អភិបាលខណ្ឌឫស្សីកែវ ចុះពិនិត្យសន្តិសុខតាមដងទន្លេសាប និង ឧបត្ថម្ភស៊ីម៉ង់ ២០ តោន ជួសជុលអតីតវិហារគីឡូម៉ែត្រលេខ៩

កម្លាំងចម្រុះគណៈបញ្ជាការឯកភាពរដ្ឋបាលខណ្ឌឫស្សីកែវ បានរចុះរដ្ឋបាលតាមផ្ទៃទឹក ដើម្បីពិនិត្យ និង ពង្រឹងការងារសន្តិសុខ សណ្ដាប់ធ្នាប់ និង របៀបរៀបរយសាធារណៈតាមបណ្តោយច្រាំងទន្លេ ស្ថិតក្នុងភូមិសាស្ត្រខណ្ឌឫស្សីកែវ កាលពីរសៀលថ្ងៃទី១៦ ខែកុម្ភៈ ឆ្នាំ២០២៦។

ប្រតិបត្តិការនេះ ដឹកនាំដោយលោក ជិន ប៊ុនធឿន អភិបាលខណ្ឌឫស្សីកែវ និងជាប្រធានគណៈបញ្ជាការឯកភាពខណ្ឌ ដោយមានការចូលរួមពីកម្លាំងអធិការដ្ឋាននគរបាលខណ្ឌ កម្លាំងប៉ុស្តិ៍នគរបាលរដ្ឋបាល និងកម្លាំងប្រជាការពារភូមិ។

យោងតាមការបញ្ជាក់ពីរដ្ឋបាលខណ្ឌ ក្នុងចំណោមសង្កាត់ទាំង៧ នៃខណ្ឌឫស្សីកែវ មានសង្កាត់ចំនួន៦ ដែលមានភូមិសាស្ត្រជាប់នឹងដងទន្លេសាប។ ដោយសារភាពពិសេសនៃទីតាំងភូមិសាស្ត្រនេះ អាជ្ញាធរមូលដ្ឋានបានយកចិត្តទុកដាក់ខ្ពស់លើការគ្រប់គ្រងសំណង់ និងសកម្មភាពនានាតាមច្រាំងទន្លេ ជាពិសេសការសាងសង់សំណង់ខុសច្បាប់ ឬរំលោភយកដីចំណីទន្លេ ដែលអាចប៉ះពាល់ដល់បរិស្ថាន សោភ័ណភាព និងសុវត្ថិភាពសាធារណៈ។

ក្នុងឱកាសចុះពិនិត្យការងារនោះ លោកអភិបាលខណ្ឌបានធ្វើការណែនាំដល់កម្លាំងមានសមត្ថកិច្ចគ្រប់លំដាប់ថ្នាក់ ត្រូវបន្តពង្រឹងការងារសន្តិសុខ សណ្ដាប់ធ្នាប់ និងរៀបចំការល្បាតតាមដងទន្លេឲ្យបានទៀងទាត់ និងមានប្រសិទ្ធភាព។ គោលបំណងសំខាន់ គឺដើម្បីទប់ស្កាត់ និងបង្ក្រាបឲ្យបានទាន់ពេលវេលា នូវភាពអសកម្ម ឬបទល្មើសផ្សេងៗដែលអាចកើតមានជាយថាហេតុ។

ជាមួយគ្នានេះផងដែរ ក្នុងនាមអាជ្ញាធរមូលដ្ឋាន លោក ជិន ប៊ុនធឿន ក៏បានចូលរួមឧបត្ថម្ភស៊ីម៉ង់ចំនួន ២០ តោន សម្រាប់រៀបចំជួសជុល និងកែលម្អអតីតវិហារគីឡូម៉ែត្រលេខ៩ ដើម្បីលើកកម្ពស់សោភ័ណភាព និងបម្រើតម្រូវការសហគមន៍ក្នុងតំបន់៕ អត្ថបទ៖ សំណាង