ព័ត៌មានជាតិ

តាមអ្នកភូមិប្រាប់ រកឃើញប្រាសាទចំណាស់មួយនៅខេត្តរតនគិរី ជាប់ព្រំដែនវៀតណាម

បានផុស

៥ years មុន

នៅ

ថ្ងៃអង្គារ ២៨ កញ្ញា ២០២១

ដោយ

នៅស្រុកអូរយ៉ាវដាវខេត្តរតនគិរី អាជ្ញាធរបានរកឃើញប្រាសាទបុរាណចំណាស់មួយ បន្ទាប់ពីមានការរាយការណ៍ពីអ្នកភូមិដែលមានទីតាំងនៅឆ្ងាយកណ្តាលព្រៃជាប់ព្រំដែនវៀតណាម។

លោកឆាយ សាវុធ ប្រធានមន្ទីរវប្បធម៌ខេត្តរតនគិរីបានឲ្យកម្ពុជាថ្មីដឹងថា ប្រាសាទយ៉ាកណាំង ជាប្រាសាទបុរាណមួយដែលអាជ្ញាធរបានរកឃើញតាមការប្រាប់ពីអ្នកភូមិ ស្ថិតក្នុងភូមិដ៍តូច ឃុំយ៉ាទុង ស្រុកអូរយ៉ាដាវជាប់ព្រំដែនវៀតណាម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកប្រធានមន្ទីរបានបញ្ជាក់ថា ប្រាសាទយ៉ាក់ណាំងត្រូវបានអាជ្ញាធរចុះស្រាវជ្រាវរកឃើញនៅឆ្នាំ២០០៦ ក្រោយមានការប្រាប់ដំណឹងពីអ្នកភូមិ។ បើតាមរូបរាងប្រាសាទបាក់បែកអស់ហើយនៅសល់ជញ្ជាំងពីរផ្ទាំងដែលនៅសេសសល់។

បើតាមមន្រ្តីជំនាញ ប្រាសាទយ៉ាកណាំងកសាងឡើងមុនសម័យអង្គរ។ បច្ចុប្បន្នមន្ទីរបានរៀបចំឆ្មាំពីរនាក់ដាក់ឲ្យនៅថែរក្សាការពារប្រាសាទបុរាណមួយនេះ។

លោកប្រធានមន្ទីរបានបន្តទៀតថា ក្រៅពីប្រាសាទយ៉ាកណាំង នៅខេត្តរតនគិរីបានមានប្រាសាទ ៣ ទៀតមានប្រាសាទព្រះពុទ្ធ ស្ថិតក្នុងភូមិប៉ុង ឃុំប៉ុង ស្រុកវ៉ឺនសៃ ប្រាសាទបាក់យាង ក្នុងភូមិ៣ ឃុំត្រពាំងក្រហម ស្រុកកូនមុំ និងប្រាសាទអូរព្រះ មានទីតាំងស្ថិតក្នុងភូមិថ្មី ឃុំជ័យឧត្តម ស្រុកលំផាត់ នៃខេត្តរតនគិរី តែប្រាសាទទាំង ៣ នេះ បាក់បែកសល់តែគ្រឹះតែប៉ុណ្ណោះ។

ជាមួយគ្នានេះ ខេត្តរតនគីរីមានតំបន់ប្រវត្តិសាស្រ្តមួយទៀតមានឈ្មោះថា ភ្នំវល្លិ៍ពើង ដែលមានប្រវត្តិទាក់ទងស្តេចត្រាញ់វល្លិពើង ដែលបានកប់នៅទីនោះ ដែលមន្ទីរបានអភិរក្សនិងការពារថែរក្សាព្រៃឈើ កុំឲ្យមានការរុករានទន្ទ្រានពីអ្នកភូមិ៕

អត្ថបទ៖ ប៊ុណ្ណារ៉ា
រូបថត៖ Ratanak Road Trip