ព័ត៌មានជាតិ
ខេត្តព្រះសីហនុ គ្រោងសាងសង់ប៉មឆ្មាំសមុទ្រចំនួន១២ទីតាំងបន្ថែមទៀតសម្រាប់ជួយសង្គ្រោះភ្ញៀវទេសចរ
អ្នកនាំពាក្យសាលាខេត្តព្រះសីហនុ បានឱ្យដឹងថា រដ្ឋបាលខេត្តព្រះសីហនុ គ្រោងនឹងសាងសង់ប៉មឆ្មាំសមុទ្របន្ថែមចំនួន១២ទីតាំងទៀត ដើម្បីប្រចាំការត្រួតពិនិត្យនិងជួយសង្គ្រោះដល់ភ្ញៀវទេសចរជាតិ និងអន្តរជាតិទៅកម្សាន្តតាមឆ្នេរសមុទ្រឱ្យបានទាន់ពេលវេលា នៅពេលមានជួបគ្រោះថ្នាក់ណាមួយកើតឡើង។
លោក ឃាង ភារម្យ អ្នកនាំពាក្យសាលាខេត្តព្រះសីហនុ បានឱ្យដឹងថា នៅព្រឹកថ្ងៃទី១៩ ខែតុលា នេះថា « ចំនួនទីតាំងប៉មដែលយើងគ្រោងនឹងសិក្សាសាងសង់មាន១២ទីតាំង។ អីចឹងនៅក្នុងផែនការយើងកំណត់ប៉ុណ្ណឹងសិន ប៉ុន្តែអាចថានឹងមានការប្រែប្រួលអីនោះរង់ចាំកិច្ចប្រជុំឆ្លង តែជាក់សែ្តង១២ហើយទីតាំងប៉មចាស់មាន៤ទីតាំង»។
កាលពីរសៀលថ្ងៃទី១៨ ខែតុលា ឆ្នាំ២០២១ លោក គួច ចំរើន អភិបាល នៃគណៈអភិបាលខេត្តព្រះសីហនុ និងអនុរដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ បានដឹកនាំមន្ត្រីជំនាញចុះពិនិត្យស្ថានភាព និងជ្រើសរើសទីតាំងសម្រាប់សាងសង់បន្ទប់អគ្គិសនី និងសាងសង់ប៉មជួយសង្គ្រោះបន្ថែម នៅតាមបណ្តោយឆ្នេរ ចាប់ពីចំណុចផែ៥០២ឆ្នេរអូរឈើទាល រហូតដល់ឆ្នេរជំទាវម៉ៅ។
លោកអភិបាលខេត្ត ក៏ណែនាំឱ្យក្រុមការងារកាយយកគល់ឈើ មែកឈើ និងដុំថ្មចេញឱ្យអស់នៅតាមបណ្តោយឆ្នេរ និងធ្វើការឈូសឆាយខ្សាច់ឱ្យបានរៀបស្មើដើម្បីលើកស្ទួយសោភ័ណភាពឆ្នេរខ្សាច់ និងសម្រាប់ត្រៀមបើកទេសចរ និងសេដ្ឋកិច្ចសង្គមឡើងវិញនៅចុងឆ្នាំ២០២១នេះ បន្ទាប់ពីជំងឺកូវីដ-១៩ បានធូរស្រាលជាបន្តបន្ទាប់។
លោក ឃាង ភារម្យ បានបន្តទៀតថា ការចុះកំណត់ទីតាំងដើម្បីកំណត់ទីតាំងដើម្បីយកមកសិក្សាឡើងជាប្លង់នៅទីតាំងនីមួយៗ ហើយត្រូវឌីហ្សាញរោងឆ្មាំសមុទ្រដែលទាមទារឱ្យមានកិច្ចប្រជុំឆ្លងបន្ថែមទៀត។
លោកបានបន្តឱ្យដឹងថា ការបន្ថែមប៉មឆ្មាំសមុទ្រនេះ ដើម្បីផ្តល់ភាពងាយស្រួលក្នុងការត្រួតពិនិត្យភ្ញៀវទេសចរជាតិ និងអន្តរជាតិដែលអញ្ជើញមកកម្សាន្តនៅតាមឆ្នេរ ឬចុះហែលទឹកនិងលេងទឹក។
