ចិន កំពុងផលិតយន្តហោះល្បឿនលឿនជាងសំឡេង ធ្វើដំណើរទៅ ទីក្រុងញូវយ៉ក ប្រើពេលត្រឹម ១ ម៉ោង

ក្រុមហ៊ុន​ចិន Space Transportation ​កំពុង​អភិវឌ្ឍ​យន្តហោះល្បឿន​លឿន​ជាង​សំឡេង​ដែល​អាច​ធ្វើ​ដំណើរ​ពី​ទីក្រុង​ញូវយ៉ក​ទៅ​ប្រទេស​ចិន​ក្នុង​ពេល​តែ​មួយ​ម៉ោង​ប៉ុណ្ណោះ ។

ក្រុមហ៊ុនអរកាសមួយនេះបាននិយាយថា ខ្លួនកំពុងអភិវឌ្ឍ “យន្តហោះ ឬរ៉ុកកែតមានស្លាប” ដែលនឹងដំណើរការសម្រាប់ទេសចរណ៍អវកាស និងការធ្វើដំណើរពីចំណុចមួយទៅចំណុចមួយ ហើយយន្តហោះរបស់ខ្លួននឹងមានតម្លៃទាបជាងគ្រាប់រ៉ុកកែតដែលប្រើសម្រាប់ដឹកផ្កាយរណបទៅកាន់ទីអវកាស ហើយវាក៏លឿនជាងយន្តហោះចាស់របស់ខ្លួនផងដែរ ។

ចំណែកវីដេអូដែលបង្ហោះក្នុងគេហទំព័ររបស់ខ្លួនបានបង្ហាញឲ្យឃើញថា អ្នកដំណើរជាច្រើននាក់បានឡើងលើយន្តហោះល្បឿនលឿនជាងសំឡេង ។ បន្ទាប់មកយន្តហោះ​នេះ​បែរ​បញ្ឈរ​ឆ្ពោះទៅ​មេឃ ហើយ​ហោះ​ទៅ​លើ​អាកាស​ ។

បន្ទាប់ពីការហោះហើរជាច្រើនវិនាទី ឧបករណ៍ជំនួយការបាញ់បង្ហោះបានធ្លាក់ចេញ ហើយត្រឡប់ទៅកន្លែងដាក់ជើងទម្រដោយសុវត្ថិភាព ។ បន្ទាប់មក យន្តហោះនេះបន្តដំណើររបស់ខ្លួនតាមពពក និងការធ្វើដំណើរក្រោមបាតសមុទ្រ ហើយទីបំផុតធ្វើដំណើរក្នុងចម្ងាយ ៧,០០០ គីឡូម៉ែត្រទៅកាន់គោលដៅរបស់វាក្នុងរយៈពេល ៦០ នាទី ។

ក្រុមហ៊ុន Space Transportation គ្រោងនឹងដំណើរការការសាកល្បងយន្តហោះនេះនៅត្រឹមឆ្នាំ ២០២៣ ដោយសង្ឃឹមថានឹងចាប់ផ្តើមការហោះហើរលើកដំបូងនៃយន្តហោះល្បឿនលឿនជាងសំឡេងនៅឆ្នាំ ២០២៤ ហើយនឹងដឹកក្រុមនាវិកនៅពេលក្រោយ ពោលនៅឆ្នាំ ២០២៥ ៕

ប្រែសម្រួលដោយ ៖ ជីវ័ន្ត

ប្រភព ៖ Yahoo

ចុចអាន ៖ រុស្ស៊ី​ បាញ់មីស៊ីលល្បឿនលឿនជាងសំឡេងមួយគ្រាប់ទៀតលើ អ៊ុយក្រែន