សេដ្ឋកិច្ច

វិស័យឯកជនចាប់ដៃគ្នាអភិវឌ្ឍមជ្ឈមណ្ឌលដឹកជញ្ជូនទំនិញតាមផ្លូវអាកាស នៅខេត្តព្រះសីហនុ

បានផុស

៣៩ នាទី មុន

នៅ

ថ្ងៃពុធ ២២ កក្កដា ២០២៦

ដោយ

ក្រុមហ៊ុន World Bridge Group និងក្រុមហ៊ុន សូស៊ូយេតេ កុងសេស្យូនែរ ដឺ ឡាអេរ៉ូព័រ (CSA) នៅថ្ងៃទី ២១ កក្កដា ២០២៦ បានចុះហត្ថលេខាលើអនុស្សរណៈនៃការយោគយល់គ្នា ស្ដីពីការបង្កើតក្របខណ្ឌកិច្ចពិភាក្សាសម្រាប់ការអភិវឌ្ឍមជ្ឈមណ្ឌលដឹកជញ្ជូនទំនិញតាមផ្លូវអាកាស និងភស្ដុភារកម្មនៅអាកាសយានដ្ឋានអន្តរជាតិខេត្តព្រះសីហនុ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរណ៍ស៊ីវិល មានប្រសាសន៍ថា ការចុះហត្ថលេខាលើអនុស្សរណៈនៃការយោគយល់គ្នានេះ បានបញ្ជាក់ឱ្យឃើញអំពីការចាប់ដៃគូរវាងស្ថាប័នឯកជនឈានមុខទាំងពីរ ដើម្បីបង្កើតក្របខ័ណ្ឌ កិច្ចពិភាក្សាសម្រាប់ការអភិវឌ្ឍមជ្ឈមណ្ឌលដឹកជញ្ជូនទំនិញតាមផ្លូវអាកាស និងភស្តុភារកម្ម (Air Cargo and Logistic Hub) នៅអាកាសយានដ្ឋានអន្តរជាតិ ខេត្តព្រះសីហនុ ដែលជាដំណាក់កាលថ្មីមួយទៀត ជួយទ្រទ្រង់ដល់ខ្សែច្រវ៉ាក់ ភស្តុភារកម្មកម្ពុជា ជាពិសេសការប្រែក្លាយទៅជាមជ្ឈមណ្ឌលភស្តុភារកម្ម ដែលអាចតភ្ជាប់បបណ្ដាញដឹកជញ្ជូនទំនិញរវាងផ្លូវអាកាស និងផ្លូវសមុទ្រផងដែរ។

លោក ម៉ៅ ហាវណ្ណាល់ បន្ថែមថា ការខិតខំចូលរួមចំណែករបស់វិស័យឯកជនក្នុងវិស័យអាកាសចរណ៍ស៊ីវិល ដូចជាព្រឹត្តិការណ៍នៅថ្ងៃនេះ គឺពិតជាបានឆ្លើយតបដោយផ្ទាល់ និងមានប្រសិទ្ធភាព ស្របតាម «យុទ្ធសាស្ត្របញ្ចកោណ ដំណាក់កាលទី១» របស់រាជរដ្ឋាភិបាលកម្ពុជា អាណត្តិទី៧ នៃរដ្ឋសភា ដែលបានដាក់ចេញយុទ្ធសាស្រ្តចំនួន ៥ រួមមាន៖ កំណើនសេដ្ឋកិច្ច, បង្កើតការងារឱ្យកាន់តែច្រើន, កាត់បន្ថយភាពក្រីក្រ, បង្កើនប្រសិទ្ធភាពស្ថាប័ន និងធានាចីរភាព នៃការអភិវឌ្ឍសង្គម និងសេដ្ឋកិច្ច។

យោងតាមរបាយការណ៍របស់អាកាសចរណ៍ស៊ីវិលនៅក្នុងឆមាសទី១ ២០២៦ ការដឹកជញ្ជូនទំនិញតាមផ្លូវអាកាសសម្រេចបាន ៤៧ ៦២៧ តោន កើនឡើង ២៩% ធៀបនឹងរយៈពេលដូចគ្នានៅឆ្នាំ ២០២៥។

នៅក្នុងឆ្នាំ ២០២៥ កម្ពុជាទទួលបានជើងហោះហើរចេញ-ចូល (ទ្វេទិស) ចំនួន ៦៤ ៨២១ ជើង កើនឡើង ១១%, អ្នកដំណើរចេញ-ចូល (ទ្វេទិស) ចំនួនជិត ៧ លាននាក់ (៦៩៨៨២៥៩) កើនឡើង ១២% និងទំនិញតាមផ្លូវអាកាសមានចំនួន ៩៣ ៨៨៩ តោន កើន ២១% ប្រៀបធៀបនឹងឆ្នាំ ២០២៤៕