អាមេរិក កាត់បន្ថយការប្រើប្រាស់ទឹក ខណៈជួបប្រទះគ្រោះរាំងស្ងួតអាក្រក់បំផុត ក្នុងរយៈពេលជាង ១០០០ឆ្នាំ (មានវីដេអូ)

ក្រុមមន្ត្រីទីក្រុងវ៉ាស៊ីនតោន បាននិយាយកាលពីថ្ងៃអង្គារទី១៦ខែសីហាថា រដ្ឋមួយចំនួនរបស់សហរដ្ឋអាមេរិក ត្រូវតែកាត់បន្ថយការប្រើប្រាស់ទឹក ដើម្បីចៀសវាង “ការដួលរលំដ៏មហន្តរាយ” នៃទន្លេ Colorado ខណៈគ្រោះរាំងស្ងួតជាប្រវត្តិសាស្ត្រ កំពុងកើតឡើង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ភ្លៀងធ្លាក់ទាបជាងកម្រិតមធ្យមរយៈពេលជាងពីរទស្សវត្សរ៍ បានបណ្តាលឲ្យទន្លេដែលជាសរ​សៃឈាមនៃភាគខាងលិចសហរដ្ឋអាមេរិក ឈានដល់កម្រិតធ្ងន់ធ្ងរ ខណៈការប្រែប្រួលអាកា​សធាតុដែលបណ្តាលមកពីមនុស្ស បានធ្វើឲ្យវដ្តនៃភាពរាំងស្ងួតធម្មជាតិកាន់តែអាក្រក់ទៅៗ។

ថ្វីបើមានការព្រមានជាច្រើនឆ្នាំមកហើយក៏ដោយ រដ្ឋដែលពឹងផ្អែកលើទន្លេនេះ មិនអាចកាត់បន្ថយតម្រូវការរបស់ពួកគេឲ្យបានគ្រប់គ្រាន់នោះទេ ហើយកាលពីថ្ងៃអង្គារ រដ្ឋាភិបាលសហព័ន្ធនិយាយថា ខ្លួនកំពុងចាត់វិធានការកាត់បន្ថយការប្រើប្រាស់ទឹកទន្លេ។

លោកស្រី Tanya Trujillo ជំនួយការលេខាធិការផ្នែកទឹក និងវិទ្យាសាស្ត្រនៅក្រសួងមហាផ្ទៃ ​បាននិយាយថា “ដើម្បីចៀសវាងការដួលរលំដ៏មហន្តរាយនៃប្រព័ន្ធទន្លេ Colorado និងអនាគតនៃភាពមិនច្បាស់លាស់ និងជម្លោះ, ការប្រើប្រាស់ទឹកនៅក្នុងអាងនេះ ត្រូវតែកាត់បន្ថយ”។

ការបែងចែកទឹករបស់រដ្ឋ Arizona ពីទន្លេនេះ នឹងធ្លាក់ចុះ២១%នៅឆ្នាំ២០២៣ ខណៈរដ្ឋ Nevada នឹងទទួលបានតិចជាង៨%។

យ៉ាងណាក្តី California ដែលជារដ្ឋប្រើប្រាស់ទឹកទន្លេនេះធំជាងគេ និងមានប្រជាជនច្រើនជាងគេក្នុងចំណោមរដ្ឋភាគខាងលិច នឹងមិនរងផលប៉ះពាល់ឡើយនៅឆ្នាំក្រោយ។

ទន្លេ Colorado បានហូរចុះពីភ្នំ Rocky ហើយហូរឆ្លងកាត់រដ្ឋ Colorado, Utah, Arizona, Nevada, California និងភាគខាងជើងប្រទេសម៉ិកស៊ិក ជាកន្លែងដែលវាហូរចូលទៅក្នុងឈូងសមុទ្រ California។

ភាគខាងលិចនៃសហរដ្ឋអាមេរិក កំពុងរងទុក្ខវេទនាដោយសារគ្រោះរាំងស្ងួត ដែលឥឡូវនេះឈានដល់ឆ្នាំទី២៣ហើយ និងជាគ្រោះរាំងស្ងួតអាក្រក់បំផុតក្នុងរយៈពេលជាង១០០០ឆ្នាំ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ CNA

ចុចអាន៖ ទីក្រុង បារាំង ជាង ១០០ នៅតែគ្មានទឹកផឹក ដោយសារគ្រោះរាំងស្ងួត