កម្ពុជា និងវៀតណាមប្រជុំពិភាក្សាតាមប្រព័ន្ធវីដេអូ ដើម្បីពង្រឹងកិច្ចសហប្រតិបត្តិការឱ្យកាន់តែប្រសើរ

​លោកឧបនាយករដ្ឋមន្រ្តី ប្រាក់ សុខុន ​ក្នុងនាមសមាជិកគណៈអចិន្ត្រៃយ៍ និងជា​ប្រធា​ន​គណៈទាក់ទងបរទេស នៃគណៈកម្មាធិការកណ្តាល​គណបក្សប្រជាជនកម្ពុជា កាលពីរសៀល​ថ្ងៃទី១៨ ខែឧសភា ឆ្នាំ២០២១ ម្សិលមិញ ​បានជួបសសន្ទនា​តាមប្រព័ន្ធវីដេអូ ជាមួយ​លោក ឡេ ហាយជុង ប្រធានគណៈទាក់ទងបរទេសមជ្ឈិមបក្សកុម្មុយនីស្តវៀតណាម​​ ដែលជំនួប​ពិភាក្សា​នោះ ធ្វើឡើង​ដើម្បីពិភាក្សា​​អំពី​កិច្ចសហប្រតិបត្តិការ​រវាងគណបក្ស និងស្ថាប័នទាំងពីរ ព្រមទាំង​ស្តាប់​បទឧទ្ទេសនាមចំណុចសំខាន់ៗ នៃលទ្ធផលមហាសន្និបាតលើកទី១៣ របស់​គណប្សកុម្មុយនីស្តវៀតណាម។

តាមប្រភពព័ត៌មានពីគណបក្សប្រជាជនកម្ពុជាបានឲ្យដឹងថា នៅក្នុងជំនួបនោះ លោកឧប​នា​យករដ្ឋមន្រ្តី ប្រាក់ សុខុន ​ក្នុងនាមសមាជិកគណៈអចិន្ត្រៃយ៍ និងជា​ប្រធា​ន​គណៈទាក់ទងបរទេស នៃគណៈកម្មាធិការកណ្តាល​គណបក្សប្រជាជនកម្ពុជា ​បានសម្តែងនូវសេចក្តីរីករាយ ដែលបានជួបសន្ទនាជាមួយលោក ឡេ ហាយជុង តាមប្រព័ន្ធវីដេអូ និងបានអបអរសាទរចំពោះលោក ឡេ ហាយជុង ដែលត្រូវបានគណបក្ស កុម្មុយនីស្តវៀតណាមតែងតាំងជាប្រ​ធានគណៈទាក់ទងបរទេសមជ្ឈិមបក្សកុម្មុយនីស្តវៀតណាម ហើយឆ្លៀតឱកាសនេះដែរ ភាគីទាំងពីរ​បានពាំនាំនូវការសួរសុខទុក្ខទៅវិញទៅមកពីសំណាក់ថ្នាក់ដឹកនាំជាន់ ខ្ពស់នៃគណបក្ស និងរដ្ឋាភិបាលនៃប្រទេសទាំងពីរ ក៏ដូចជាចំពោះសមភាគីទាំងពីរផ្ទាល់ផងដែរ​។

នៅក្នុងកិច្ចសន្ទនានោះដែរ ភាគីទាំងពីរបានអះអាងថា ប្រវត្តិនៃទំនាក់ទំនងជាបងប្អូនរវាងគណបក្សប្រជាជនកម្ពុជា និងគណ​បក្សកុម្មុយនីស្តវៀតណាម ដែលតែងតែជួយគ្នាទៅវិញទៅមកគ្រប់កាលៈទេសៈ បានចាក់ឫសយ៉ាងជទៅ ក្នុងក្រអៅបេះដូងនៃថ្នាក់ដឹកនាំ កម្មាភិបាលគ្រប់លំដាប់ថ្នាក់ និងប្រជាជននៃប្រទេសទាំងពីរ។ ក្រោមមាគ៌ា ដ៏​ត្រឹមត្រូវនិងឈ្លាសវៃរបស់គណបក្ស និងថ្នាក់ដឹកនាំបក្សទាំងពីរ ទំនាក់ទំនងជាប្រពៃណីដ៏យូរអង្វែងនេះ ក៏ត្រូវ​បានពង្រឹង និងពង្រីកតាមទិសស្លោក “ភាពជាអ្នកជិតខាងល្អ មិត្តភាពជាប្រពៃណ៏ កិច្ចសហប្រតិបត្តិការគ្រប់​ជ្រុងជ្រោយ ស្ថិរភាពយូរអង្វែង”។

