»៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

ទីក្រុងប៉េកាំង ប្រឆាំងកិច្ចព្រមព្រៀង Greenland រវាងអាមេរិក និងណាតូ ដែលប្រើចិនជាលេស «អាត្មានិយម»