គួរដឹង! ជំងឺអុតស្វា ងាយឆ្លងតាមរយៈសកម្មភាពប៉ុន្មាននេះ

បច្ចុប្បន្នជំងឺអុតស្វា (Monkeypox) កំពុងចាប់ផ្ដើមវាយលុកពិភពលោកគួរឱ្យបារម្ភ ខណៈពេលប៉ុ​ន្មានថ្ងៃមកនេះ វាបាន​​កើត​មាន​ហោច​ណាស់​មាន​ ១២​​ប្រទេសហើយរ​​​រួមមាន បែលហ្សិក​ បារាំង អាល្លឺម៉ង់ អ៊ីតាលី ហុល្លង់ ព័រទុយហ្គាល់ អេស្ប៉ាញ ស៊ុយអែត ចក្រភព​អង់គ្លេស ​សហរដ្ឋ​អាមេរិក កាណាដា និង​អូស្ត្រាលី។

ជំងឺអុតស្វា ត្រូវបានរកឃើញជាលើកដំបូងក្នុងឆ្នាំ ១៩៥៨ និងរកឃើញករណីឆ្លងលើមនុស្សដំបូងបំផុតនៅសាធារណរដ្ឋប្រជាធិបតេយ្យកុងហ្គោ ក្នុងឆ្នាំ ១៩៧០ ។ បន្ទាប់មកគេបានរកឃើញករណីឆ្លងលើមនុស្ស នៅសហរដ្ឋអាមេរិក ក្នុងឆ្នាំ ២០០៣ និងចក្រភពអង់គ្លេស ក្នុងខែកញ្ញា ២០១៨។

ធាតុពិតនៃមេរោគជំងឺអុតស្វា គឺវារស់នៅក្នុងខ្លួនសត្វព្រៃ ប៉ុន្តែមនុស្សអាចឆ្លងជំងឺនេះបានតាមរយៈការប៉ះផ្ទាល់ជាមួយសត្វដូចជា ការចាប់ស្វា ឬបរិភោគសាច់ដែលចម្អិនមិនឆ្អិនល្អ។

បន្ទាប់ពីបានប៉ះពាល់ ឬបរិភោគសាច់ព្រៃ មេរោគអាចចូលទៅក្នុងខ្លួនប្រាណមនុស្សតាមរយៈដំបៅស្បែក ផ្លូវដង្ហើម ភ្នែក ច្រមុះ ឬមាត់ជាដើម។ ជាទូទៅមេរោគនេះអាច​ឆ្លង​កាត់​មនុស្ស​តាម​រយៈ​ដំណក់​ទឹក​ក្នុង​បរិយាកាស ​ការ​ប៉ះ​ពាល់ស្បែក​អ្នក​ឆ្លង ការរួមភេទ ឬ​ប៉ះ​វត្ថុ​ដែល​មាន​មេរោគ។

រហូតមកទល់ពេលនេះ មនុស្សជិត ១០០នាក់ហើយ បានឆ្លងជំងឺអុតស្វា។ ស្របពេលដែលករណីថ្មី បន្តរកឃើញជាបន្តបន្ទាប់ អង្គការសុខភាពពិភពលោកកំពុងញាប់ដៃញាប់ជើងរកវិធីបង្ការជាបន្ទាន់ ខណៈប្រទេស បែលហ្សិក តម្រូវឱ្យអ្នកឆ្លងធ្វើចត្តាឡីស័ករយៈពេល ២១ថ្ងៃ។ រីឯប្រទេសថៃវិញ កំពុងជំរុញប្រជាពលរដ្ឋឱ្យផ្អាកទទួលទានសាច់ព្រៃ ដើម្បីការពារការចម្លងនៃមេរោគនេះ៕

ប្រែសម្រួល៖ សន្យា

ចុចអាន៖ WHO ព្រមានថា ករណីជំងឺអុតស្វា នឹងកើនឡើងកាន់តែច្រើន ទូទាំងពិភពលោក