កីឡា

កម្ពុជាឈ្នះមេដាយច្រើនជាងគេពីជើងឯកអុកចត្រង្គអាស៊ាន ឆ្នាំ២០២៣

បានផុស

៣ years មុន

នៅ

ថ្ងៃសុក្រ ១៣ មករា ២០២៣

ដោយ

ក្រុមកីឡាអុកចត្រង្គកម្ពុជាបានឈ្នះមេដាយច្រើនជាងគេពីការប្រកួតកីឡាអុកចត្រង្គជ្រើសរើសជើងឯកអាស៊ីអាគ្នេយ៍ លើកទី១ ឆ្នាំ២០២៣ (SEA OUK CHAKTRANG Championship 2023) ដែលកម្ពុជាធ្វើជាម្ចាស់ផ្ទះបានបញ្ចប់នៅល្ងាចថ្ងៃទី១២ ខែមករានេះ បន្ទាប់ពីដំណើរការប្រកួតតាំងពីថ្ងៃទី៧ ខែមករា នៅសាកលវិទ្យាល័យភូមិន្ទភ្នំពេញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងនាមជាម្ចាស់ផ្ទះ ក្រុមអុកចត្រង្គកម្ពុជាឈរលើកំពូលតារាងពីការឈ្នះមេដាយមាស៣គ្រឿង ប្រាក់៣គ្រឿង និងសំរឹទ្ធ២គ្រឿង សរុប៨គ្រឿង។ ចំណែកវៀតណាមស្ថិតនៅលេខ២ពីការឈ្នះមេដាយសរុប ៧គ្រឿងគឺមាស២ ប្រាក់៣ និងសំរឹទ្ធ២ ខណៈមីយ៉ាន់ម៉ា ឈរលេខ៣ ពីការឈ្នះ មេដាយមាស១ និងសំរឹទ្ធ២ ហើយថៃ ឈ្នះមេដាយប្រាក់១ និងសំរឹទ្ធ២ ស្របពេលឡាវមិនទទួលបានមេដាយណាមួយនោះទេ។

ការឈ្នះមេដាយច្រើនជាងគេនេះជាសមិទ្ធផលថ្មីមួយសម្រាប់សហព័ន្ធកីឡាអុកចត្រង្គកម្ពុជាក្នុងការត្រៀមខ្លួនសម្រាប់ការប្រកួតកីឡាស៊ីហ្គេម លើកទី៣២ ឆ្នាំ២០២៣ ដែលកម្ពុជាធ្វើជាម្ចាស់ផ្ទះ ស្របពេលកីឡាអុកចត្រង្គនេះក៏ត្រូវបានដាក់បញ្ចូលឲ្យប្រកួតដណ្តើមមេដាយជាផ្លូវការដែរ។

ពិធីបិទបានធ្វើនៅល្ងាចថ្ងៃទី១២ ខែមករា នេះក្រោមវត្តមានលោក វ៉ាត់ ចំរើន រដ្ឋលេខាធិការក្រសួងទេសចរណ៍ និងជាអគ្គលេខាធិការគណៈកម្មាធិការជាតិរៀបចំការប្រកួតកីឡាស៊ីហ្គេម លើកទី៣២ ឆ្នាំ២០២៣ (CAMSOC), លោក អ៊ុក សិទ្ធិជាតិ អគ្គនាយកនៃអគ្គនាយកដ្ឋានកីឡា និងលោក គុជ គីមឡុង ប្រធានសហព័ន្ធកីឡាអុកចត្រង្គកម្ពុជា។

សូមបញ្ជាក់ថា កីឡាប្រកួតអុកចត្រង្គកម្រិតអាស៊ានលើកដំបូងនៅកម្ពុជានេះមាន៦វិញ្ញាសា ដោយមានប្រតិភូ និងកីឡាករ-កីឡាការិនីចូលរួមសរុប ៦២នាក់ មកពី ៥ប្រទេស រួមមានម្ចាស់ផ្ទះកម្ពុជា វៀតណាម ថៃ មីយ៉ាន់ម៉ា និងឡាវ៕

អត្ថបទ៖ វីរបុត្រ

Related Topics:កីឡាអុកចត្រង្គ