គណបក្សភឿថៃរងបណ្តឹងរំលាយបក្សក្រោមបទចោទប្រើគោលនយោបាយចែកលុយឌីជីថល

នាព្រឹកថ្ងៃទី២៨ ខែមេសានេះ នៅការិយាល័យអ្នកត្រួតពិនិត្យផែនដី លោក សុនធីយ៉ា សាវាត់ឌី ទីប្រឹក្សាគណៈកម្មាធិការទទួលបន្ទុកផ្នែកច្បាប់ យុត្តិធម៌ និងសិទ្ធិមនុស្ស សភាតំណាងរាស្រ្ត បានដាក់ពាក្យបណ្តឹងទៅកាន់ការិយាល័យអ្នកត្រួតពិនិត្យផែនដី និងការិយាល័យទទួលពាក្យបណ្តឹង ស្នើឱ្យពិចារណា និងមានមតិបញ្ជូនទៅកាន់តុលាការធម្មនុញ្ញថៃដើម្បីសម្រេចថា តើគោលនយោបាយឃោសនាបោះឆ្នោតរបស់គណបក្សភឿថៃ គឺពិតជាផ្ទុយនឹងរដ្ឋធម្មនុញ្ញមាត្រា ២៥៨ ក (២) (៣) ដែរឬទេ? ដោយលោក សុនធីយ៉ា សាវាត់ឌី បាននិយាយថា នៅថ្ងៃទី៧ ខែធ្នូ ឆ្នាំ២០២២ លោកស្រី ផេថងថាន ឈីណាវ៉ាត់ មេគ្រួសារភឿថៃ និងជាបេក្ខជននាយករដ្ឋមន្ត្រីរបស់គណបក្សភឿថៃបានប្រកាសគោលនយោបាយយុទ្ធនាការបោះឆ្នោតចំនួន ១០ចំណុច ដោយបានធ្វើការឃោសនាពីទីក្រុងបាងកករហូតដល់ខេត្តសាមុតប្រាកាន និងខេត្តសាមុតសាខន ដោយពិនិត្យឃើញថា ការឃោសនានេះប៉ះពាល់នឹងច្បាប់បោះឆ្នោត ដែលបានប្រកាសថា (ពលរដ្ឋដែលមានអាយុចាប់ពី១៦ឆ្នាំឡើងនឹងមានលុយឌីជីថលក្នុងកុងចំនួន ១ម៉ឺនបាត) នឹងចែកដល់ពលរដ្ឋថៃប្រមាណ ៥៥លាននាក់ បើគណបក្សភឿថៃឈ្នះការបោះឆ្នោតដឹកនាំរដ្ឋាភិបាលនាពេលខាងមុខ៕

ប្រែសម្រួល៖ គង់ សំអាន

ប្រភព៖ naewna

ចុចអាន៖ ប៉ូលិសប្រឆាំងបទល្មើសបច្ចេកវិទ្យា ថៃ បង្ក្រាបក្រុមឆបោកផ្ដល់ប្រាក់កម្ចី​តាមអនឡាញ និងជួយជនរងគ្រោះ ៤០០ នាក់

ចុចអាន៖ បក្សភឿថៃរបស់កូនស្រីលោក ថាក់ស៊ីន នឹងដំឡើងថ្លៃកៅស៊ូជួយកសិករ ពេលជាប់ឆ្នោត