ប្រមុខ ណាតូ ​ថា ចិន ជាប្រទេសបង្កបញ្ហាប្រឈមដ៏ធំ ចំពោះសម្ព័ន្ធភាពនេះ

អគ្គលេខាធិការអង្គការណាតូ លោក Jens Stoltenberg បាននិយាយកាលពីថ្ងៃចន្ទទី៣០ខែមករាថា ប្រទេសចិនមិនជឿលើតម្លៃលទ្ធិប្រជាធិបតេយ្យនៃអង្គការនេះទេ ហើយបានបង្កបញ្ហាប្រឈមសម្រាប់សន្តិសុខ និងផលប្រយោជន៍របស់សម្ព័ន្ធភាពនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Stoltenberg បាននិយាយក្នុងអំឡុងវគ្គឆ្លើយសំណួរនៅវិទ្យាស្ថានសិក្សាកម្រិតខ្ពស់ CHEY ក្នុងទីក្រុងសេអ៊ូល ប្រទេសកូរ៉េខាងត្បូងថា “យើងមិនចាត់ទុកចិនជាសត្រូវទេ យើងជឿថា យើងគួរតែចូលរួមជាមួយចិនលើបញ្ហានានាដូចជា ការគ្រប់គ្រងអាវុធ បម្រែបម្រួលអាកាសធាតុ និងបញ្ហាផ្សេងៗទៀត។ ប៉ុន្តែទន្ទឹមនឹងនោះ យើងច្បាស់ណាស់ថា ចិនបានបង្កបញ្ហាប្រឈមចំពោះតម្លៃរបស់យើង ផលប្រយោជន៍របស់យើង និងសុវត្ថិភាពរបស់យើង។ មានហេតុផលជាច្រើនសម្រាប់រឿងនោះ មួយផ្នែកដោយសារតែប្រទេសចិនមិនចែករំលែកតម្លៃរបស់យើង”។

ប្រមុខអង្គការណាតូបានបន្ថែមថា តាមការវិនិច្ឆ័យពីគោលនយោបាយរបស់ទីក្រុងប៉េកាំងស្តីពីជនជាតិភាគតិច និងសិទ្ធិប្រជាធិបតេយ្យ, ប្រទេសចិនមិនជឿលើលទ្ធិប្រជាធិបតេយ្យ និងសេរីភាពនៃការបញ្ចេញមតិឡើយ។

លោកបន្តថា​ “ចិនក៏ជាបញ្ហាប្រឈមមួយដែរ ព្រោះយើងមើលឃើញថា ចិនកំពុងវិនិយោគយ៉ាងខ្លាំងលើសមត្ថភាពយោធាទំនើបថ្មីៗ រួមទាំងមីស៊ីលរយៈចម្ងាយឆ្ងាយដែលអាចហោះទៅដល់ទឹកដីណាតូទាំងអស់ផងដែរ។ លើសពីនេះ ចិនកំពុងអភិវឌ្ឍអាវុធនុយក្លេអ៊ែរកម្រិតខ្ពស់ និងបង្កើនសមត្ថភាពកងទ័ពជើងទឹក”។

គួរបញ្ជាក់ជាថ្មី កាលពីខែមិថុនាឆ្នាំ២០២២ អង្គការណាតូបានអនុម័តគោលការណ៍យុទ្ធសាស្ត្រថ្មីក្នុងកិច្ចប្រជុំកំពូលរបស់ខ្លួននៅទីក្រុងម៉ាឌ្រីដនៃប្រទេសអេស្ប៉ាញ។ គោលការណ៍នោះ គឺជាឯកសារសំខាន់របស់អង្គការ ដែលបញ្ជាក់ពីតម្លៃ និងគោលដៅរបស់សម្ព័ន្ធភាព ហើយបង្ហាញពីការប៉ាន់ស្មានរួមនៃស្ថានភាពសន្តិសុខ។ គោលការណ៍ឆ្នាំ២០២២ និយាយថា “មហិច្ឆតា និងគោលនយោបាយបង្ខិតបង្ខំរបស់ចិន បានបង្កជាបញ្ហាប្រឈមចំពោះផលប្រយោជន៍ សន្តិសុខ និងតម្លៃរបស់ណាតូ”៕

ប្រែសម្រួល៖ Vann Vann

ប្រភព៖ Urdupoint

ចុចអាន៖ ប្រមុខណាតូ ជំរុញឲ្យកូរ៉េខាងត្បូង បង្កើនការគាំទ្រផ្នែកយោធាដល់ អ៊ុយក្រែន