គន្លឹះទាំង ៤ ជួយការពារពីហានិភ័យជំងឺមហារីកជាច្រើនប្រភេទ

មហារីកជាជំងឺដ៏គ្រោះថ្នាក់មួយ ទោះបីជាវាពិបាកក្នុងការព្យាបាលក៏ដោយ ប៉ុន្តែមានវិធីមួយចំនួនដើម្បីការពារកាត់បន្ថយហានិភ័យនៃការកើតជំងឺមហារីកជាច្រើនប្រភេទទូទៅ ដោយធ្វើឲ្យអ្នកជៀសវាងពីជំងឺដ៏កាចសាហាវមួយនេះ ។

ខាងក្រោមនេះគឺជាគន្លឹះទាំង ៤ ជួយការពារមហារីកទាន់ពេល ៖

១. ជៀសវាងការជក់បារី និងការប្រើប្រាស់គ្រឿងស្រវឹងច្រើនពេក

តាមការសិក្សាបង្ហាញថា កត្តាសំខាន់ពីរដែលនាំឱ្យកើតជំងឺមហារីក គឺការទទួលទានគ្រឿងស្រវឹង ច្រើនហួសហេតុ និងការជក់បារី។ ការប្រើប្រាស់ថ្នាំជក់ បារី បណ្តាលឱ្យខូចរាងកាយរយៈពេលវែង ព្រមទាំងនាំឱ្យកើតមហារីកសួត មាត់ បំពង់ក ប្លោកនោម មាត់ស្បូន និងតម្រងនោម។ ទោះបីជាអ្នកមិនជក់បារីក៏ដោយ ការរស់នៅក្នុងបរិយាកាសពោរពេញដោយផ្សែងបារី ក៏បង្កើនហានិភ័យនៃជំងឺ មហារីកផងដែរ។

២. បង្កើតរបបអាហារដែលមានសុខភាពល្អ

អ្នកជំនាញមកពីអង្គការសុខភាពពិភពលោក (WHO) ចែករំលែកថា ការជៀសវាងអាហារដែលមានកាឡូរីខ្ពស់ ស្ករ ខ្លាញ់សត្វ និងសាច់កែច្នៃ នឹងជួយអ្នកការពារមហារីកមួយចំនួនយ៉ាងមានប្រសិទ្ធភាព។ របបអាហារបួស ឬទទួលទានត្រីច្រើនជាងសាច់គោនិងជ្រូក ក៏ជួយអ្នកកាត់បន្ថយហានិភ័យ នៃជំងឺមហារីកសុដន់ផងដែរ ជាពិសេសចំពោះស្ត្រី។

៣. ការពារស្បែករបស់អ្នក

មហារីកស្បែកជាជំងឺមហារីកទូទៅដែលកើតមានច្រើនបំផុតមួយក្នុងពិភពលោក យោងតាមគ្លីនិកជាច្រើនបានណែនាំឲ្យត្រូវបិទបាំងស្បែករបស់អ្នកយ៉ាងប្រុងប្រយ័ត្ន នៅពេលដែលត្រូវពន្លឺព្រះអាទិត្យដោយផ្ទាល់។ ក្រៅពីនេះអ្នកក៏ត្រូវនៅឱ្យឆ្ងាយពីក្រោមពន្លឺថ្ងៃ និងពន្លឺព្រះអាទិត្យ លើសពីនេះ អ្នកក៏ត្រូវប្រើឡេការពារកម្តៅថ្ងៃដែលមាន SPF 30 ឬខ្ពស់ជាងនេះ សូម្បីតែថ្ងៃដែលមានពពកច្រើន ។

៤. លំហាត់ប្រាណទៀងទាត់

ការមានលំហាត់ប្រាណទៀងទាត់នឹងជួយអ្នករក្សាទម្ងន់ដ៏ល្អរបស់អ្នក ព្រមទាំងមានថាមពលកាន់តែច្រើនជារៀងរាល់ថ្ងៃ។ ក្រៅពីនេះ ទម្លាប់នេះក៏កាត់បន្ថយហានិភ័យនៃជំងឺមហារីកសុដន់ ក្រពេញ ប្រូស្តាត សួត ពោះវៀនធំ និងមហារីកតម្រងនោមបានយ៉ាងច្រើន ៕

ប្រែសម្រួល៖នាងតូច

ចុចអាន៖វិធីសាស្ត្រងាយៗ ទាំង ៨ ការពារតម្រងនោមយ៉ាងមានប្រសិទ្ធភាព