អាមេរិក តម្រូវឱ្យសិស្ស-និស្សិតនិងបុគ្គលិក ធ្វើតេស្តរកកូវីដប្រចាំសប្ដាហ៍ មុនត្រឡប់ចូលសាលារៀនវិញ

ទីក្រុង ឡូសអេនជឺឡេស (Los Angeles ) នៃរដ្ឋកាលីហ្វញ៉ា សហរដ្ឋអាមេរិក បានកំណត់ឱ្យសិស្ស-និស្សិតនិងបុគ្គលិកអប់រំទាំងអស់ពាក់ម៉ាសជាកំហិត ក៏ដូចជាត្រូវធ្វើតេស្តរកវីរុសកូវីដ-១៩ មុនត្រឡប់ចូលសាលារៀនវិញនាពេលឆាប់ៗខាងមុខ។

ក្រោយរកឃើញការកើនឡើងនៃករណីឆ្លងវីរុសបំប្លែងខ្លួន Delta ព្រមជាមួយផែនការបើកសាលារៀនឡើងវិញនៅពាក់កណ្ដាលខែសីហាខាងមុខ អាជ្ញាធរតម្រូវឱ្យមានការធ្វើតេស្តប្រចាំសប្តាហ៍សម្រាប់សិស្ស-និស្សិត និងលោកគ្រូអ្នកគ្រូដើម្បីធានាសុវត្ថិភាពគ្រប់គ្នា ដែលសូម្បីតែអ្នកចាក់វ៉ាក់សាំងរួចរាល់ ក៏មិនលើកលែងកាតព្វកិច្ចនេះដែរ។

ការធ្វើតេស្តរកមេរោគកូវីដ-១៩ នឹងធ្វើឡើងសម្រាប់បុគ្គលគ្រប់រូប ដោយមិនគិតពីស្ថានភាពចាក់វ៉ាក់សាំងឬអត់ឡើយ ហើយវានឹងចាប់ផ្តើមនៅថ្ងៃទី ២ ខែសីហា ​ឆ្នាំ២០២១ យោងតាមការណែនាំថ្មីចុងក្រោយពីមន្ទីរសុខាភិបាលសាធារណៈនៃទីក្រុងឡូសអេនជឺឡេស  ហៅកាត់ LAUSD។

LAUSD ធ្វើបែបនេះដើម្បីតាមដានស្ថានភាពសុខភាពប្រជាពលរដ្ឋ ក្នុងការរៀបចំឱ្យលោកគ្រូអ្នកគ្រូ និងសិស្សសាលាវិលត្រឡប់មកសិក្សាដោយផ្ទាល់វិញនៅថ្ងៃទី ១៦ ខែសីហា។

ដើមឡើយ LAUSD ទាមទារការធ្វើតេស្តរកមេរោគកូវីដ-១៩ សម្រាប់តែអ្នកដែលមិនទាន់ទទួលការចាក់វ៉ាក់សាំងប៉ុណ្ណោះ ប៉ុន្តែពេលនេះគ្រប់គ្នាត្រូវធ្វើតេស្ត មុនអនុញ្ញាតឱ្យចូលសាលារៀន។

រដ្ឋបាលទីក្រុងឡូសអេនជឺឡេសជឿជាក់ថា ការធ្វើតេស្តរកមេរោគ ជាស្តង់ដារសុវត្ថិភាពខ្ពស់បំផុត បន្ទាប់ពីការរក្សាគម្លាតសង្គម ការធ្វើអនាម័យ ការលាងសម្អាតដៃ និងការពាក់ម៉ាស។

ស្របពេលគ្នាដែរ ​ក្រុមហ៊ុន សាកលវិទ្យាល័យ និងសាជីវកម្មជាច្រើននៅទូទាំងសហរដ្ឋអាមេរិកសុទ្ធសឹងតម្រូវឱ្យសិស្ស-និស្សិត និងនិយោជិតដែលទទួលថ្នាំបង្ការរួចហើយ ត្រូវធ្វើតេស្តនិងពាក់ម៉ាសជាកំហិត ដើម្បីទប់ស្កាត់ការរាលដាលនៃវីរុសកូវីដ-១៩ និងវីរុសបំប្លែងខ្លួន Delta នៅក្នុងសហគមន៍ ព្រមទាំងឆាប់បានវិលទៅរកភាពប្រក្រតីវិញ៕

ប្រែសម្រួល៖ សន្យា

ប្រភព៖ RT

ចុចអាន៖ Delta វាយលុកខ្លាំង​​ លោក បៃដិន ប្រាប់​រដ្ឋ​ឲ្យ​ផ្តល់ប្រាក់​១០០​ដុល្លារ​ដល់​អ្នក​ចាក់​វ៉ាក់សាំងថ្មី

ចុចអាន៖ ក្រោយធ្វើតេស្តមនុស្ស ២ ក្រុម វ៉ាក់សាំង Pfizer ដូសទី ៣ បង្ហាញប្រសិទ្ធភាពខ្លាំងក្លាការពារវីរុសបំប្លែងខ្លួន Delta