ពូទីន ប្រើកិច្ចប្រជុំកំពូលទល់មុខគ្នា តេស្តមើលភាពប្រាកដប្រជារបស់លោក បៃដិន

ប្រធានាធិបតីរុស្ស៊ី វ្ល៉ាឌីមៀ ពូទីន បានសម្តែងក្តីសង្ឃឹមថា កិច្ចពិភាក្សានាពេលខាងមុខរបស់លោក ជាមួយប្រធានាធិបតីអាមេរិក ចូ បៃដិន នឹងក្លាយជាឱកាសមួយ ដើម្បីកែលំអទំនាក់ទំនងទ្វេភាគី ។

ក្នុងអំឡុងពេលវេទិកាសេដ្ឋកិច្ចអន្តរជាតិ នៅទីក្រុង St. Petersburg កាលពីថ្ងៃសុក្រ លោក ពូទីន បានលើកឡើងពីកិច្ចប្រជុំកំពូលរុស្ស៊ី-អាមេរិក ដែលបានរៀបចំឡើងនៅទីក្រុងហ្សឺណែវ នាថ្ងៃទី ១៦ ខែមិថុនា ថា លោកត្រូវរកវិធី ដើម្បីគ្រប់គ្រងទំនាក់ទំនងទ្វេភាគី ដែលបច្ចុប្បន្នស្ថិតនៅចំណុចទាបបំផុត ។

ទន្ទឹមនោះ មតិផ្សេងទៀតបានលើកឡើងថា តាមពិតលោក ពូទីន កំពុងព្យាយាមប្រើកិច្ចប្រជុំកំពូលនេះ ដើម្បីពិនិត្យមើលថាតើ សមភាគីអាមេរិករបស់លោក មានភាពប្រាកដប្រជាប៉ុណ្ណា ចំពោះការពង្រឹងទំនាក់ទំនងមួយនេះ ។

លោកបាននិយាយថា របៀបវារៈនេះ ក៏នឹងរួមបញ្ចូលការគ្រប់គ្រងអាវុធ ការប្រយុទ្ធប្រឆាំងនឹងអំពើភេរវកម្ម និងជំងឺរាតត្បាតកូវីដ ១៩ ផងដែរ ។

ស្របពេលជាមួយគ្នានេះ នៅក្នុងសេចក្តីអត្ថាធិប្បាយ ដាច់ដោយឡែកទៅកាន់ទូរទស្សន៍រដ្ឋ លោក ពូទីន បានពិពណ៌នាពីលោក បៃដិន ថាជាបុរសដែលមានការប្រុងប្រយ័ត្ន និងមានបទពិសោធន៍ខ្ពស់ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ លោក បៃដិន នឹងសង្កត់ធ្ងន់លើបញ្ហានេះដាក់ ពូទីន នៅឯកិច្ចប្រជុំកំពូលទល់មុខគ្នាខែក្រោយ

ចុចអាន ៖ បៃដិន និង ពូទីន កំណត់ថ្ងៃជួបទល់មុខគ្នា ជាលើកដំបូង