ទូត​កំពូល​អាមេរិក​ និង​រុស្ស៊ី​ជួបគ្នា​ថ្ងៃ​សុក្រ​នេះ​ពិភាក្សា​កម្តៅ​នៅអ៊ុយក្រែន

មន្ត្រីការទូតកំពូលរបស់ប្រទេសរុស្ស៊ី និងសហរដ្ឋអាមេរិកគ្រោងជួបគ្នានៅប្រទេសស្វីសនាថ្ងៃសុក្រនេះដើម្បីពិភាក្សាពីភាពតានតឹងកំពុង​ក្តៅជុំវិញប្រទេសអ៊ុយក្រែន បន្ទាប់ពីកិច្ចប្រជុំរវាងមន្ត្រីប្រទេស​ទាំងពីរ​កាលពីសប្តាហ៍មុនមិនបានដំណោះស្រាយអ្វីសោះ។

រដ្ឋមន្ត្រីក្រសួងការបរទេសអាមេរិក លោក Antony Blinken បានទៅដល់ទីក្រុងទីក្រុងហ្សឺណែវដើម្បីពិភាក្សាជាមួយរដ្ឋមន្ត្រីក្រសួងការបរទេសរុស្ស៊ី លោក Sergei Lavrov ក្រោយពេលបង្កើនសាមគ្គីភាពជាមួយសម្ព័ន្ធមិត្តអឺរ៉ុបដើម្បីដាក់បន្ទុករុស្ស៊ី​តាម​រយៈ​ទណ្ឌកម្ម ប្រសិនបើរុស្ស៊ីចេញសកម្មភាពឈ្លានពានណាមួយលើអ៊ុយក្រែន។

សេចក្តីសង្ឃឹមនៃការសាងសាមគ្គីភាពរបស់ទីក្រុងវ៉ាស៊ីនតោនដើម្បីប្រឆាំងរដ្ឋាភិបាលក្រុងមូស្គូត្រូវបានស្មុគស្មាញដោយប្រធានាធិបតីអាមេរិក លោក ចូ បៃដិន ដែលបានព្យាករថា រុស្ស៊ីអាចនឹងឈានចូលអ៊ុយក្រែន​ និងនិយាយថា ទីក្រុងមូស្គូនឹងរងផលធ្ងន់ធ្ងរវិញ។

រុស្ស៊ីបានដាក់ពង្រាយកងទ័ពរាប់ពាន់នាក់នៅព្រំដែនជាមួយអ៊ុយក្រែនដែលធ្វើឲ្យប្រទេសលោកខាងលិចបារម្ភថា រុស្ស៊ីកំពុងរៀបផែនការវាយប្រហារអ៊ុយក្រែនដែលពួកគេធ្លាប់បានឈ្លានពានកាលពីឆ្នាំ២០១៤ម្តងហើយ ប៉ុន្តែរុស្ស៊ីបានបដិសេធ​ផែនការវាយប្រហារណាមួយ។ ពួកគេនិយាយថា ខ្លួនអាចមានសកម្មភាពយោធាមិនជាក់លាក់ ប្រសិនបើការទាមទាររបស់ខ្លួនមិនបានសម្រេច ជាពិសេសចង់បានការសន្យាពីអង្គការណាតូមិន​ឲ្យ​ទទួល​ស្គាល់​អ៊ុយក្រែនជាសមាជិក៕

អានបន្ថែមជុំវិញរុស្ស៊ី និងអ៊ុយក្រែន

លោកខាងលិចប្តេជ្ញា«សាមគ្គីគ្នា»ដើម្បីឆ្លើយតបរុស្ស៊ីជុំវិញអ៊ុយក្រែន
អាមេរិក យល់ព្រមឲ្យផ្ទេរអាវុធ ពីសម្ព័ន្ធមិត្តទៅ អ៊ុយក្រែន ហើយ!
អង់គ្លេស គ្រោងបញ្ជូនអាវុធបន្ថែមទៀតទៅ អ៊ុយក្រែន
មកដឹងអាវុធទំនើបៗ ៥ ប្រភេទ រុស្ស៊ី អាចប្រើកម្ទេច អ៊ុយក្រែន