លោកបានបន្ថែមថា « អីចឹងក្នុងករណីដែលយើងមើលទៅថាមានបញ្ហាគ្រោះថ្នាក់ណាមួយគាត់អាចចុះទៅសង្គ្រោះបានទាន់ពេលវេលា»។
ប៉ុន្តែទោះបីជាយ៉ាងណាក៏លោក ឃាង ភារម្យ បានបញ្ជាក់ថា យើងទាមទារឱ្យមានការសហការ និងចូលរួមពីប្រជាពលរដ្ឋ និងភ្ញៀវទេសចរបង្កើនការប្រុងប្រយ័ត្នពេលចុះទៅលេងទឹកនៅទីតាំងណាមួយត្រូវមានពោងឬអាវសុវត្តិភាពហើយចុះទៅទីតាំងណាដែលមានទឹកជ្រៅ និងទីតាំងដែលមានរលកធំៗ ដើម្បីសុវត្តិភាពផ្ទាល់ខ្លួន ពិសេសអ្នកដែលមិនចេះហែលទឹក។
គួរបញ្ជាក់ថា កាលពីថ្ងៃទី៧ ខែតុលា ឆ្នាំ២០២១ ក្រោយបុណ្យភ្ជុំមានករណីលង់ទឹកនៅចំណុចឆ្នេរជំទាវម៉ៅ ស្ថិតក្នុងភូមិគគីរ ឃុំបិតត្រាំង ស្រុកព្រៃនប់ ខេត្តព្រះសីហនុ បានបណ្តាលឱ្យមនុស្ស៤នាក់បានស្លាប់បាត់បង់ជីវិតនិងម្នាក់ទៀតជួយសង្គ្រោះបានពីពួកគេទាំង៥នាក់បានចុះលេងទឹកសមុទ្រនៅ កន្លែងកើតហេតុខាងលើ៕
អត្ថបទ៖ សំអឿន
-
ព័ត៌មានជាតិ១ សប្តាហ៍ ago៦ថ្ងៃក្នុងព្រឹត្តិការណ៍ «នគរសង្ក្រាន្ត» មន្ទីរសុខាភិបាលរាជធានីភ្នំពេញ បានពិនិត្យ និងព្យាបាលជូនពលរដ្ឋជាង២ពាន់នាក់
-
ព័ត៌មានអន្ដរជាតិ៤ ថ្ងៃ agoខេត្ត Kochi នៅជប៉ុនផ្តល់ប្រាក់ ១២៥ដុល្លារឲ្យអ្នកនៅលីវ ចំណាយលើការណាត់ចួបបង្កើតស្នេហា
-
ព័ត៌មានអន្ដរជាតិ៥ ថ្ងៃ agoត្រាំ ពន្លះ WSJ ថា ជាសារព័ត៌មានវង្វេងផ្លូវ និងជាកាកសំណល់នយោបាយ
-
ព័ត៌មានអន្ដរជាតិ៥ ថ្ងៃ agoវិមានក្រឹមឡាំង៖ ពូទីន ត្រៀមជួបហ្សេលេនស្គី ទាល់តែមានការចុះហត្ថលេខាលើកិច្ចព្រមព្រៀងសន្តិភាព
-
ព័ត៌មានជាតិ៣ ថ្ងៃ agoតំណាងអយ្យការសម្រេចចោទប្រកាន់លោកផ្កាយបីនិងលោកផ្កាយពីរ រួមអ្នកពាក់ព័ន្ធ៤នាក់ផ្សេងទៀត
-
សន្តិសុខសង្គម៣ ថ្ងៃ agoតុលាការខេត្តកំពត បង្គាប់ឲ្យឃុំខ្លួនមន្ត្រីនគរបាលដែលគប់កែវស្រាលើអ្នកចាប់ទឹកកកដាក់ពន្ធនាគារ
-
ព័ត៌មានជាតិ៧ ថ្ងៃ agoមន្រ្តីបរិស្ថានស្នើពលរដ្ឋកុំបរិភោគត្រីងាប់ និងផ្អាកប្រើប្រាស់ទឹកព្រែកត្រែង នៅស្រុករតនៈមណ្ឌល ខេត្តបាត់ដំបង
-
ព័ត៌មានជាតិ១១ ម៉ោង agoអាជ្ញាធរទាត់ចោលព័ត៌មានដែលផ្សាយថា ថៃបានឈ្លានពានចូលទឹកដីខ្មែរនៅខេត្តប៉ៃលិន