ស្ថានភាពជំងឺ នាយក្រិន នៅតែស្ថិតក្នុងដំណាក់កាលគួរឱ្យព្រួយបារម្ភ ខណៈគ្រូពេទ្យកំពុងយកចិត្តទុកដាក់ព្យាបាល

ស្ថានភាពជំងឺ នាយក្រិន កំពុងស្ថិតក្នុងដំណាក់កាលគួរឱ្យព្រួយបារម្ភ ហើយត្រូវការការថែទាំយ៉ាងជិតស្និទ្ធពីគ្រូពេទ្យ ដោយសារមេរោគបានចូលដល់ស្រោមខួរហេីយ ខណៈលោកមិនចាំអ្វីទាំងអស់នៅពេលនេះ។

នៅព្រឹកថ្ងៃទី១២ ខែមីនា ២០២៦ តាមរយៈសារពីទំព័រហ្វេសប៊ុកលោក សាវិន ហ្វីលីព បានរាយការណ៍ពីស្ថានភាពជំងឺរបស់នាយក្រិន ដែលកំពុងស្ថិតក្នុងសភាពគួរឱ្យព្រួយបារម្ភ។ លោកថា “ក្រុមគ្រូពេទ្យនៅមន្ទីរពេទ្យកាល់ម៉ែត្រ ទេីបប្រាប់ប្រិមប្រិយ ព្រឹកនេះថា មេរោគបានចូលដល់ស្រោមខួររបស់នាយក្រិនហេីយ គាត់មិនចាំអ្វីទាំងអស់ពេលនេះ”។

សភាពជំងឺរបស់នាយក្រិន ធ្វើឱ្យសាធារណជន ពិសេសមិត្តរួមអាជីពជាច្រើនបង្ហាញក្តីព្រួយបារម្ភ រួមនិងផ្ញើសារលើកទឹកចិត្តសមាជិកគ្រួសារលោកផងដែរ ខណៈដែលសុទ្ធសឹងជាវ័យកុមារនៅឡើយ។ លើសពីនេះ ដោយក្តីអាណិតអាសូរ សប្បុរសជនមួយចំនួនក៏បានចូលរួមឧបត្ថម្ភគាំទ្រថ្លៃព្យាបាលដល់នាយផងដែរ។

បច្ចុប្បន្ន មហាជនជាច្រើនកំពុងរង់ចាំព័ត៌មានបន្ថែមអំពីស្ថានភាពសុខភាពរបស់តារាកំប្លែង នាយក្រិន។ ខណៈពេលដែលការព្យាបាលកំពុងបន្ត មិត្តសិល្បករ និងអ្នកគាំទ្រជាច្រើននៅតែបន្តលើកទឹកចិត្ត និងជូនពរឱ្យលោកមានកម្លាំងចិត្ត និងកម្លាំងកាយ ដើម្បីឆ្លងកាត់ដំណាក់កាលលំបាកនេះ និងត្រឡប់មកផ្តល់សំណើចដល់សង្គមវិញ។

នាយក្រិន ជាតារាកំប្លែងមួយរូបដែលមានឈ្មោះល្បីក្នុងវិស័យសិល្បៈកំប្លែងខ្មែរ ក្រោមការដឹកនាំក្រុមរបស់នាយកុយ។ ក្នុងអាជីពសិល្បៈរយៈពេលជាច្រើនឆ្នាំ លោកបានចូលរួមសម្ដែងក្នុងកម្មវិធីកំប្លែងជាច្រើន និងបានបង្កើតស្នាដៃជាច្រើនដែលធ្វើឱ្យទស្សនិកជនសើចសប្បាយ។

តាមរយៈការសម្ដែង និងការប្រើប្រាស់ភាសាកំប្លែងដ៏មានទេពកោសល្យ នាយក្រិន បានក្លាយជាតារាកំប្លែងដែលទទួលបានការគាំទ្រយ៉ាងខ្លាំងពីសំណាក់ទស្សនិកជនគ្រប់វ័យ។ ឯការសម្ដែងរបស់លោកមិនត្រឹមតែផ្តល់ភាពសប្បាយរីករាយប៉ុណ្ណោះទេ ប៉ុន្តែថែមទាំងបង្ហាញពីជីវិតប្រចាំថ្ងៃ និងបញ្ហាសង្គមមួយចំនួនក្នុងទម្រង់កំប្លែងផងដែរ៕