ជាងនេះទៅទៀត ចំណងទាក់ទង និងកិច្ចសហប្រតិបត្តិការដ៏ជិតស្និទ្ធរវាងថ្នាក់ដឹកនាំ និងគណបក្ស​យើងទាំងពីរ បាននិងកំពុងចូលរួមចំណែកយ៉ាងសំខាន់ដល់ការលើកកំពស់ទំនាក់ទំនង និងកិច្ចសហ​ប្រតិបត្តិការរវាងប្រទេស និងប្រជាជនយើងទាំងពីរឱ្យមានការរីកចំរើនលើគ្រប់វិស័យ។ ប្រការ​ដ៏គួរឱ្យស្ញប់ស្ញែង គឺ​ក្នុងកាលៈទេសៈ ដែល​ពិភពលោក​កំពុង​រងការគំរាមកំហែង​​យ៉ាងធ្ងន់ធ្ងរដោយសារការរីករាលដាល នៃជំងឺកូវីដ-១៩ ថ្នាក់ដឹកនាំទាំងក្នុង​ជួរ​បក្ស និង​រដ្ឋាភិបាលទាំងពីរ កាន់តែបង្កើន និងពង្រឹងទំនាក់ទំនងរវាងគ្នា​ តាមរយៈការជួបសន្ទនាគ្នា​  ការផ្ញើសារសួរសុខទុក្ខ និងការគាំទ្រគ្នាទាំងសម្ភារៈ និងស្មារតីទៅវិញទៅមក យ៉ាង​ញឹកញាប់ និងជាប្រចាំ។​

ក្នុងជំនួបនោះ ​ឡេ ហាយជុង បានឧទ្ទេសនាមចំណុចសំខាន់ៗ នៃលទ្ធផលមហាសន្និបាតលើក​ទី១៣ របស់គណប្សកុម្មុយនីស្តវៀតណាម ដោយបានសង្កត់ធ្ងន់ថា រយៈពេល៣៥ឆ្នាំ នៃកំណែទម្រង់ Doi Moi បានបោះជំហានទៅមុខ និងរីកចម្រើនយ៉ាងឆាប់រហ័ស​។ ការអភិវឌ្ឍសេដ្ឋកិច្ចបានពង្រីក និងលើកំពស់យ៉ាង​ខ្លាំង ដែលពីមុនវៀតណាមមាន GDP ៦,៣ ប៊ីលានដុល្លាអាមេរិក នៅឆ្នាំ១៩៨៩ និងបានកើនឡើងដល់៣៤៣ ប៊ីលានដុល្លាអាមេរិកនៅឆ្នាំ២០២០។ សន្និបាត​​បាន​បញ្ជាក់​ពី​គោលនយោបាយការបរទេសប្រកបដោយឯករាជ្យ សន្តិភាព សហប្រតិបត្តិការពហុភាគី និងការធ្វើពិពិធកម្មទំនាក់ទំនងខាងក្រៅតាមរយៈពង្រឹងកិច្ចការការបរទេសរបស់បក្ស រដ្ឋ និងប្រជាជន។ កសាងការទូតទំនើប និងគ្រប់ជ្រុងជ្រោយ ពង្រឹងទំនាក់ទំនងទ្វេភាគី និងពហុភាគី លើកកម្ពស់ការពារជាតិនិងសុន្តិសុខ និងជំរុញការទូតសេដ្ឋកិច្ច។

លោកឧបនាយករដ្ឋមន្រ្តី ប្រាក់ សុខុន ​ក្នុងនាមសមាជិកគណៈអចិន្ត្រៃយ៍ និងជា​ប្រធា​ន​គណៈទាក់ទងបរទេស នៃគណៈកម្មាធិការកណ្តាល​គណបក្សប្រជាជនកម្ពុជា​ និងក្នុងនាមខ្លួនលោកផ្ទាល់ បានថ្លែងអំណរគុណ​ដ៏ស្មោះស្ម័គ្របំផុតចំពោះលោក ឡេ ហាយជុង និងសហកា ដែលបាន​ធ្វើ​បទឧទ្ទេសនាមអំពីខ្លឹមសារសំខាន់ៗ នៃលទ្ធផលមហាសន្និបាតតំណាងទូទាំង​ប្រទេ​សរបស់គណបក្សកម្មុយនីស្តវៀតណាម លើកទី១៣ តាមប្រព័ន្ធវីដេអូនៅថ្ងៃនេះ។

សូមបញ្ជាក់ថា ជំនួបសន្ទនា​នេះ ពិតជា​ទទួលបាននូវលទ្ធផលផ្លែផ្កាជាទីគាប់ចិត្ត ដោយអនុញ្ញាត​ឲ្យភាគីទាំងពីរ​​ស្គាល់គ្នាកាន់តែស្និទ្ធស្នាល និង​បានរួមចំណែក​​យ៉ាងសំខាន់ដល់ការពូន​ជ្រុំទំនាក់ទំនងមិត្តភាពដ៏ជ្រាលជ្រៅ សាមគ្គីភាពដ៏រឹងមាំ និងពង្រឹងពង្រីកកិច្ចសហ ប្រតិ​បត្តិការដ៏ជិតស្និទ្ធរវាងគណបក្ស រដ្ឋាភិបាល និងប្រជាជនយើងទាំងពីរ ដើម្បីផលប្រយោជន៍រួមរបស់​ប្រទេស​ទាំងពីរ៕

អត្ថបទ៖ កោះកែវ