រុស្ស៊ី អាចប្រមូលផលស្រូវសាលី ៩០ លានតោនក្នុងឆ្នាំ ២០២២ នេះ

ក្រុមហ៊ុន Rusagrotrans ដែលមានឯកទេសខាងដឹកជញ្ជូនគ្រាប់ធញ្ញជាតិតាមផ្លូវដែកបានឲ្យដឹងថា ប្រទេសរុស្ស៊ីអាចនឹងប្រមូលផលស្រូវសាលីចំនួន ៩០ លានតោនក្នុងឆ្នាំ ២០២២ នេះ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមអ្នកវិភាគនៅក្រុមហ៊ុន Rusagrotrans បានព្យាករណ៍ថា ផលិតកម្មស្រូវសាលីនៅក្នុងប្រទេសរុស្ស៊ីសម្រាប់ឆ្នាំ ២០២២ នេះនឹងកើនឡើងពីចំនួន ០.៧ លានតោន ដល់ចំនួន ៩០ លានតោន ជាពិសេសទិន្នផលស្រូវសាលីសម្រាប់ទីក្រុង Krasnodar, ដែនដី Stavropol និងតំបន់ Rostov ។

ចំណែកការប៉ាន់ប្រមាណសម្រាប់ការប្រមូលផលស្រូវសាលីសរុបសម្រាប់ដែនដី Southern Caucasus និង North Caucasus បានកើនឡើង ០.៧ លានតោនដល់កម្រិតកំណត់ត្រា ៣៨.៥ លានតោន ។

អ្នកវិភាគបានបន្ថែមថា ចំណែកការព្យាករណ៍សរុបសម្រាប់ការប្រមូលផលគ្រាប់ធញ្ញជាតិបានកើនឡើងដល់ ១៣៨.៦ លានតោនពី ១៣៨ លានតោនជាមួយនឹងការប៉ាន់ស្មានសម្រាប់ដំណាំផ្សេងទៀត ។

កាលពីថ្ងៃទី ២៦ ខែឧសភា ប្រធានាធិបតីរុស្ស៊ីលោក វ្ល៉ាឌីមៀ ពូទីន បាននិយាយថា ការប្រមូលផលស្រូវនៅឆ្នាំ ២០២២ របស់ប្រទេសអាចលើសពី ១៣០ លានតោន រួមទាំងស្រូវសាលីចំនួន ៨៧ លានតោន ។

គួរបញ្ជាក់ថា អ៊ុយក្រែន និងរុស្ស៊ីមានចំណែកប្រមាណ ៣០ ភាគរយនៃការនាំចេញស្រូវសាលីពិភពលោក ខណៈពោត ២០ ភាគរយ និងផ្កាឈូតរ័ត្ន ៧៦ ភាគរយ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ អ៊ុយក្រែន ប្រាប់ទីក្រុងបន្ទាប់ដែល រុស្ស៊ី នឹងបើកការវាយលុក