ព័ត៌មានអន្ដរជាតិ

លោក ស៊ី ប្តេជ្ញាធ្វើទំនើបកម្មយោធាចិន ឆ្ពោះទៅកាន់ “ស្តង់ដារលំដាប់ពិភពលោក” (មានវីដេអូ)

បានផុស

៤ years មុន

នៅ

ថ្ងៃចន្ទ ១៧ តុលា ២០២២

ដោយ

ប្រធានាធិបតីចិន លោក ស៊ី ជីនពីង បានសន្យាថា យោធាចិន នឹងត្រូវបានធ្វើទំនើបកម្មឈានទៅកាន់ “ស្តង់ដារលំដាប់ពិភពលោក” នៅត្រឹមឆ្នាំ២០២៧ នៅពេលខ្លួនប្រារព្ធខួបមួយរយឆ្នាំ។ លោកបានធ្វើការអះអាងបែបនេះ នៅក្នុងសុន្ទរកថាបើក សមាជជាតិលើកទី២០របស់គណបក្សកុម្មុយនិស្តកាលពីថ្ងៃអាទិត្យទី១៦ខែតុលា។

លោក ស៊ី បានប្រាប់គណៈប្រតិភូនៅឯមហាវិមានប្រជាជនក្នុងទីក្រុងប៉េកាំងថា ក្នុងរយៈពេលប្រាំឆ្នាំខាងមុខ កងទ័ពរំដោះប្រជាជន (PLA) នឹងបង្កើនការហ្វឹកហ្វឺនកងទ័ព ហើយបង្កើនការត្រៀមខ្លួនប្រយុទ្ធនៅទូទាំងក្រុមប្រឹក្សាភិបាល។

លោកបន្តថា “យើងនឹងពង្រឹងការកសាងបក្សនៅទូទាំងក្រុមប្រឹក្សា ក្នុងជួរកងកម្លាំងប្រដាប់អាវុធប្រជាជន ដើម្បីធានាថា ពួកគេតែងតែគោរពតាមបញ្ជារបស់បក្ស។ ស្ថាប័ននានានឹងត្រូវបានបង្កើតឡើងនៅក្នុង PLA ដើម្បីកែលម្អការងារនយោបាយ ពង្រឹងការបញ្ជា ពង្រឹងវិន័យ និងប្រយុទ្ធប្រឆាំងអំពើពុករលួយក្នុងចំណោមជួររបស់ខ្លួន”។

លោក ស៊ី បន្ថែមថា ការមានយោធាដែលមានសមត្ថភាព គឺជាកិច្ចការយុទ្ធសាស្ត្រមួយសម្រាប់ការកសាងសង្គម “សង្គមនិយមសម័យទំនើប” ក្នុងប្រទេសចិន។ សន្តិសុខជាតិ គឺជាមូលដ្ឋានគ្រឹះនៃការស្តារប្រទេសឡើងវិញ។

ទោះបីជាយ៉ាងណាក៏ដោយ លោកបានរំលឹកឡើងវិញថា ទីក្រុងប៉េកាំងនឹងមិនស្វែងរកអនុត្តរភាពលើឆាកអន្តរជាតិឡើយ ដោយសារប្រទេសនេះ បដិសេធគ្រប់ទម្រង់នៃនយោបាយអំណាច និងការជ្រៀតជ្រែកកិច្ចការផ្ទៃក្នុងរបស់រដ្ឋដទៃ។ លោកបន្តថា ប្រទេសនេះខិតខំធ្វើឲ្យមានអន្តរកម្មវិជ្ជមានជាមួយនឹងតួអង្គសំខាន់ៗផ្សេងទៀត ដើម្បីសម្រេចឲ្យបាននូវការរួមរស់ដោយសន្តិភាព និងស្ថិរភាព។