មើលទិន្នន័យនេះរួច ដឹងហើយថា Omicron មានឥទ្ធិពលខ្លាំងប៉ុនណា (មានវីដេអូ)

ខេត្តមួយរបស់ប្រទេសអាហ្រ្វិកខាងត្បូងដែលជាកន្លែងវីរុសបំប្លែងខ្លួន Omicron ត្រូវបានរកឃើញជាលើកដំបូង បានកត់ត្រាអំពីការចូលព្យាបាលក្នុងមន្ទីរពេទ្យដោយសារវីរុស កើនឡើងជាង ៣០០% ក្នុងសប្តាហ៍នេះ។

ខេត្ត Gauteng បានកត់ត្រាការចូលព្យាបាលក្នុងមន្ទីរពេទ្យចំនួន ៥៨០ករណី ដោយសារតែមេរោគក្នុងសប្តាហ៍នេះ ពោលគឺកើនឡើង៣៣០ភាគរយពី ១៣៥ករណីកាលពីពីរសប្តាហ៍មុន។

កាលពីសប្តាហ៍មុន វីរុសកូវីដ១៩បំប្លែងខ្លួន Omicron ត្រូវបានរកឃើញនៅក្នុង៧៧ករណីនៅតំបន់នេះ ហើយមនុស្សជាច្រើនមានការភ័យខ្លាចថា វាជាមេរោគឆ្លងសាហាវបំផុត និងថាវាអាចគេចផុតពីការការពារប្រព័ន្ធភាពស៊ាំដោយសារតែចំនួននៃបម្រែបម្រួលដ៏ច្រើនរបស់វា។

ថ្វីបើមន្ត្រីសុខាភិបាលអាហ្រ្វិកខាងត្បូង បានរាយការណ៍ថា ករណីនៃវីរុសបំប្លែងខ្លួននេះច្រើនតែស្រាលក៏ដោយ ប៉ុន្តែការកើនឡើងនៃការចូលសម្រាកព្យាបាលនៅមន្ទីរពេទ្យក្នុងខេត្ត ហាក់ដូចជាបង្ហាញសញ្ញាផ្សេង។

Gauteng គឺជាខេត្តមានប្រជាជនច្រើនជាងគេរបស់ប្រទេសអាហ្វ្រិកខាងត្បូង​ ដោយមានជាង១២លាននាក់។

បន្ទាប់ពីការកើនឡើងនៃកូវីដប្រហែល៣ខែមុន ខេត្តនេះមើលឃើញការថយចុះនៃការសម្រាកព្យាបាលក្នុងមន្ទីរពេទ្យ អស់រយៈពេលជាច្រើនសប្តាហ៍។

គិតត្រឹមថ្ងៃទី៧ខែវិច្ឆិកា ការសម្រាកព្យាបាលនៅមន្ទីរពេទ្យទាក់ទងនឹងកូវីដចំនួន១២០ករណី ត្រូវបានរកឃើញ។ កាលពីសប្តាហ៍មុន តួលេខនោះបានកើនឡើងទ្វេដងដល់២៧៦ករណី មុនពេលលោតដល់៥៨០ករណី។

ក្នុងរយៈពេលប្រាំបួនថ្ងៃកន្លងមកនេះ ករណីបានកើនឡើងប្រាំបួនដង ពីប្រហែល ៥០០ករណី ក្នុងមួយថ្ងៃនៅថ្ងៃទី២០ខែវិច្ឆិកា ដល់៤,៥០០ករណីក្នុងមួយថ្ងៃ នៅសប្តាហ៍នេះ។

រឿងមួយដែលគួរឲ្យកត់សម្គាល់នោះគឺថា ករណីមួយចំនួនក្នុងចំណោម ៧៧ ករណីដែលបានរកឃើញដោយមន្ត្រីសុខាភិបាលកាលពីសប្តាហ៍មុន គឺស្ថិតក្នុងចំណោមមនុស្សដែលបានចាក់វ៉ាក់សាំងរួច ដែលជាហេតុបង្កឲ្យមានក្តីព្រួយបារម្ភ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Daily Mail

ចុចអាន៖ ព័ត៌មានសំខាន់ៗជុំវិញវីរុសបំប្លែងខ្លួន Omicron ដែលពិភពលោកកំពុងភ័យខ្លាច