សេដ្ឋកិច្ច

វិស័យទេសចរណ៍កម្ពុជា ទាក់ទាញទុនវិនិយោគជាង ៧០០ លានដុល្លារ

បានផុស

៥ ខែ មុន

នៅ

ថ្ងៃអង្គារ ៣ កុម្ភៈ ២០២៦

ដោយ

វិស័យទេសចរណ៍កម្ពុជាសម្រេចបានការទាក់ទាញគម្រោងវិនិយោគចំនួន ៤៧ គម្រោង ដែលមានទំហំទុនវិនិយោគ ៧០៨ លានដុល្លារ និងបង្កើតការងារបានចំនួន ៥ ១៨៦ កន្លែង នៅក្នុងឆ្នាំ ២០២៥។ នេះបើយោងតាមរបាយការណ៍របស់ក្រសួងទេសចរណ៍ចេញផ្សាយនៅថ្ងៃទី ០៣ ខែមករា ឆ្នាំ ២០២៦។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

របាយការណ៍ដដែលបង្ហាញថា ក្នុងចំណោមគម្រោងវិនិយោគទាំង ៤៧ មានគម្រោងចំនួន ៤ ដែលមានទុនវិនិយោគ ១៧៥ លានដុល្លារ អនុម័តដោយក្រុមប្រឹក្សាអភិវឌ្ឍន៍កម្ពុជា ចំណែកឯគម្រោងចំនួន ៣៨ មានទុន ៥០៦ លានដុល្លារ អនុម័តដោយក្រុមការងារវិនិយោគខេត្តព្រះសីហនុ និងគម្រោងចំនួន ៥ មានទុនវិនិយោគ ២៧ លាន អនុម័តដោយក្រុមការងារជំរុញការវិនិយោគ ក្នុងខេត្តភូមិភាគឦសាន។

លោក នី ផល្លី រដ្ឋលេខាធិការក្រសួងទេសចរណ៍ មានប្រសាសន៍ថា ក្រោយការពង្រឹងនូវការដាក់ចេញយុទ្ធសាស្ត្ររបស់រដ្ឋាភិបាល មានគម្រោងវិនិយោគជាច្រើនកើតឡើង មានទាំងខ្នាតតូច ធំ និងខ្នាតមធ្យម។

លោក នី ផល្លី បន្ថែមថា៖ «ក្នុងនោះបងប្អូនរបស់យើងមួយចំនួន មានការប្រើប្រាស់ទុនក្នុងស្រុក ហើយមួយចំនួនទៀតក៏ចាប់ផ្ដើមចាប់យកដៃគូបរទេស»។ វិស័យទេសចរណ៍កម្ពុជាមានកំណើនវិជ្ជមានទាំងបរិមាណ និងគុណភាព ដែលមានការវិនិយោគលើទេសចរណ៍បែបគុណភាព កម្រិតបង្គួរ ឬកម្រិតខ្ពស់។

លោក នី ផល្លី បញ្ជាក់ថា ការវិនិយោគនៅក្នុងវិស័យទេសចណ៍កាលពីដើមឆ្នាំ ២០២៥ មានកំណើនខ្ពស់ ដោយលោកបានលើកឧទារហណ៍ពីកម្មវិធីពិសេសនៅខេត្តព្រះសីហនុ មានទុនសរុបជាង ១ ពាន់លានដុល្លារ ចាក់បញ្ចូលទៅក្នុងវិស័យទេសចរណ៍ ដែលកំពុងដំណើរការ។

ក្រុមប្រឹក្សាអភិវឌ្ឍន៍កម្ពុជា នៅក្នុងឆ្នាំ ២០២៥ បានអនុម័តគម្រោងវិនិយោគចំនួន ៦៣០ គម្រោង កើនឡើង ៥២% ដែលមានទំហំទុនវិនិយោគ ១០ ពាន់លានដុល្លារ កើន ៤៥% ធៀបនឹងឆ្នាំ ២០២៤ និងអាចបង្កើតការងារ ៤៣៨ ពាន់កន្លែង៕

អត្ថបទ៖ ឡេង ដេត