លួចម៉ូតូពីខណ្ឌចំការមន​យកមកលក់នៅច្បារអំពៅ​ត្រូវនគរបាលចាប់ឃាត់ខ្លួន

មុខសញ្ញាជនសង្ស័យលួចម៉ូតូចំនួន២នាក់ ត្រូវនគរបាលប៉ុស្ដិ៍ច្បារអំពៅទី២ ខណ្ឌច្បារអំពៅចាប់ខ្លួនបន្ទាប់ពីជនសង្ស័យយកម៉ូតូដែលខ្លួនលួចបានពីយប់នៅខណ្ឌចំការមនរួចមកលក់នៅសង្កាត់ច្បារអំពៅទី២។

នគរបាលប៉ុស្តិ៍ច្បារអំពៅទី២ បានឲ្យដឹងថា បុរសជនសង្ស័យទាំង២ម្នាក់ឈ្មោះហុង ភារ៉ា អាយុ១៨ឆ្នាំ និងម្នាក់ទៀតឈ្មោះ ធី បញ្ញា អាយុ១៥ឆ្នាំ ស្នាក់នៅភូមិដើមចាន់សង្កាត់ច្បារអំពៅទី២ ខណ្ឌច្បារអំពៅរាជធានីភ្នំពេញ។

ជនសង្ស័យបានសារភាពថា នៅវេលាម៉ោង៤ និង៣០នាទី ទៀបភ្លឺឈានចូលថ្ងៃទី ២០ ខែកុម្ភៈនេះពួកវាបានធ្វើសកម្មភាពលួចម៉ូតូសេ ១២៥ នៅក្រោយភោជនីយដ្ឋានសាគូរ៉ា ផ្លូវព្រះមុនីវង្សភូមិ៩ សង្កាត់បឹងកេងកង៣ ខណ្ឌបឹងកេងកងរាជធានីភ្នំពេញរួចបណ្តើមកផ្ទះនៅភូមិដើមចាន់សង្កាត់ច្បារអំពៅ២។ លុះព្រឹកឡើងពួកគេបណ្តើរម៉ូតូយកទៅលក់ឲ្យអ្មកជិតខាងក៏ត្រូវនគរបាលប៉ុស្តិ៍ច្បារអំពៅ២ចាប់ខ្លួនបានតែម្តង។

នគរបាលបាននិយាយថា ជនរងគ្រោះជាម្ចាស់ម៉ូតូឈ្មោះ សែ គឹមស៊ុន ភេទប្រុសអាយុ២១ ឆ្នាំ ជាបុគ្គលិកក្នុងភោជនីយដ្ឋាន សាគូរ៉ា។ ចំណែកម៉ូតូក៏ត្រូវបាននគរបាលប្រគល់ទៅជនរងគ្រោះវិញ ហើយកសាងសំណុំរឿងបញ្ជូនជនសង្ស័យទៅសាលាដំបូងរាជធានីភ្នំពេញ៕

អត្ថបទ៖ នរា