ព័ត៌មានជាតិ

សម្ដេចធិបតីថាកម្ពុជាអាចផ្ដល់ជំនួយបច្ចេកទេសតាមលទ្ធភាពលើការស្ដារតំបន់ហ្កាហ្សាក្នុងនាមជាសមាជិកក្រុមប្រឹក្សាសន្តិភាព

បានផុស

៥ ខែ មុន

នៅ

ថ្ងៃសុក្រ ២៧ កុម្ភៈ ២០២៦

ដោយ

នាយករដ្ឋមន្ត្រីកម្ពុជា សម្ដេចធិបតី ហ៊ុន ម៉ាណែត បានប្រាប់ AFP ថាកម្ពុជាអាចផ្ដល់ជាជំនួយបច្ចេកទេសតាមអ្វីដែលខ្លួនអាចធ្វើបានទៅតំបន់ហ្កាហ្សា ដូចជាការបណ្ដុះបណ្ដាលការដោះមីនជាដើម ជំនួសឱ្យការបង់ជាលុយដើម្បីរក្សាសមាជិកភាព។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ AFP កាលពីថ្ងៃទី២៦ ខែកុម្ភៈ សម្ដេចធិបតី ហ៊ុន ម៉ាណែត មានប្រសាសន៍ថាការប្ដេជ្ញាចិត្តរបស់មេដឹកនាំអាមេរិកក្នុងការស្វែងរកបទឈប់បាញ់ឱ្យកម្ពុជា និងថៃគឺជាមូលហេតុចម្បងមួយដែលកម្ពុជាសម្រេចចិត្តចូលរួមក្នុងក្រុមប្រឹក្សាសន្តិភាព ដោយមានជំនឿថាស្ថាប័នថ្មីនេះនឹងជួយជំរុញសន្តិភាពក្នុងពិភពលោក។

AFP បានផ្សាយថា៖ «នេះគឺអំពីសន្តិភាព និងស្ថិរភាព។ លោកបន្ថែមថា ប្រទេសរបស់លោកនឹងស្វែងរកការផ្ដល់ដើម្បីឱ្យអាចរក្សាសមាជិកភាពក្នុងក្រុមប្រឹក្សាសន្តិភាពដោយផ្ដល់ជាជំនួយក្នុងការបណ្ដុះបណ្ដាលការដោះមីនក្នុងតំបន់ហ្កាហ្សាសម្រាប់ជាឧទាហរណ៍ ជាជាងចំណាយប្រាក់១ពាន់លានដុល្លារ ដូចដែលបានស្នើសុំដោយទីក្រុងវ៉ាស៊ីនតោនសម្រាប់សមាជិកអចិន្ត្រៃយ៍»។

អ្នកតាមដានភូមិសាស្ត្រនយោបាយលោកបណ្ឌិត ជ័យ តិច មានប្រសាសន៍ថាការផ្ដល់ជំនួយបច្ចេកទេសទាំងនេះគឺអាចធ្វើបាន ហើយកម្ពុជាអាចផ្ដល់បានលើសពីការបណ្ដុះបណ្ដាលការដោះមីនថែមទៀត។ លោកថា តាមរយៈការបទពិសោធន៍កន្លងទៅនៃការបញ្ជូនកងកម្លាំងស្ម័គ្រចិត្តទៅចូលរួមក្រោមឆត្រអង្គការសហប្រជាជាតិ នឹងធ្វើឱ្យកម្ពុជាក៏អាចចូលរួមជួយក្នុងក្រុមប្រឹក្សាសន្តិភាពនេះបានកាន់តែច្រើន។

លោកថា៖ «ដូចគ្នា! ដែលកម្ពុជាអាចបញ្ជូនកងកម្លាំងរក្សាសន្ដិភាពនេះទៅតំបន់ហ្កាហ្សាជាជាងផ្ដល់ថវិកាជាសមាជិកភាព១ពាន់លានដុល្លារដែលកម្ពុជាជាប្រទេសមានសេដ្ឋកិច្ចតូចមែនទែនទៅកំពុងអភិវឌ្ឍន៍នៅឡើយយើងមិនមានលទ្ធភាពផ្ដល់នូវហិរញ្ញវត្ថុដ៏ច្រើនសម្បើមនេះទេ។ ជំនួសមកវិញគឺយើងបានផ្ដល់នូវអ្វីដែលយើងមានសក្ដានុពល នូវចំណេះ ជំនាញបច្ចេកទេស ធនធានដែលយើងមានដើម្បីរួមចំណែករក្សាសន្តិភាព និងការកសាងតំបន់ហ្កាហ្សាឡើងវិញនេះ»។

លោកបន្ថែមថា ការប្ដេជ្ញារបស់កម្ពុជាក្នុងក្រុមប្រឹក្សាសន្តិភាពបានបង្ហាញពីទឹកចិត្តស្រលាញ់សន្តិភាពរបស់កម្ពុជា ដែលជាសារជំរុញទៅអន្តរជាតិ និងក្រុមប្រឹក្សានេះឱ្យជួយសម្របសម្រួលឱ្យមានដំណោះស្រាយព្រំដែនកម្ពុជា-ថៃ បង្កើតឱ្យមានព្រំដែនសន្តិភាពរវាងប្រទេសទាំងពីរ។

គួរឱ្យដឹងដែរថាកម្ពុជាបានសម្រេចចូលរួមក្នុងក្រុមប្រឹក្សាសន្ដិភាពដែលដឹកនាំដោយប្រធានាធិបតី ដូណាល់ ត្រាំ កាលពីខែមករាកន្លងទៅ។ ក្នុងសារបង្ហោះលើបណ្ដាញសង្គមកាលពីថ្ងៃទី២៧ ខែមករា សម្ដេចធិបតី ហ៊ុន ម៉ាណែត បានបញ្ជាក់ថាការចូលរួមជាងសមាជិកស្ថាបនិកនៃក្រុមប្រឹក្សាសន្ដិភាព សម្រាប់អាណត្តិ ៣ឆ្នាំមិនតម្រូវឱ្យបង់ថវិកាណាមួយឡើយ៕