ព័ត៌មានជាតិ

កងទ័ពមួកខៀវកម្ពុជា១៤នាក់បានពលីក្នុងបុព្វហេតុសន្តិភាពពិភពលោក ក្នុងរយៈពេល២០ឆ្នាំមកនេះ

បានផុស

២ ខែ មុន

នៅ

ថ្ងៃសុក្រ ២៩ ឧសភា ២០២៦

ដោយ

មជ្ឈមណ្ឌលជាតិរក្សាសន្ដិភាពឱ្យដឹងថាចាប់តាំងពីកម្ពុជាបញ្ជូនកងទ័ពមួកខៀវបំពេញបេសកកម្មក្រោមឆត្រអង្គការសហប្រជាជាតិ២០ឆ្នាំមកនេះ មានទាហានកម្ពុជា១៤នាក់បានពលី និង១៩នាក់រងរបួស ក្នុងបុព្វហេតុការពារសន្តិភាពពិភពលោក។ ទោះជាយ៉ាងណាកងកម្លាំងរក្សាសន្តិភាពកម្ពុជានៅតែបន្តបំពេញបេសកកម្មដោយភាពក្លាហាន និងមិនរាថយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមមជ្ឈមណ្ឌលជាតិរក្សាសន្ដិភាព កត្តាហានិភ័យដែលបណ្ដាលឱ្យទាហានមួកខៀវកម្ពុជាស្លាប់ និងរបួសរួមមាន ការវាយប្រហារដោយគ្រឿងផ្ទុះកែច្នៃ ជម្លោះរវាងក្រុមប្រដាប់អាវុធមិនមែនរដ្ឋ ជំងឺឆ្លងនៅតំបន់បេសកកម្ម ការប្រែប្រួលអាកាសធាតុ និងស្ថានការណ៍សន្តិសុខដែលមិនអាចប៉ានស្មានបាន។

បើគិតពីឆ្នាំ២០០៦មក កម្ពុជាបានបញ្ជូនកម្លាំងទៅចូលរួមបេសកកម្មក្រោមឆត្រអង្គការសហប្រជាជាតិសរុបចំនួន ១០ ៧២៣នាក់ ក្នុងនោះមានស្ត្រីចំនួន ១០៥២នាក់ ទៅចួលរួមក្នុងបណ្ដាបេសកកម្មចំនួន១២ ក្នុង១០ប្រទេស ដូចជា សាធារណរដ្ឋស៊ូដង់ ស៊ូដង់ខាងត្បូង ឆាដ អាហ្វ្រិកកណ្ដាល លីបង់ ស៊ីរី សាយប្រឹស ម៉ាលី យេមែន និងសាធារណរដ្ឋកុងហ្គោ។ បច្ចុប្បន្នមានកងទ័ពរក្សាសន្ដិភាពកម្ពុជាកំពុងបំពេញបេសកកម្មក្នុងតំបន់ទាំងនោះចំនួន៤៧១នាក់ទៀត ក្នុងនោះក៏មាននារី៨៤នាក់ផងដែរ។

មជ្ឈមណ្ឌលបានសរសេរថា៖ «កម្លាំងកម្ពុជាមិនរាថយ ក្នុងការចូលរួមជាមួយបណ្តាប្រទេសបរិច្ចាគកងកម្លាំងស្វែងរកសុខសន្តិភាពជូន ប្រទេសដែលរងគ្រោះដោយជម្លោះ ព្រមទាំងនាំយកនូវកិត្តិយសជាបន្តបន្ទាប់មកជូនជាតិមាតុភូមិ រីឯទង់ជាតិកម្ពុជាក៏បន្តបង្ហូតយ៉ាងខ្ពស់ត្រដែតស្នើសិទ្ធិ ស្មើភាព ទាំងនៅទីបញ្ជាការអង្គការសហប្រជាជាតិ ក្នុងទីក្រុងញូវយ៉ក និងបណ្តាបេសកកម្មដែលមានវត្តមានរបស់កងទ័ពមួកខៀវកម្ពុជា»។

មជ្ឈមណ្ឌលជាតិរក្សាសន្តិភាពបានចាត់ទុកសមិទ្ធផលខាងលើនេះ គឺស្តែងចេញពីការប្តេជ្ញាចិត្តរបស់ប្រមុខរាជរដ្ឋាភិបាលកម្ពុជា ដែលសម្តេចធិបតី ហ៊ុន ម៉ាណែត បានថ្លែងក្នុងអង្គមហាសន្និបាតអង្គការសហប្រជាជាតិលើកទី៧៨ ថា “កម្ពុជាបន្តបរិច្ចាគដល់ស្ថិរភាព សន្តិសុខ សន្តិភាពពិភពលោក ការអភិវឌ្ឍប្រកបដោយចីរភាព និងវិបុលភាពសម្រាប់គ្រប់មនុស្សជាតិ” ខណៈរដ្ឋមន្ត្រីក្រសួងការពារជាតិកម្ពុជាបានថ្លែងនាកិច្ចប្រជុំថ្នាក់រដ្ឋមន្ត្រីស្តីពីការរក្សាសន្តិភាពនៅរដ្ឋធានី Accra ប្រទេស Ghana ដោយបានលើកឡើងថា “ទោះក្នុងកាលៈទេសៈណាក៏ដោយកម្ពុជាផ្តល់តម្លៃខ្ពស់ដល់សន្តិភាព និងមិនគាំទ្រសង្គ្រាមឡើយ”៕

អត្ថបទដោយ ហ៊ុន សិរីវឌ្ឍន៍