កីឡាករជប៉ុន ៣ នាក់ជាជើងខ្លាំងឃីគបុកស៊ីងលំដាប់ពិភពលោក

ជប៉ុន ជាប្រទេសមួយ មានភាពរីកចម្រើនលើវិស័យកីឡាសឹងតែគ្រប់វិស័យ ជាពិសេសកីឡាឃីគបុកស៊ីងក៏ល្បីល្បាញខ្លាំងផងដែរ។ បច្ចុប្បន្ន ពួកគេមានកីឡាករជា​ច្រើន​នាក់​កំពុង​​លេច​ធ្លោ​ខ្លាំង នោះ​មាន​ជើង​ខ្លាំង ៣ នាក់ ត្រូវបានគេចាត់ទុកជាជើងខ្លាំងឃីគបុកស៊ីងលំដាប់ពិភពលោក។

៣. លោក Masato Kobayashi៖ អតីតកីឡាករដ៏ល្បីល្បាញប្រចាំសង្វៀនពិភពលោក K-1 រូបនេះ ត្រូវបានគេចាត់ទុកជាវីរបុរសកីឡាឃីគបុកស៊ីងមួយរូបរបស់ជប៉ុន។ លោកបានប្រកបអាជីពតាំងពីឆ្នាំ ១៩៩៧ ដល់ ២០០៩ ដោយបានឈ្នះខ្សែក្រវាត់ពិភពលោក K-1 World Max ២ លើក, ISKA ១ លើក និងខ្សែក្រវាត់មួយចំនួនទៀត។

លោកមានកំណត់អាត្រាប្រកួតអាជីពចំនួន ៦៣ លើក ឈ្នះ ៥៥ លើក (ផ្តួលដៃគូឱ្យសន្លប់ ២៥ លើក) ស្មើ ២ លើក និងចាញ់ ៦ លើក។ ចំណុចពិសេសរបស់លោក គឺមានរាងកាយធន់ខ្លាំង កណ្តាប់ដៃធ្ងន់ និងរហ័ស មានចលនាឆ្លាត និងស្មារតីខ្ពស់។ ចំណុចទាំងនេះ លោកបានក្លាយជាគម្រូដ៏ល្អមួយ ដើម្បីបំផុសក្មេងជំនាន់ក្រោយនៅជប៉ុនលើកីឡាករឃីគបុកស៊ីង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

២. កីឡាករ Tenshin Nasukawa៖ កីឡាកររូបនេះ ត្រូវបានគេចាត់ថ្នាក់ស្ថិតនៅលំដាប់លេខ ២ ក្នុងប្រទេស ជប៉ុន សម្រាប់កីឡាឃីគបុកស៊ីង។ អតីតកីឡាករប្រចាំសង្វៀន Rise រូបនេះ បានបញ្ចប់អាជីពឃីគបុកស៊ីងរបស់ខ្លួនកាលពីឆ្នាំ ២០២២ ដោយប្តូរទៅចាប់អាជីពប្រដាល់សកលវិញ បន្ទាប់ពីប្រឡូកអស់រយៈពេល ៨ ឆ្នាំ ជាមួយកំណត់ត្រាប្រកួត ៤២ លើកមិនចាញ់សោះ។ Tenshin មានកំណត់ត្រាប្រកួតឃីគបុកស៊ីង ៤២ លើក មិនដែលស្មើ និងចាញ់ ដោយឈ្នះទាំង ៤២ លើក ហើយក្នុងនោះផ្តួលដៃគូឱ្យសន្លប់ ២៨ លើក។

ចំណុចពិសេសរបស់គេ គឺមានចលនាជើងលឿន ដៃឆ្វេងធ្ងន់ និងរហ័ស ហើយចំណុចមួយទៀត គឺជាកីឡាករដ៏ឆ្លាតម្នាក់នៅលើសង្វៀន ដោយអាចចេញចូលត្រូវគ្រប់កាលៈ​ទេសៈ។ កីឡាករធ្លាប់ឈ្នះខ្សែក្រវាត់ជាច្រើន ប៉ុន្តែខ្សែក្រវាត់ធំបំផុតមាន ៣ គឺ ISKA ពិភព​លោកទម្ងន់ ៥៥ គីឡូក្រាម, ISKA ពិភព​លោកទម្ងន់ ៥៧ គីឡូក្រាម និងខ្សែ​ក្រវាត់​ RISE ទម្ងន់ ៥៥ គីឡូក្រាម។

១. កីឡាករ Takeru Segawa៖ ក្នុងពេលបច្ចុប្បន្ន នៅ ជប៉ុន បានចាត់ទុកកីឡាករ Takeru ជាលំដាប់លេខ ១ ក្នុងកីឡាឃីគបុកស៊ីង។ Takeru ធ្លាប់ប្រកួតចាញ់ Tenshin Nasukawa កាលពីឆ្នាំ ២០២២ ប៉ុន្តែត្រូវបានគេចាត់ទុកស្ថិតនៅលំដាប់លេខ ១ ដោយសាររូបគេជាកីឡាករកំពុងសកម្មក្នុងកីឡាករឃីគបុកស៊ីងនេះនាពេលបច្ចុប្បន្ន។ ហេតុផលធំមួយទៀត គឺ Takeru ធ្លាប់ឈ្នះខ្សែក្រវាត់លំដាប់ពិភពលោក ក៏ដូចជាឡើងការពារបានច្រើនដងជាងដូចជា K-1 World GP Super Bantamweight World Grand Prix ហើយរូបគេការពារបានជោគជ័យ ២ លើក នៅឆ្នាំ ២០១៦ និង ២០១៨។

Takeru ធ្លាប់ប្រកួតអាជីពចំនួន ៥០ ដង ឈ្នះ ៤៧ ដង (ផ្តួលដៃគូឱ្យសន្លប់ ២៧ ដង) និងចាញ់ ៥ ដង។ ចំណុចពិសេសរបស់កីឡាករវ័យ ៣៤ ឆ្នាំរូបនេះ គឺចូលចិត្តសម្រុកមិនងាយថយ មានកណ្តាប់ដៃរហ័ស លឿន និងធ្ងន់ ហើយរូបគេក៏មានរាងកាយធន់រឹងមាំផងដែរ៕

អត្ថបទ៖ សេម កុសល