សម្ដេចតេជោ ហ៊ុន សែន ណែនាំឲ្យបញ្ចេញរថយន្តក្រុងជាង ៣០០ គ្រឿង ដឹកជញ្ជូនកម្មករទៅបោះឆ្នោត

សម្ដេចតេជោ ហ៊ុន សែន នាយករដ្ឋមន្ត្រី នៃកម្ពុជា ណែនាំឲ្យអភិបាលរាជធានីភ្នំពេញ បញ្ចេញរថយន្តក្រុងជាង ៣០០ គ្រឿង ដឹកជញ្ជូនកម្មករ-កម្មការិនី ទៅតាមបណ្ដាខេត្តនានា ដើម្បីចូលរួមការបោះឆ្នោតជ្រើសតាំង តំណាងរាស្រ្ដ នីតិកាលទី ៧។  

តាមរយៈសារជាសំឡេង នៅល្ងាចថ្ងៃទី ១១ ខែកក្កដានេះ សម្ដេចតេជោ ហ៊ុន សែន នាយករដ្ឋមន្ត្រី នៃកម្ពុជា បានលើកឡើងថា រាជរដ្ឋាភិបាល បានអនុញ្ញាតឲ្យកម្មករ-កម្មការិនី ឈប់សម្រាករយៈពេល​ ៣ ថ្ងៃ ដើម្បីទៅចូលរួមការបោះឆ្នោតជ្រើសតាំង​ តំណាងរាស្រ្ដ នីតិកាលទី ៧ ឆ្នាំ ២០២៣ នេះ។

ដោយមើលឃើញអំពីស្ថានភាព នៃមធ្យោបាយធ្វើដំណើរអាចនឹងមានការខ្វះខាត និងខ្លាចក្រែងមានការដំឡើងថ្លៃឈ្នួលរថយន្ត ជាពិសេសដើម្បីសម្រួលដល់ការលំបាករបស់កម្មករ-កម្មការិនីនោះ សម្ដេចតេជោ ហ៊ុន សែន បានណែនាំដល់អភិបាលរាជធានីភ្នំពេញ បញ្ចេញរថយន្តក្រុងពី ៣០០ ទៅ ៣៥០ គ្រឿង ដើម្បីដឹកជញ្ជូនកម្មករ-កម្មការិនី ទៅបោះឆ្នោតនៅតាមបណ្ដាខេត្តនានា។

សម្ដេចតេជោ ហ៊ុន សែន បានបន្តថា «ខ្ញុំសូមធ្វើការណែនាំឲ្យបានច្បាស់ថា ការដឹកជញ្ជូននេះ ធ្វើឡើងដោយគ្មានការរើសអើងគណបក្សនយោបាយណាមួយទេ ដូច្នេះមិនមែនជាការទិញដូរសន្លឹកឆ្នោតនោះឡើយ យើងដឹកគ្រប់និន្នាការនយោបាយ ហើយយើងក៏មិនដឹងថា តើអ្នកណា នឹងត្រូវបោះឆ្នោតឲ្យអ្នកណា? នោះឡើយ យើងដឹកដោយគ្មានការើសអើងនោះទេ ដូច្នេះវាមិនមែនជាការសូកប៉ាន់សម្រាប់ដោះដូរជាមួយនឹងសន្លឹកឆ្នោតនោះទេ»។

សម្ដេចតេជោ ហ៊ុន សែន បានណែនាំឲ្យមានការរៀបចំផែនការដឹកជញ្ជូនកម្មករ-កម្មការិនី នៅតាមបណ្ដាញខេត្តឲ្យបានច្បាស់លាស់៕