កីឡា

លោក Koji ប្តេជ្ញានាំ ក្រុមកម្ពុជា ឆ្លងឲ្យផុតវគ្គក្នុងពូលពានអាស៊ាន ឆ្នាំនេះ

បានផុស

៤ សប្តាហ៍ មុន

នៅ

ថ្ងៃសៅរ៍ ២៨ មីនា ២០២៦

ដោយ

គ្រូបង្វឹកក្រុមបាល់ទាត់ជម្រើសជាតិកម្ពុជា លោក Koji Gyotoku ដាក់គោលឡើងដល់វគ្គពាក់កណ្តាលផ្តាច់ព្រ័ត្រ ពានរង្វាន់ ASEAN Hyundai Cup ឆ្នាំ ២០២៦ ដែលនឹងចាប់ផ្តើមនៅខែកក្កដា និងសីហា។

គ្រូបង្គោលសញ្ជាតិជប៉ុនវ័យ ៦១ ឆ្នាំ បានប្រាប់សារព័ត៌មាន aseanutdfc ថា ៖«ការប្រកួតជើងឯកអាស៊ានចុងក្រោយ ខ្ញុំដឹកនាំប្រកួតក្នុងដីដោយស្មើ ម៉ាឡេស៊ី ២-២ និងឈ្នះ ទីម័រខាងកើត ២-១ ហើយពួកយើងពិតជាធ្វើបានល្អ»។

លោកបានបន្តថា ៖«នៅក្រៅដី យើងចាញ់ សិង្ហបុរី (១-២) ហើយក៏ចាញ់ ថៃ (១-២) តែយើងលេងទល់នឹងថៃ គឺកីឡាករយើងធ្វើបានល្អ ដោយធ្វើឲ្យម្ចាស់ផ្ទះថៃជួបការលំបាកខ្លាំង»។

«សម្រាប់លើកនេះ កីឡាករមានការប្រែប្រួល កីឡាករខ្លះថ្មី ហើយខ្ញុំនឹងព្យាយាមបង្កើតប្រព័ន្ធថ្មីមួយ។ យើងនឹងព្យាយាមឲ្យអស់ពីលទ្ធភាព ហើយយើងចង់ឡើងទៅកាន់វគ្គពាក់កណ្តាលផ្តាច់ព្រ័ត្រ»។ លោក Gyotoku ដែលធ្វើការនៅកម្ពុជាតាំងពីឆ្នាំ ២០១៩ បានបញ្ជាក់។

កម្ពុជាស្ថិតនៅពូល A ដែលប៉ះដៃគូសុទ្ធតែខ្លាំងៗមានដូចជា វៀតណាម សិង្ហបុរី ឥណ្ឌូណេស៊ី និងក្រុមជម្រុះឋបមរវាង ព្រុយណេ ឬ ទីម័រខាងកើត។ ស្ថិតនៅក្នុងពូលនេះមហាជនមើលឃើញថា ពិតជាពិបាកខ្លាំងសម្រាប់កម្ពុជាក្នុងការស្វែងរកផ្លូវទៅកាន់វគ្គពាក់កណ្តាលផ្តាច់ព្រ័ត្រជាលើកដំបូងក្នុងប្រវត្តិសាស្ត្ររបស់ខ្លួន។

ការប្រកួតវគ្គសន្សំពិន្ទុក្នុងពូល កម្ពុជា បើកឆាកទទួលម្ចាស់ជើងឯក ៤ សម័យកាល គឺ សិង្ហបុរី នាថ្ងៃទី២៤ ខែកក្កដា នៅរាជធានីភ្នំពេញ និងធ្វើដំណើរទៅជួបក្រុមរងជើងឯក ៦ សម័យកាលគឺ ឥណ្ឌូណេស៊ី នៅថ្ងៃទី៣១ ខែកក្កដា។ នៅថ្ងៃទី៣ ខែសីហា កម្ពុជា ត្រូវទទួល ទីម័រខាងកើត ឬ ព្រុយណេ នៅរាជធានីភ្នំពេញ ហើយចុងក្រោយហោះទៅជួប វៀតណាម នៅទីក្រុងហាណូយ ថ្ងៃទី៧ ខែសីហា។

លោក Gyotoku បានបញ្ជាក់ថា ៖«គោលដៅគឺច្បាស់ណាស់។ ក្រុមកម្ពុជាមិនធ្លាប់ឆ្លងផុតវគ្គសន្សំពិន្ទុក្នុងពូលទេ ហើយលើកនេះគឺជាគោលដៅរបស់យើងឆ្លងឲ្យផុត»។