អាមេរិក និយាយថា ចិន បានបង្ហោះបាឡុងជាច្រើន លើទ្វីបចំនួន ៥ឯណោះ (មានវីដេអូ)

សហរដ្ឋអាមេរិកជឿថា បាឡុងចារកម្មចិន ដែលត្រូវបានបាញ់ទម្លាក់លើទឹកដីរបស់ខ្លួន គឺជាផ្នែកមួយ នៃក្រុមបាឡុងដ៏ធំដែលគេបង្ហោះលាតសន្ធឹងលើទ្វីបចំនួនប្រាំឯណោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋមន្ត្រីការបរទេសអាមេរិកលោក Antony Blinken និយាយថា “សហរដ្ឋអាមេរិក មិនមែនជាគោលដៅតែមួយ នៃកម្មវិធីដ៏ធំនេះទេ”។ លោកបន្ថែមថា ទីក្រុងវ៉ាស៊ីនតោន បានចែករំលែកព័ត៌មានដែលប្រមូលបានពីកម្ទេចកម្ទីបាឡុង ជាមួយប្រទេសរាប់សិបផ្សេងទៀត។

ដោយលើកឡើងប្រភពពីមន្ត្រីដែលមិនបញ្ចេញឈ្មោះ កាសែត Washington Post បានរាយការណ៍ថា សហរដ្ឋអាមេរិកជឿថា គម្រោងបាឡុងឃ្លាំមើលនេះ គឺចេញដំណើរពីខេត្ត ហៃណាន របស់ប្រទេសចិន ហើយបណ្តាប្រទេសនិងកោះជាគោលដៅរួមមាន ជប៉ុន ឥណ្ឌា វៀតណាម តៃវ៉ាន់ និងហ្វីលីពីន។

ដោយឡែកនៅក្នុងសន្និសីទសារព័ត៌មានកាលពីថ្ងៃពុធ អ្នកនាំពាក្យក្រសួងការពារជាតិ ឧត្តមសេនីយ៍ទោ Pat Ryder បានបញ្ជាក់ថា សហរដ្ឋអាមេរិកជឿថា បាឡុងស្រដៀងគ្នានេះ បានប្រតិបត្តិការលើដែនអាកាសអាមេរិកខាងជើង និងខាងត្បូង អាស៊ីអាគ្នេយ៍ អាស៊ីបូព៌ា និងអឺរ៉ុប។

ទោះបីជាយ៉ាងណាក៏ដោយ ប្រទេស​ចិន​បាន​បដិសេធ​ថា បាឡុង​នេះ​មិនមែន​ត្រូវ​បាន​​ប្រើ​ក្នុង​គោល​បំណង​ចារកម្ម​ឡើយ ហើយ​និយាយ​ថា ​វា​ជា​ឧបករណ៍​អាកាសធាតុ​ដែលហោះ​ខុសផ្លូវប៉ុណ្ណោះ។

គួរបញ្ជាក់ជាថ្មី បាឡុង ត្រូវបានបាញ់ទម្លាក់ដោយយន្តហោះចម្បាំងលើឆ្នេរសមុទ្រ South Carolina កាលពីថ្ងៃអាទិត្យទី០៥ខែកុម្ភៈ។ ទង្វើនេះ បានបង្កឲ្យមានវិបត្តិការទូត និងជំរុញឲ្យលោក Blinken លុបចោលដំណើរទស្សនកិច្ចទៅកាន់ប្រទេសចិនភ្លាមៗ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ BBC

ចុចអាន៖ ចិន ចង់បានបាឡុងរបស់ខ្លួន មកវិញ