ឆ្លងចរន្តអគ្គិសនីឆេះផ្ទះគ្រូ មើលជំងឺបែបបុរាណផ្អើលសមត្ថកិច្ចចេញរថយន្តពន្លត់អគ្គិភ័យអន្តរាគមន៍

ផ្ទះប្រជាពលរដ្ឋមួយល្វែងត្រូវបានអគ្គិភ័យឆាបឆេះយ៉ាងសន្ធោសន្ធៅ​ បង្កការភ្ញាក់ដល់ ពលរដ្ឋនាំគ្នាជួយបាញ់ទឹកពន្លត់​ និងរាយការណ៍ទៅក្រុមជំនាញបង្ការនិងពន្លត់អគ្គិភ័យមកចុះអន្តរាគមន៍ភ្លាមៗ​ ហេតុការណ៍នេះកើតឡើងកាលពីវេលាម៉ោង១០និង៣០នាទីព្រឹក​ ថ្ងៃទី១០​ ខែកុម្ភះ​ ឆ្នាំ​២០២៦​ នៅចំណុចបុរីខេភីម៉នដានី ផ្ទះលេខ១៦ ផ្លូវបេតុង ភូមិត្រពាំងធ្នង់ សង្កាត់សង្កាត់សំរោងក្រោម​ ខណ្ឌពោធិ៍សែនជ័យ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ម្ចាស់ទីតាំង: ម៉ូវ សេងអ៊ីន ភេទស្រី អាយុ៥២ឆ្នាំ ជនជាតិខ្មែរ មុខរបរ:គ្រូមើលជំងឺបែបបុរាណ​ ផ្ទះដែលត្រូវអគ្គិភ័យឆាបឆេះនោះប្រភេទថ្មបេតុង ទំហំ ៨ម៉ែត្រx១៥ម៉ែត្រ ។

តាមប្រភពព័ត៌មានបានឱ្យដឹងថា​ មុនពេលកើតហេតុគេបានឃើញផ្សែងហុយចេញ ពីបន្ទប់ជាន់ទី១​ ខ្មួរខ្មាញ់ភ្លាម នោះអ្នកជិតខាងក៏បាននាំគ្នាទាញទុយោមកបាញ់ទឹកពន្លត់​ និងបានរាយការណ៍ទៅសមត្ថកិច្ចមូលដ្ឋានទាក់ទងទៅក្រុមរថយន្តពន្លត់អគ្គិភ័យមកអន្តរាគមន៍។ ក្រោយពីទទួលបានព័ត៌មានភ្លាមរថយន្តពន្លត់អគ្គិភ័យរបស់ស្នងការដ្ឋាននគរបាលរាធានីភ្នំពេញចេញអន្តរាគមន៍ភ្លាមៗ។

ជុំវិញគ្រោះអគ្គិភ័យខាងលើនេះផងដែរ​ បណ្ដាលខូចខាតសម្ភារៈ ឆេះបន្ទប់ជាន់ទី១ចំនួន ២បន្ទប់អស់ទាំងស្រុង រួមមានម៉ាស៊ីនត្រជាក់ចំនួន ០២គ្រឿងគ្រែចំនួន២ និងសម្ភារៈប្រើប្រាស់មួយចំនួនទៀត​នឹងពុំបណ្ដាលឱ្យឆេះរាលដាលដល់អ្នកក្បែរខាងឡើយ។ ដោយប្រើប្រាស់រថយន្តការិយាល័យ​ អគ្គិភ័យ : ចំនួន ០២ គ្រឿង ប្រើប្រាស់ទឹកអស់ចំនួន ០៣ឡាន ស្មើនឹង  ១៨ម៉ែត្រគូប។ រថយន្តពន្លត់អគ្គិភ័យ៩១១ចំនួន ០២ គ្រឿង ប្រើប្រាស់ទឹកអស់ចំនួន ០១ឡាន ស្មើនឹង ០៦ម៉ែត្រគូប ទើបគ្រប់គ្រងបានរលត់ទៅវិញ៕ អត្ថបទ ៖សុខា