លោក គីម ជុនអ៊ុន ផ្ញើសារបង្កប់ន័យជ្រៅទៅកាន់លោក ពូទីន ក្នុងទិវាជ័យជម្នះ

មេដឹកនាំកូរ៉េខាងជើងលោក គីម ជុងអ៊ុន បានផ្ញើសារមួយទៅកាន់ប្រធានាធិបតីរុស្ស៊ីលោក វ្ល៉ាឌីមៀ ពូទីន ដើម្បីអបអរសាទរលោកក្នុង “ទិវាជ័យជម្នះ ៩ ឧសភា” របស់សហភាពសូវៀតលើពួកណាស៊ីអាល្លឺម៉ង់ ។

ប្រព័ន្ធផ្សព្វផ្សាយរដ្ឋរបស់កូរ៉េខាងជើងនិយាយថា លោក គីម បានបង្ហាញពីសាមគ្គីភាពរបស់លោកទៅកាន់ប្រជាជនរុស្ស៊ីដែលបានលុបបំបាត់ការគំរាមកំហែងផ្នែកនយោបាយ និងយោធាដែលបង្កឡើងដោយកងកម្លាំងអរិភាពដើម្បីការពារសន្តិភាព និងសន្តិសុខនៃប្រទេសរបស់ពួកគេ ។

លោក គីម ជឿជាក់ថា ទំនាក់ទំនងមិត្តភាពជា “យុទ្ធសាស្ត្រ និងប្រពៃណី” រវាងកូរ៉េខាងជើង និងរុស្ស៊ីនឹងពង្រឹងក៏ដូចជាអភិវឌ្ឍស្របតាមផលប្រយោជន៍ជាមូលដ្ឋានរបស់ប្រជាជននៃប្រទេសទាំងពីរគ្រប់សម័យកាល ។

ទន្ទឹមនោះ សាររបស់លោក គីម ក៏ទំនងជាមានគោលបំណងបញ្ជាក់ពីទំនាក់ទំនងមិត្តភាពដ៏ល្អរបស់ប្រទេសលោកជាមួយរុស្ស៊ីដែលជាសម្ព័ន្ធមិត្តដ៏សំខាន់មួយ ក៏ដូចជាអ្នកគាំទ្ររុស្ស៊ីក្នុងសង្គ្រាមលុកលុយលើអ៊ុយក្រែន និងដាក់សហរដ្ឋអាមេរិករួមជាមួយនឹងប្រទេសលោកខាងលិចផ្សេងទៀតនៅក្នុងការតាមដាន ។

ស្របពេលជាមួយគ្នានេះ កូរ៉េខាងជើង​ក៏កំពុង​ប្រកាន់យក​ជំហរ​ប្រឈមមុខ​ដាក់គ្នា​កាន់តែខ្លាំង​ប្រឆាំង​នឹង​អាមេរិកផងដែរ ដោយពេលនេះកំពុង​ពន្លឿន​កម្មវិធី​អភិវឌ្ឍន៍​នុយក្លេអ៊ែរ និង​កាំជ្រួចមីស៊ីល​របស់ខ្លួន ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ លោក បៃដិន ថា ពូទីន កំពុងគ្មានផ្លូវចេញពីសង្គ្រាម អ៊ុយក្រែន