កូរ៉េខាងជើង ហាមមិនឲ្យស្រីៗស្លៀកខោខូវប៊យរឹបៗ និងលាបពណ៌សក់ អ្នកហ៊ានល្មើសនឹងខ្មាស់គេពេញប្រទេស

ប្រភពនៅក្នុងប្រទេសកូរ៉េខាងជើងបានប្រាប់វិទ្យុ RFA ថា ប្រទេសកូរ៉េខាងជើងបានបង្កើនការបង្ក្រាបលើអ្នកណាស្លៀកខោខូវប៊យរឹបៗ លាបពណ៌សក់ និងស្ទីលផ្សេងៗទៀតដែលបង្ហាញពីភាពស៊ីវិល័យ ។

តាមសារព័ត៌មានមិនរកប្រាក់ចំណេញរបស់សហរដ្ឋអាមេរិកបាននិយាយថា សម្ព័ន្ធយុវជនស្នេហាជាតិសង្គមនិយមរបស់ប្រទេសនេះកំពុងកំណត់គោលដៅលើស្ត្រីក្នុងវ័យ ២០ ឆ្នាំ និង ៣០ ឆ្នាំ ។

ប្រភព​បាន​ប្រាប់​ថា​ ​“កម្លាំង​ល្បាត​កំពុង​បង្ក្រាប​យុវជន​ដែល​ពាក់​សក់​វែង​ដល់​ចង្កេះ និង​អ្នក​លាបសក់​ពណ៌​ត្នោត ព្រម​ទាំង​អ្នក​ស្លៀក​សំលៀក​បំពាក់​មាន​អក្សរ​បរទេស​ធំៗ និង​ស្ត្រី​ស្លៀក​ខោរឹបជាដើម ។

ប្រភពបន្តថា “បើ​រកឃើញអ្នកល្មើសហើយ ពួកគេ​ត្រូវ​ចាំ​នៅ​សងខាង​ផ្លូវ​រហូត​ដល់​កម្លាំង​ល្បាត​បាន​ទៅដល់តំបន់​នោះ ។ បន្ទាប់មកអាជ្ញាធរនឹងនាំពួកគេទៅកាន់ការិយាល័យសម្ព័ន្ធយុវជន ជាកន្លែងដែលពួកគេត្រូវតែ “សារភាព” ទោសកំហុសរបស់ពួកគេជាលាយលក្ខណ៍អក្សរ ហើយជនល្មើសនឹងត្រូវបានដោះលែងវិញ លុះត្រាតែនរណាម្នាក់យកសម្លៀកបំពាក់សមរម្យឲ្យពួកគេស្លៀក ។

ប្រភពបញ្ជាក់ថា “ក្នុងករណីធ្ងន់ធ្ងរបំផុត ទាំងឈ្មោះ អាសយដ្ឋានផ្ទះ និងកន្លែងធ្វើការរបស់អ្នកល្មើស នឹងត្រូវបង្ហាញទូទាំងប្រទេសជាមួយនឹងការប្រកាសដោយឧបករណ៍បំពងសំឡេងដែលគ្រប់គ្រងដោយរដ្ឋ ។

គួរបញ្ជាក់ថា ប្រទេសកូរ៉េខាងជើងក៏បានហាមប្រាមការចោះត្រចៀកច្រើនតង់ ស្លៀកខោខូវប៊យរឹបៗ និងធ្វើម៉ូដសក់ប្លែកៗ ចាប់តាំងពីខែឧសភាឆ្នាំមុន ក្នុងគោលបំណងដើម្បីរក្សាប្រទេសនេះមិនឲ្យមានលំហូរអរិយធម៌ពីលោកខាងលិច ហើយវាក៏កើតឡើង បន្ទាប់ពីមេដឹកនាំប្រទេសលោក គីម ជុងអ៊ុន បានពណ៌នាថា ម៉ូដសក់ និងសម្លៀកបំពាក់របស់បរទេសគឺជា “ថ្នាំពុលដ៏គ្រោះថ្នាក់” ៕

ប្រែសម្រួលដោយ ៖ ជីវ័ន្ត

ប្រភព ៖ Business Insider

ចុចអាន ៖ លោក គីម ជុនអ៊ុន ផ្ញើសារបង្កប់ន័យជ្រៅទៅកាន់លោក ពូទីន ក្នុងទិវាជ័យជម្នះ