ព័ត៌មានជាតិ

អនុញ្ញាតឱ្យរៀបចំពិធីសាសនាដោយមិនកំណត់ចំនួនមនុស្សតែត្រូវប្រើស្តង់ដាររក្សាគម្លាត ១ម៉ែត្រកន្លះ

បានផុស

៥ years មុន

នៅ

ថ្ងៃសុក្រ ១២ វិច្ឆិកា ២០២១

ដោយ

សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានផ្ញើសារជូនដល់សាសនិកគ្រប់សាសនានៅទូទាំងប្រទេសកម្ពុជាថា រាល់ការ រៀបចំពិធីសាសនានានាគឺអាចប្រារព្ធធ្វើទៅបានដោយមិនកំណត់ចំនួនមនុស្សចូលរួមឡើយ ប៉ុន្តែត្រូវតែធានាឱ្យមាននូវការរក្សាគម្លាតសុវត្ថិភាពដោយកំណត់យកស្តង់ ដារគម្លាតក្នុងចម្ងាយ១ម៉ែត្រកន្លះ ពីមនុស្សម្នាក់ទៅមនុស្សម្នាក់ទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅសារសម្លេងពិសេសរបស់សម្តេចតេជោ ហ៊ុន សែន ដែលបានផ្ញើសារពិសេសជូនជនរួមជាតិនៅរសៀលថ្ងៃទី១២ ខែវិច្ឆិកា ឆ្នាំ២០២១ ដែលមានរយៈពេលប្រមាណ ១៥ នាទី សម្តេចតេជោ ហ៊ុន សែន បានមានប្រសាសន៍ថាសម្រាប់ពិធីសាសនាគឺក្រសួងសុខាភិបាលត្រូវសហការជាមួយក្រសួងធម្មការនិងសាសនាដោយកំណត់យក ការរក្សាគម្លាតធ្វើជាមូលដ្ឋានហើយការកំណត់ចំនួនមនុស្សគឺមិនត្រឹមត្រូវនោះទេគឺអាស្រ័យទៅតាមទីកន្លែង បើកន្លែងតូចគឺមានមនុស្សតិចតែបើកន្លែងធំអាចមានមនុស្សច្រើន ប៉ុន្តែត្រូវតែពិនិត្យឱ្យបានច្បាស់ថាអ្នកចូលរួមទាំងអស់គឺសុទ្ធតែទទួលបានវ៉ាក់សាំងរួចរាល់។

សម្តេចតេជោ ហ៊ុន សែន បានលើកឡើងថា ព្រះសង្ឃ សាសនិកឥស្លាមក៏ដូចជាគ្រិស្តបរិស័ទ គ្រប់រូបទាំងអស់ត្រូវពិនិត្យទៅលើការគោរពវិធានសុខាភិបាលហើយត្រូវ ពាក់ម៉ាស,អាកុលលាងដៃ,រក្សាគម្លាតសុវត្ថិភាព,ជាការចាំបាច់។សារនេះបញ្ជូនសម្រាប់ខាងផ្នែកសាសនាគ្រប់សាសនាទាំងអស់ដើម្បីអនុវត្តនៅទូទាំងប្រទេស៕

ដោយ ៖ ណារី