៦០ខេត្តនៅថៃ នឹងជួបព្យុះខែប្រាំង ដ៏ធ្ងន់ធ្ងរ ចាប់ពីដើមសប្តាហ៍នេះ

នាយកដ្ឋានឧតុនិយមថៃ បានចេញការព្រមានថា ខេត្តចំនួន៦០ពោលគឺសឹងតែទូទាំងប្រទេសទៅហើយ ដែលនឹងត្រូវវាយប្រហារដោយព្យុះខែប្រាំងយ៉ាងធ្ងន់ធ្ងរ ចាប់ពីដើមសប្តាហ៍នេះទៅ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការផ្សាយរបស់ The Nation ដែលដកស្រង់សេចក្តីប្រកាសរបស់នាយកដ្ឋានកាលពីថ្ងៃអាទិត្យទី២២ខែកុម្ភៈ, តំបន់ដែលនឹងរងគ្រោះធ្ងន់ធ្ងរជាងគេគឺភាគឦសាន កណ្តាល និងទីក្រុងបាងកក។

នៅភាគឦសាន ខេត្តទាំងអស់នឹងត្រូវរងគ្រោះ ចំណែកភាគកណ្តាល ព្យុះក៏នឹងវាយប្រហារគ្រប់ខេត្តផងដែរ លើកលែងតែ Phetchaburi និង Prachuap Khiri Khan ប៉ុណ្ណោះ។

តំបន់ខាងលើនឹងជួបប្រទះភ្លៀងធ្លាក់យ៉ាងគំហុក ខ្យល់បក់ខ្លាំងលាយឡំខ្យល់កន្ត្រាក់ ព្រមទាំងបាតុភូតធម្មជាតិដ៏គ្រោះថ្នាក់ផ្សេងៗ ចាប់ពីថ្ងៃចន្ទទៅ។

ដោយសារស្ថានការណ៍មើលទៅហាក់ធ្ងន់ធ្ងរ នាយកដ្ឋានបានព្រមានអំពីគ្រោះថ្នាក់ និងត្រៀមប្រកាសអាសន្ននៅតំបន់ណា ដែលអាចកើតរឿងអាក្រក់។

ពាក់ព័ន្ធរឿងខែប្រាំងនេះដែរ បញ្ជាការដ្ឋានបង្ការ និងកាត់បន្ថយគ្រោះមហន្តរាយជាតិថៃ (NDPMC) ក៏បានបង្គាប់រួចហើយផងដែរ​ឲ្យ​បណ្តាខេត្តទាំងអស់ក្នុងប្រទេស ត្រូវបង្កើនការត្រៀមលក្ខណៈសម្រាប់គ្រោះរាំងស្ងួតឆ្នាំ២០២៦ ដោយផ្តល់អាទិភាពខ្ពស់លើការបម្រុងទឹកសម្រាប់ប្រើប្រាស់ក្នុងគ្រួសារ។

ថៃព្រមានថា ស្ថានភាពស្ងួតហួតហែងចាប់ពីពាក់កណ្តាលខែមករាដល់ពាក់កណ្តាលខែឧសភា អាចបង្ក​ឲ្យ​មានការខ្វះខាតទឹកយ៉ាងធ្ងន់ធ្ងរ ជាពិសេសប៉ះពាល់ដល់វិស័យកសិកម្មនៅក្រៅតំបន់ស្រោចស្រព និងការផលិតទឹកស្អាត៕

អត្ថបទ៖ សុខ សុវណ្ណ