២ សំណួរ អ្នកជំងឺទឹកនោមផ្អែមលែងសង្ស័យចំពោះវ៉ាក់សាំងបង្ការកូវីដ-១៩

១. តើវ៉ាក់សាំងមានសុវត្ថិភាព និងប្រសិទ្ធភាពចំពោះអ្នកដែលមានជំងឺទឹកនោមផ្អែមដែរទេ?

វ៉ាក់សាំងចំនួនពីរដូស តម្រូវឱ្យចាក់ពីរដងក្នុងចន្លោះពេលពី ១៥-២១ ថ្ងៃ មានប្រសិទ្ធភាពចំពោះគ្រប់គ្នា មិនថាមានឬគ្មានជំងឺឡើយ។

វេជ្ជបណ្ឌិត C.Buddy Creech នាយកកម្មវិធីស្រាវជ្រាវវ៉ាក់សាំងការពារមេរោគ Vanderbilt ទីក្រុង Nashville រដ្ឋ Tennessee  សហរដ្ឋអាមេរិក និយាយថា អ្នកដែលមានជំងឺទឹកនោមផ្អែមប្រភេទទី ១ ប្រភេទទី ២ នឹងទទួលបានប្រសិទ្ធភាពខ្ពស់ ចំណែកសរីរាង្គក៏មានការឆ្លើយតបជាមួយប្រព័ន្ធភាពស៊ាំដូចគ្នានឹងអ្នកគ្មានជំងឺដែរ។

ដោយឡែក វេជ្ជបណ្ឌិត Justin Gregory ជំនួយការសាស្រ្តាចារ្យផ្នែកកុមារ មន្ទីរពេទ្យកុមារ Vanderbilt សហរដ្ឋអាមេរិក បានឱ្យដឹងបន្ថែមថា ការចាក់វ៉ាក់សាំងមានសារសំខាន់ណាស់សម្រាប់អ្នកជំងឺទឹកនោមផ្អែម ដោយអាចជួយឱ្យអត្រាស្លាប់ធ្លាក់ទាបបំផុត ប្រសិនពួកគាត់ឆ្លងកូវីដ ត្រូវចូលពេទ្យ។ ការសិក្សារបស់វេជ្ជបណ្ឌិតរូបនេះ កាលពីខែធ្នូ ឆ្នាំ ២០២០ រកឃើញថា អ្នកដែលមានជំងឺទឹកនោមផ្អែមប្រភេទ ១ ឬប្រភេទ ២ ងាយនឹងចូលសម្រាកនៅមន្ទីរពេទ្យឬមានរោគសញ្ញាធ្ងន់ធ្ងរខ្លាំងជាងអ្នកដែលមិនមានជំងឺទឹកនោមផ្អែមរហូតដល់ទៅ ៣ ដង។ ដូច្នេះ វ៉ាក់សាំងកូវីដ-១៩ មិនបង្កហានិភ័យចំពោះអ្នកដែលមានជំងឺទឹកនោមផ្អែមនោះទេ ថែមទាំងអាចការពារសុខភាពបានល្អទៀតផង។

២. តើអ្នកមានជំងឺទឹកនោមផ្អែម មានផលរំខានអ្វីខ្លះ ក្រោយចាក់វ៉ាក់សាំង?

ជាទូទៅផលប៉ះពាល់ក្រោយចាក់វ៉ាក់សាំងរួមមាន ឈឺចាប់ ហើម និងឡើងក្រហមនៅកន្លែងចាក់ថ្នាំ។ល។ ផលរំខានទូទៅផ្សេងទៀតអាចគ្រុនតិចតួច អស់កម្លាំង និងឈឺក្បាល។ ភាគច្រើននៃផលប៉ះពាល់ទាំងនេះមានលក្ខណៈស្រាលប៉ុណ្ណោះ។ អាការទាំងនេះ ក៏អាចកើតឡើងចំពោះអ្នកជំងឺទឹកនោមផ្អែមដែរ តែវេជ្ជបណ្ឌិតប្រាប់កុំឱ្យបារម្ភ ព្រោះជាផលប៉ះពាល់ទូទៅ ពុំមានអាចបង្កគ្រោះថ្នាក់ទេ៕

អត្ថបទ៖ សន្យា

ចុចអាន៖ ក្រោយក្រសួងប្រកាស តើអ្នកមានជំងឺប្រចាំកាយអ្វីខ្លះ អាចចាក់វ៉ាក់សាំងបាន?

ចុចអាន៖ ជាសះស្បើយពីកូវីដបាន៤ខែ អាចចាក់វ៉ាក់សាំងបាន តែមានផលរំខានខុសអ្នកដទៃមួយចំណុច