កីឡា

រឿងអស្ចារ្យ៣យ៉ាងធ្វើឲ្យពិភពលោកផ្តោតអារម្មណ៍ខ្លាំងលើស៊ីហ្គេមកម្ពុជា

បានផុស

៣ years មុន

នៅ

ថ្ងៃសុក្រ ១៩ ឧសភា ២០២៣

ដោយ

កម្ពុជាក្នុងនាមជាម្ចាស់ផ្ទះរៀបចំការប្រកួតកីឡាស៊ីហ្គេម លើកទី៣២ ឆ្នាំ២០២៣ កំពុងទទួលបានការចាប់អារម្មណ៍យ៉ាងខ្លាំងពីពិភពខាងក្រៅជុំវិញការរៀបចំប្រកបដោយជោគជ័យ និងបង្កើតបានជាប្រវត្តិសាស្ត្រលើកដំបូង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សូមលើកយករឿងល្អ៣យ៉ាងដែលពិភពលោកកំពុងផ្តោតអារម្មណ៍ខ្លាំងលើកម្ពុជាក្នុងនាមជាម្ចាស់ផ្ទះរៀបចំការប្រកួតកីឡាស៊ីហ្គេម លើកទី៣២ ដែលត្រូវបានបិទបញ្ចប់កាលពីយប់ថ្ងៃទី១៧ ខែឧសភា ឆ្នាំ២០២៣។

១. ស្មារតីតស៊ូរបស់កីឡាការិនី ប៊ូ សំណាង

វីដេអូរត់ប្រណាំងរបស់កីឡាការិនី ប៊ូ សំណាង ត្រូវបានសារព័ត៌មានធំៗជុំវិញពិភពលោកចុះផ្សាយ និងនៅតែកំពុងបន្តផ្សព្វផ្សាយយ៉ាងទូលំទូលាយរហូតដល់ឥឡូវនេះ។ ការតស៊ូ និងមិនបោះបង់ចោលការរត់ប្រកួតក្រោមតំណក់ទឹកភ្លៀង ទោះបីជាដឹងខ្លួនថា ស្ថិតនៅចុងក្រោយគេ ក៏កីឡាការិនីកម្ពុជារូបនេះនៅបន្តរត់រហូតដល់ទីបញ្ចប់។ ទិដ្ឋភាពនេះជាតម្លៃនៃការអប់រំមិនអាចកាត់ថ្លៃបាន និងមិនអាចយកប្រាក់ទិញដូរបានឡើយដែលបានក្លាយជានិម្មិតរូបនៃការតស៊ូក្នុងជីវិត។ នេះជាតម្លៃនៃការផ្សព្វផ្សាយដែលកម្ពុជាទទួលបានផលចំណេញដ៏ច្រើនលើសលប់។

២. ការសម្តែងពិធីបើក-បិទដ៏អស្ចារ្យ

ពិធីបើកកីឡាស៊ីហ្គេម លើកទី៣២ កាលពីថ្ងៃទី៥ ខែឧសភា បានធ្វើឲ្យពិភពខាងក្រៅភ្ញាក់ផ្អើលយ៉ាងខ្លាំងដែលកម្ពុជាអាចធ្វើរឿងដ៏អស្ចារ្យមិនធ្លាប់មាន។ ពិតណាស់ ការរៀបចំពិធីសម្តែងជាច្រើនក្នុងពិធីបើកស៊ីហ្គេមរបស់កម្ពុជាគឺកម្រិតអូឡាំពិក។ វាមានលក្ខណៈអស្ចារ្យលើសពីកម្រិតកីឡាអាស៊ាន និងអាស៊ីថែមទៀត។ នៅក្នុងពិធីបិទក៏មានការសម្តែងអស្ចារ្យជាច្រើនដែរ បើទោះជាមានកម្មវិធីផ្លូវការច្រើនដូចជាសុន្ទរកថា ពិធីបង្ហូតទង់ជាតិ ពិធីពន្លត់ភ្លើងគប់ ពិធីប្រគល់ទង់ស៊ីហ្គេមដល់ម្ចាស់ផ្ទះបន្ទាប់ជាដើម។

បន្ទាប់ពីពិធីបិទជាផ្លូវការកាលពីយប់ថ្ងៃទី១៧ ខែឧសភា សារព័ត៌មានធំៗជាច្រើនបានផ្សព្វផ្សាយយ៉ាងទូលំទូលាយអំពីភាពជោគជ័យលើការរៀបចំលើកដំបូងរបស់ម្ចាស់ផ្ទះកម្ពុជា និងបានចារទុកក្នុងប្រវត្តិសាស្ត្រកីឡាស៊ីហ្គេម។

៣. មិនយកតម្លៃ

ការមិនយកតម្លៃរបស់ម្ចាស់ផ្ទះកម្ពុជាលើការស្នាក់នៅ ម្ហូបអាហារ ការដឹកជញ្ជូន សិទ្ធិផ្សព្វផ្សាយ និងសំបុត្រចូលទស្សនាត្រូវបានចារទុកក្នុងប្រវត្តិសាស្ត្រស៊ីហ្គេមចាប់ពីឆ្នាំ២០២៣តទៅ។ រឿងនេះត្រូវបានប្រទេសតំបន់អាស៊ាន និងពិភពលោកបានចាប់ផ្តើមតាំងពីមុនពិធីបើកស៊ីហ្គេមមកម្ល៉េះ ហើយនៅតែបន្តនិយាយយូរអង្វែងទៅមុខទៀត។ រាល់ពេលមានព្រឹត្តិការណ៍កីឡាស៊ីហ្គេមលើកក្រោយ ច្បាស់ណាស់ថា គេនឹងនិយាយអំពីម្ចាស់ផ្ទះកម្ពុជាជាប្រទេសដំបូងគេបង្អស់ដែលមិនយកតម្លៃសេវាកម្មទាំងនោះ៕