រុស្ស៊ី៖ ទីក្រុងកៀវ និង​អាយ៉ង​លោក​ខាង​លិច ព្យាយាម​ធ្វើ​​គ្រប់​យ៉ាង​ ដើម្បី​អូសបន្លាយ​ជម្លោះ (មានវីដេអូ)

រដ្ឋមន្ត្រីការបរទេសរុស្ស៊ីលោក Sergey Lavrov បាននិយាយនៅក្នុងបទសម្ភាសន៍មួយជាមួយ air.ru ដែលចុះផ្សាយលើគេហទំព័រក្រសួងការបរទេសនៅថ្ងៃអង្គារទី០៤ខែមេសាថា​ រដ្ឋាភិបាលទីក្រុងកៀវ និងអាយ៉ងលោកខាងលិច ព្យាយាមធ្វើអ្វីៗគ្រប់យ៉ាងដែលពួកគេអាចធ្វើបាន ដើម្បីអូសបន្លាយអរិភាព។

ដោយអត្ថាធិប្បាយលើផែនការសន្តិភាពសម្រាប់អ៊ុយក្រែន ដែលស្នើឡើងដោយប្រទេសចិន លោក Lavrov បានកត់សម្គាល់ថា វាគឺជាធាតុសម្រាប់វិធីសាស្រ្តសំខាន់ៗរបស់រុស្ស៊ី។

លោករដ្ឋមន្ត្រីបានកត់សម្គាល់ថា “ជាពិសេសទាក់ទងនឹងតម្រូវការដើម្បីធានាឲ្យមានសន្តិសុខស្មើគ្នា និងមិនអាចបំបែកបានសម្រាប់ប្រទេសទាំងអស់នៅក្នុងទ្វីបអឺរ៉ុប និងនៅក្នុងពិភពលោកទាំងមូល។ រហូតមកដល់ពេលនេះ ដំណើរការសន្តិភាពត្រូវបានរារាំងដោយទីក្រុងកៀវ និងអាយ៉ងលោកខាងលិច ដែលបានប្រឹងប្រែងអស់ពីកម្លាំងកាយចិត្ត ដើម្បីអូសបន្លាយអរិភាព”។

លោក Lavrov បានកត់សម្គាល់ទៀតថា មេដឹកនាំរុស្ស៊ីលោក វ្ល៉ាឌីមៀរ ពូទីន និងមេដឹកនាំចិនលោក ស៊ី ជីនពីង ក៏បានគូសបញ្ជាក់ផងដែរ អំពីសារសំខាន់សម្រាប់កិច្ចសម្របសម្រួលយ៉ាងជិតស្និទ្ធបន្ថែមទៀតលើគោលនយោបាយការបរទេស។

គួរបញ្ជាក់ថា ការលើកឡើងរបស់លោក Lavrov កើតឡើងបន្ទាប់ពី រុស្ស៊ី​បាន​អនុម័ត​គោល​​នយោបាយ​ការបរទេស​ថ្មី ​ក្នុង​​គោល​បំណង​បង្កើត​សម្ព័ន្ធ​ប្រឆាំង​លោក​ខាង​លិច ហើយ​ពង្រឹង​ទំនាក់​ទំនង​ជាមួយ​ចិន និង​ឥណ្ឌា។

នៅក្នុងឯកសារនោះ រុស្ស៊ីបានចោទប្រកាន់សហរដ្ឋអាមេរិក និងប្រទេសលោកខាងលិចផ្សេងទៀតថា បានចាប់ផ្តើម “សង្រ្គាមកូនកាត់” ដើម្បីឆ្លើយតបទៅនឹងវិធានការដែលរុស្ស៊ីបានអនុវត្តសម្រាប់ការពារផលប្រយោជន៍ជាតិដ៏សំខាន់របស់ខ្លួននៅក្នុងប្រទេសអ៊ុយក្រែន៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ TASS

ចុចអាន៖ រុស្ស៊ី ចេញគោលនយោបាយថ្មី បង្កើតសម្ព័ន្ធប្រឆាំងលោកខាងលិច និង ពង្រឹងទំនាក់ទំនងជាមួយ ចិន