លោក Hakeem Jeffries ក្លាយជាមេដឹកនាំរដ្ឋសភាអាមេរិក ស្បែកខ្មៅដំបូងគេ

នៅថ្ងៃព្រហស្បតិ៍ទី០១ខែធ្នូនេះ អ្នកប្រជាធិបតេយ្យ បានបោះឆ្នោតជ្រើសរើសសមាជិកសភាទីក្រុងញូវយ៉កលោក Hakeem Jeffries ឲ្យក្លាយជាមេដឹកនាំថ្មីរបស់ពួកគេ។

រឿងនេះធ្វើឲ្យគាត់ក្លាយជាជនជាតិអាមេរិកស្បែកខ្មៅទី១ ដែលដឹកនាំគណបក្សនយោបាយដ៏ធំមួយនៅក្នុងរដ្ឋសភា បន្ទាប់ពីលោកស្រី Nancy Pelosi ប្រកាសថា លោកស្រីនឹងលាលែងដើម្បីត្រួសត្រាយផ្លូវសម្រាប់ អ្នកជំនាន់​ថ្មី។

លោក Jeffries អាយុ៥២ឆ្នាំ នឹងទទួលតួនាទីជាមេដឹកនាំសំឡេងភាគតិចនៅពេលដែលរដ្ឋសភាថ្មី ស្បថចូលកាន់តំណែងនៅដើមឆ្នាំក្រោយ។

នៅក្នុងការបង្ហាញពីការរួបរួមបន្ទាប់ពីចាញ់សភា ប៉ុន្តែបង្ហាញពីលទ្ធផលខ្លាំងជាងការរំពឹងទុកនៅក្នុងការបោះឆ្នោតពាក់កណ្តាលអាណត្តិ, គណបក្សប្រជាធិបតេយ្យបានអនុម័តជាឯកច្ឆ័ន្ទលើលោក Jeffries និងតំណែងកំពូលពីរផ្សេងទៀត។

ពេលចេញពីបន្ទប់ប្រជុំបិទទ្វារ មេដឹកនាំដែលនឹងចូលកាន់តំណែងក្នុងពេលឆាប់ៗនេះ បានប្រកាសថា “គណបក្សប្រជាធិបតេយ្យ តស៊ូដើម្បីប្រជាជន។ នោះ​ជា​រឿង​របស់​យើង។ នោះ​ជា​កេរ្តិ៍ដំណែល​របស់​យើង។ នោះជាគុណតម្លៃរបស់យើង។ នោះ​ជា​ការ​ប្ដេជ្ញា​ចិត្ត​របស់​យើង”៕

ប្រែសម្រួល៖ Vann Vann

ប្រភព៖ Guardian

ចុចអាន៖ លោកស្រី Pelosi ប្រកាសលាលែងពីតំណែង ជាមេដឹកនាំសភា