មន្ទីរអប់រំរាជធានី ត្រៀមចាក់វ៉ាក់សាំងដូសជំរុញ ជូនបុគ្គលិកអប់រំ និងសិស្សានុសិស្ស

នាព្រឹកថ្ងៃទី៣ ខែកុម្ភៈ ឆ្នាំ២០២៣ នៅមន្ទីរអប់រំ យុវជន និងកីឡា រាជធានីភ្នំពេញ មានការរៀបចំកិច្ចប្រជុំស្ដីពី ការត្រៀមចាក់វ៉ាក់សាំងដូសជំរុញ ជូនបុគ្គលិកអប់រំ និងសិស្សានុសិស្ស ក្នុងរាជធានីភ្នំពេញ ក្រោមការដឹកនាំដោយ លោក ហែម ស៊ីណារ៉េត ប្រធានមន្ទីរអប់រំ យុវជន និងកីឡា ដែលមានសមាជិកចូលរួមចំនួន ២៧០ នាក់។

ការចាក់វ៉ាក់ស៊ាំងដូសជំរុញ ត្រូវបានធ្វើឡើងយោងតាមអនុសាសន៍ដ៏ខ្ពស់ខ្ពស់របស់ សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដើម្បីបន្តរក្សានូវនិរន្តរភាពនៃដំណើរការប្រទេសជាតិប្រក្រតី និងការរស់នៅជាធម្មតាតាមប្រក្រតីភាពថ្មីរួមទាំងសកម្មភាពសេដ្ឋកិច្ច និងសង្គមជាតិ។

តាមរយៈការចាក់វ៉ាក់ស៊ាំងលើកនេះ នឹងមានសិស្សានុសិស្សចំនួន ២៣៩ ៨៦៣ នាក់នឹងទទួលបានការចាក់ដូសជំរុញ ដែលនឹងចាប់ផ្តើមថ្ងៃទី៦ ខែកុម្ភៈ ដល់ថ្ងៃទី៤ ខែមីនា ឆ្នាំ២០២៣ ដោយក្រុមគ្រូពេទ្យស្ម័គ្រចិត្តយុវជនសម្តេចតេជោ (TYDA) ។

ក្រសួងអប់រំ យុវជន និងកីឡា សូមថ្លែងអំណរគុណដល់ក្រសួងសុខាភិបាល និងក្រុមគ្រូពេទ្យស្ម័គ្រចិត្តយុវជនសម្តេចតេជោ ដែលបានចូលរួមសហការសម្របសម្រួលក្នុងការផ្តល់ដូសជំរុញជូនដល់បុគ្គលិកអប់រំ លោកគ្រូ អ្នកគ្រូ និងសិស្សានុសិស្ស ដើម្បីឱ្យកម្ពុជាអាចដំណើរការសាលារៀនប្រកបដោយសុវត្ថិភាព ពីការរាតត្បាតដោយជំងឺកូវីដ-១៩៕